اسلام اباد – د پاکستان وزیراعظم عمران خان په ډاګه کړې ده چې د کورونا وایرس د مخنیوي هڅو په لړ کې به په هېواد کې بيا ټولبند یا لاکډاون ونکړي.
عمران خان دا خبره د جون پر ۱۳ مه په لاهور کې د پنجاب وزيراعلی، ګورنر او نورو لوړو پوړو چارواکيو سره تر ليدو وروسته د خبرې غونډې پر مهال کړې ده.
نوموړي د پنجاب له حکومتي مشرانو سره په يوه غونډه کې په صوبه کې د کورونا وبا په تېزۍ سره د خپرېدو د صورتحال جاج واخيست.
عمران خان وويل، د مکمل ټولبند پر ځای به نرم لاکډاون وي او هغه سيمه به تړل کېږي چې پکې کورونا وايرس زيات خپور شي.
نوموړي زياته کړه چې د هېواد پوليس د مکمل ټولبند بوج پرخپله غاړه د اخيستو توان نلري.
په نړۍ کې د کورونا وایرس د پېښو تازه شمېر
هغه وويل، د پاکستان غوندې هېواد له اقتصادي پلوه د بشپړ لاکډوان صلاحیت نلري.
تېره اوونۍ د روغتيا نړيوال سازمان ډبليو اېچ او په يو خط کې د پاکستان څلور واړو صوبو ته ويلي ول چې دوی د لاکډاون ختمولو په لړ کې د دې سازمان پر لارښودونو عمل نه دی کړی.
پاکستان د کورونا وبا خپرېدو د مخنوي په لړ کې د مارچ په مياشت کې مکمل لاکډاون اعلان کړی وو چې د مې پر نهمه نېټه يې ختم کړ.
دا په داسې حال کې ده چې په پاکستان کې په تېر شواروز کې ۶۸۲۵ نور کسان په کورونا وايرس اخته شوي دي چې ورسره د کووډ-۱۹ ناروغانو شمېر تر يو لک ۳۹ زره زيات شو.
د وايرس په اړه د روغتيا وزارت ويبپاڼې د جون پر ۱۴ مه ويلي چې په تېرو ۲۴ ساعتونو کې کورونا وبا ۸۱ نور کسان وژلي هم دي.
په پاکستان کې د جون تر ۱۴مې د کورونا وایرس له کبله د مړيو مجموعي شمېر۲۶۳۲ ته رسېدلې ده.
د ويبپاڼې په خبره تراوسه پورې د کووډ-۱۹ ناروغۍ څخه تر ۵۱ زره زيات کسان جوړ شوي هم دي.
د فېسبوک تبصرې