د افغانستان د سولې لپاره د امریکا ځانګړی استازی وایي، په افغانستان کې د تاوتریخوالي اوسنۍ زیاته شوې کچه د نه منلو ده.
زلمي خلیلزاد ویلي دا مهال په دغه تاوتریخوالي کې زیات افغانان مري.
د افغانستان د سولې لپاره د امریکا د متحدو ایالتونو ځانګړی استازی وايي، دی ځکه مایوسه شوی چې د جګړو د کمولو له ژمنو سره سره تاوتریخوالی نه دی کم شوی.
زلمي خلیلزاد بېګا په خپل ټویټر کې ولیکل، د سیاسي جوړجاړي لپاره به کړکۍ د تل لپاره پرانیستې نه وي. هغه غوښتنه کړې، چې روانه وینه تویېدنه باید بنده شي.
د خلیلزاد د مطبوعاتي دفتر په اعلامیه کې د هغه له قوله راغلي چې په افغانستان کې د جګړو اوسنۍ سطحه خورا لوړه شوې ده: "زیات افغانان مري، ښکېل لوري د تاوتریخوالي کمولو داسې یوې بيړنۍ موافقې ته اړتیا لري، چې د دایمي او هر اړخیز اوربند سبب شي."
د امریکا متحدو ایالتونو او طالبانو افغانستان ته د سولې راوستلو موافقه د فبرورۍ پر ۲۹مه په قطر کې لاسلیک کړه.
طالبانو، د امریکا متحد ایالتونه له دې موافقې په سرغړونه تورن کړی او ویلي یې دي چې امریکايي ځواکونو په هلمند او فراه ولایتونو کې د موافقې خلاف د افغان ځواکونو په ملاتړ هدفمند بریدونه کړي دي.
په تازه مورد کې په افغانستان کې امریکايي ځواکونو د دوشنبې په ورځ په همداسې یوه حمله کې د طالبانو د پنځو جګړه مارو د وژل کېدو خبر ورکړ، چې په وینا یې د افغان ځواکونو په ملاتړ دا حمله په میدان وردګ ولایت کې شوې ده.
د امریکايي ځواکونو ویاند سني لګیت هغه ادعا رد کړه، چې ګواکې امریکا دې په دې ډول حملو سره په قطر کې له لاسلیک شوې موافقې سرغړونه کړې وي.
د افغانستان حکومت، ځینو نورو هېوادونو او سازمانونو په وار وار له طالبانو د جګړو د بندولو او اوربند غوښتنه کړې ده.
خو په سېشنه له ازادۍ راډیو سره یوه طالب ویاند ادعا کړې چې دوی خپلې حملې کمې کړي دي او د ده په وینا چې برعکس، مقابل لوري پر طالبانو خپلې حملې زیاتې کړي، ځکه نو طالبان خپلې دفاع ته مجبوره شوي دي.
په قطر کې د افغانستان د دولت او طالبانو مرکچي پلاویو د خبرو او کتنو ۴۰ ورځې کېږي، خو دواړه لوري بیا هم د رسمي مذاکرو پر کړنلار نه دي نه سلا شوي.
