د لاسرسي ځای

تازه خبر

د بندیانو سپارلو بهیر دې نور هم ګړندی شي: خلیلزاد


د افغانستان سولې لپاره د امریکا ځانګړي استازی زلمی خلیلزاد

د افغانستان سولې لپاره د امریکا ځانګړي استازي له افغان حکومت او طالبانو غوښتي چې د بندیانو د تبادلې بهیر دې ګړندی کړي چې بین‌ الافغاني خبرو او دایمي اوربند ته په چټکۍ لاره هواره شي.

زلمي خلیلزاد د مې په لومړۍ نېټه پر خپله ټويټرپاڼه ولیکل: "په دې کار کې د ځنډ نتیجه به د افغانانو ترمنځ د جګړې له کبله لا زیات تلفات وي چې د دوی دا جګړه باید د کورونا وایرس پرضد وي."

دا په داسې حال کې ده چې د افغان حکومت یوې سرچینې د نوم نه ښودو په شرط ازادي راډيو ته وویل چې د مې پر دويمه نېټه ښايي افغان حکومت ۱۰۰ نور طالب زندانیان راخوشي کړي.

د دې سرچینې په وینا، د ولسمشر د فرمان په عملي کولو سره به دوی ۱۵۰۰ بندیان خوشې کړي، البته د طالبانو د نوملړ په اړه ملاحظات لري.

هغه زیاته کړه چې له افغان حکومت سره تر ۵۰۰۰ زیات طالبان بندیان دي، خو د طالبانو په نوملړ کې ځکه ۵۰۰۰ کسان غوښتل شوي چې دا یې تر ټولو سخت دریځه او مهم کسان دي.

د افغان ولسمشر د ویاند مرستیال دوا خان مینه‌ پال د بندیانو د تبادلې په اړه د مې پر لومړۍ نېټه ناوخته ازادي راډيو ته وویل: "حکومت د ولسمشر فرمان پر اساس د طالبانو د خوشې کولو لړۍ پیل کړې ده او تر اوسه‌ یې ۵۰۰ طالب زندانیان خوشې کړی دي.

د فرمان له مخې به په لومړي پړاو کې ۱۵۰۰ کسان خوشې کېږي. حکومت دا ګام له کورونا سره د مبارزې او سولې ته د رسېدو په خاطر پورته کوي."

په همدې حال کې د قطر په دوحه کې د طالبانو د سیاسي دفتر ویاند سهیل شاهین د مې پر لومړۍ نېټه ازادي راډيو ته وویل چې طالبانو تر اوسه د افغان حکومت ۱۱۴ بندیان خوشې کړي.

ده زیاته کړه: "په دغو خوشې شویو کې هغه څلور کسان هم شامل دي چې مخکې د بشري خواخوږۍ له مخې د علاج لپاره پر ضمانت خوشې شوي وو او اوس ورته وویل شول چې دوی خلاص دي، کورونو ته دې لاړ شي."

سهیل شاهین
سهیل شاهین

د افغانستان د سولې لپاره د امریکا ځانګړي استازي زلمي خلیلزاد د مې لومړۍ پر ماښام په خپل ټويټ کې د په افغانستان کې د ملګرو ملتونو مرستندويه ماموريت هغه راپور ته هم اشاره کړې چې له مخې يې د فبرورۍ میاشتې په پای کې د ولسي وګړو تلفاتو شمېر د تېر کال په پرتله ۲۹ سلنه کم شوی و.

خو روېټرز خبري اژانس په یوه راپور کې ویلي، د مارچ له لومړۍ نېټې د اپرېل تر ۱۵مې نېټې پورې د تېر کال د همدې مودې په پرتله طالبانو په افغانستان کې تر ۷۰ فیصده زیاتې حملې کړي.

دا خبره روېټرز خبري اژانس د دوو جلا سرچینو په حواله کړې ده چې یوه لویدیځه نظامي او بله خپلواکه سرچینه یاده شوې.

بل لور ته د افغان حکومت د معلوماتو له مخې په همدې موده کې ۹۰۰ افغان وګړي وژل شوي چې تېر کال د دغو تلفاتو شمېر ۵۲۰ وو.

د روېټرز راپور اشاره کوي چې په همدې حال کې د طالبانو تلفات په دې موده کې ۶۱۰ کسانو ته کم شوي چې تېر کال د دغو تلفاتو شمېر ۱۶۶۰ وو.

راپور د لوېديځو، افغان او خپلواکو چارواکو له قوله لیکلي، د طالبانو په حملو کې زیاتوالی څرګندوي چې دا ډله له امریکا سره موافقې ته بې‌اعتنايي ښيي چې د دې موافقې له مخې يې باید تاوتریخوالی کم کړی وی.

په وروستیو حملو کې څلور مورده د هېواد په شمال کې د افغان ځواکونو په خوړو کې د زهرو ګډول یاد شوي.

د طالبانو د ویاند ذبیح‌الله مجاهد له قوله ویل شوي چې دا حملې طالبانو نه ‌دې کړي، خو دې ډلې د لوګر او ننګرهار په ګډون په ګڼو ولایتونو کې د وروستیو حملو مسولیت منلی دی.

قطر کې د امریکا او طالبانو د تړون لاسلیک غونډه
قطر کې د امریکا او طالبانو د تړون لاسلیک غونډه

د امریکا او طالبانو ترمنځ د فبرورۍ میاشتې د ۲۹مې نېټې د موافقې له مخې به طالبان تاوتریخوالی کموي.

طالبانو همداراز د موافقې له مخې ژمنه کړې چې د افغان حکومت لخوا د ۵۰۰۰ زندانیانو د راخوشې کولو په بدل کې به ۱۰۰۰حکومتي کارکوونکي بندیان خوشې کوي.

طالبانو ویلي چې له دې اقدام وروسته به له حکومت سره د سولې مخامخ خبرې پیلوي.

د فېسبوک تبصرې

XS
SM
MD
LG