د لاسرسي ځای

تازه خبر

د سولې بهیر پرمختګ لپاره باید تاوتریخوالی کم شي: مارک ایسپر


مارک ایسپر وویل، د تاوتریخوالی زیاتېدل ورته د منلو وړ نه دي

د امریکا دفاع وزیر مارک ایسپر له طالبانو غوښتي چې په افغانستان کې، د سولې لپاره د افغانانو خپلمنځي خبرو ته د لار هوارولو لپاره دې تاوتریخوالی کم کړي.

مارک ایسپر دا خبره د اپرېل پر ۲۴مه ناوخته پر خپله ټويټر پاڼه لیکلې ده.

هغه لیکلی، اوس وخت رارسېدلی چې ټول اړخونه د تلپاتې سولې لپاره له رامنځته شوې موقعې ګټه واخلي.

بلخوا د ناټو هېوادونو سفیرانو د اپرېل پر ۲۴مه په یوه اعلامیه کې د افغانستان د سولې اړوند ویلي، په افغانستان کې د تاوتریخوالي اوسنۍ کچه د منلو وړ نه‌ ده.

ناټو په دې اعلامیه کې ویلي چې طالبان په افغانستان کې د تاوتریخوالي لامل دي.

د ناټو د ۳۰ غړو هېوادونو اعلامیه څرګندوي چې د افغانستان په اړه د دې سازمان دریځ جګړې ته د پای ټکی ايښودل دی.

ناټو سازمان ته د امریکا سفیرې کې بېلي هاتچيسن پر خپله ټويټرپاڼه لیکلي، امریکا او د ناټو متحدان له افغانستان سره ژمن پاتې کېږي.

دې د ناټو شورا وېډیويي غونډه ټويټ کړې ده.

تر دې وړاندې د ناټو عمومي منشي ینز سټولټنبرګ هم پر طالبانو غږ کړی و چې د سولې خبرو ته دې کښېني او د بندیانو خوشي کولو لړۍ دې چټکه کړي.

هغه ویلي چې چې د طالبانو له خوا د تشدد اوسنی حالت د منلو وړ نه دی.

دا له هغه وروسته ده چې طالبانو د افغان حکومت له خوا په روژه کې د اوربند وړاندیز رد کړ.

د طالبانو یو ویاند ویلي چې هغوی به د سولې د ممکنه خبرو اترو او د بندیانو په تبادله کې د ځنډ پر سر جګړې ته دوام ورکوي.

افغان ولسمشر اشرف غني د اپرېل پر ۲۳مه وسله والو طالبانو ته د روژې په میاشت کې د اوربند وړاندیز کړی وو.

افغان ولسمشر اشرف غني
افغان ولسمشر اشرف غني

د امریکا او طالبانو ترمنځ د فبرورۍ پر ۲۹مه په شوي تړون کې ویل شوي چې افغان حکومت به د سولې تر خبرو وړاندې د باور په توګه د طالبانو ۵۰۰۰ زره بندیان خوشي کوي.

افغان حکومت تر اسه ۵۵۰ طالب بندیان خوشي کړي او طالبانو په بدل کې ۶۰ افغان امنیتي او دفاعي کسان خوشي کړي دي.

د فېسبوک تبصرې

XS
SM
MD
LG