په سند کې د ګورنر راج وړانديز

په سند اسمبلۍ کې د اپوزيشن ګوندونو مشر وايي په صوبه کې د ګورنر راج لګولو وړنديز به بد نه وي.

بلخوا د پيپلزپارټۍ صوبايي حکومت ویلي دي چې دوی به د هر هغه غير اييني ګام مخه نيسي چې هدف يې ولس له خپلو منتخب استازو بې برخې کول دي.

په سند اسمبلۍ کې د اپوزيشن ډلو مشر او د پاکستان تحريک انصاف مخکښ فردوس شميم نقوي تور پورې کړی چې په دې صوبه کې د پيپلز پارټۍ حکومت د ناقصه پالسيو له کبله خلک له معاشي مسلو سره مخ دی.

په سه شنبه شميم نقوي په کراچۍ کې د ځينو نورو اپوزيشن ګوندونو له غړو سره شريکې خبري غونډې ته په وينا کې تور پورې کړ چې صوبايي حکومت په درغليو کې ککړ دی،ناکامه شوی او د حکمرانۍ کولو اهل نه دی پاتی شوی. ''له دې نا اهله او نالايقه خلکو بايد ځان خلاص کړل شي. څومره په تېزۍ سره چې د صوبې حالات خرابيږي نو زه به بيا دا غوښتنه کوم که چېرې دلتهګورنر راج ولګول شي نو څه بده خبره به نه وي.''

شميم نقوي زياته کړه چې په سند کې ډېرې ماشومان له تعليمه بې برخي دي، روزګارونه نشته ، ډېرې خلک پاکو اوبو ته لاس رسی نلري او روغتيايي خدمات هم ناقصه دي.

بلخوا د سند حکومت د اطلاعاتو وزير سيد ناصر حسېن شا د مې په ۱۹ مه رسنيو ته په لېږلي يوه خبرپاڼه کې وېلي دي چې اپوزيشن ګوندونه په صوبه کې پرمختګ نه غواړي نو ځکه د منتخب حکومت د لرې کولو او ګورنر راج لګولو خبرې کوي.نوموړي په اپوزيشن غږ کړی چې له داقسمه غېر اييني غوښتنو په شا شي.

په سه شنبه د پيپلز ګوند يو مخکښ سعيد غني په سند اسمبلۍ کې د اپوزيشن د مشر او تحريک انصاف مخکښ فردوس شميم نقوي د تورونو په ځواب کې بس هم دومره وويل او تور يې پورې کړ چې د اپوزيشن مشران نا اهله دي او د دوی خبري جدي مه اخلئ: ''د دوی خپل خلک وايي چې دا زمه واره خلک نه دي، په وفاقي حکومت کې ناست د پاکستان تحريک انصاف غړي وايي چې په سند اسمبلۍ کې د دوي غړي د هېڅ نه خبر نه دي نو د دوی خبرې جدي مه اخلئ.دا غريبانان پريشانه وي نو بس په پريشانۍ کې بيا داقسمه خبرې کوي.''

په کراچۍ کې د سياسي چارو پوه اختر بلوڅ وايي د پاکستان تحريک انصاف لخوا په سند حکومت نيوکې او هلته د ګورنر راج لګولو د خبرو هدف د پيپلز پارټۍ هغه شهرت ته تاوان رسول دي چې د کووېډ ۱۹ ناروغۍ پرضد د موثره اقداماتو له وجې ورته ترلاسه شوی.

د ده په خبره په پاکستان کې ړومبی سند حکومت وو چې د کورونا وبا د مخنيوي په هدف يې ټولبند ولګاوه، پوهنتونونه يې بند کړل، په اجتماعاتو يې بنديزونه ولګول او د دې هر څه اعتراف نړيوالو رسنيو وکړ چې له وجې يې بيا ځايې رسنۍ هم مجبوره شوې چې په سند کې د پيپلزپارټۍ د اقداماتو ستاينه وکړي.

اختر بلوچ د مې په ۲۰ مه مشال رېډيو ته وويل چې دا خبره تر څه حده سمه ده چې په سند کې د پيپلز پارټۍ په حکومتدارۍ کې ځينې نيمګړتياوې دي او د خلکو معاشي حالت خراب دی خو د دې مطلب دا نشو چې هلته دې منتخب حکومت ختم کړل شي او ګورنر راج دې ولګول شي.

د ده په خبره پاکستان تحريک انصاف د داقسمه خبرو يو هدف دا هم دی چې په وفاق کې له خپلې ناقصه حکومتدارۍ د خلکو پام واړوي:

''دا وخت په ملک کې د کورونا مسله ده،پوهنتونونه بند دي،د تعليم مسله ده، معاشي مسلې دي، خلک روزګارونه غواړي نو له دې مسلو د پام اړلو لپاره دا قسمه خبرې کيږي. ګورنر راج سره به مسلې حل شي؟ نا ! ګورنر راج لګول څه د ماشومانو لوبې نه دي، د ايين له مخې ړومبې به صوبايي اسمبلي او بيا به قامي اسمبلي د دې منظوري ورکوي او بيا به ګورنر راج لګي او د دې هرڅه لپاره به ړومبې د ټولو اپوزيشن ګوندونو رايوځای کول وي.''

اختر بلوچ زیاتوي پاکستان دا وخت د کورنا وبا او معاشي بحران سره مخ دی نو ټولو سياسي ګوندونو ته پکار دي چې په شريکه او مشورې سره داسې تګلاره جوړه کړي چې له مخې يې د يادو دواړو مسلو مخه ونيول شي. د يادونې ده چې له کله نه په پاکستان کې د کورونا وبا راغلې نو سند حکومت د وبا د مخنيوي په هدف د لاکډوان سختولو او د تحريک انصاف په مشرۍ وفاقي حکومت بيا د معاشي حالت د ښه کولو په موخه د لاکډاون د نرمولو غوښتنه کوي او د دواړو خواو ترمنځ پر دې اکثره د سختو بيانونو تبادلې هم شوي دي.