د لاسرسي ځای

تازه خبر

علي او محسن د خړ کمر او زندان کیسه کوي


د ارشیف

پراګ ـ د هریپور له زندانه په ضمانت تر خوشې کېدو وروسته محسن داوړ او علي وزیر مشال راډیو سره په ځانګړې مرکه کې د زندان د شپو کیسه وکړه.

محسن داوړ وویل، د قیدیانو هم څه حقونه وي چې پاملرنه یې اړینه وي خو دوی ته یې هېڅ قسمه سهولتونه نه وو ورکړي.

هغه زیاته کړه:

"موږ یې په هریپور کې د ترهګرو لپاره په ځانګړي شوي جېل کې ساتلي وو. په اوونۍ کې یو وار یې اجازه راکوله چې د خپلو کورنیو له غړو سره وګورو. په یو ډول یې په پنجره کې ساتلي وو."

هغه وړاندې وویل، نه ورته اخبار ورکول کېده او نه هم د راډیو د اورېدو یا د تلویزون د لیدو اجازه چا ورکوله.

هغه وايي، د جېل نور قیدیان دا حق لري چې د نورو قیدیانو سره وګوري او خبرې وکړي چې وخت یې تېر شي، خو دوی څخه دا حق هم اخېستل شوی وو:

"په یو ډول یې د تنهایۍ په قید کې ساتلي وو، ځکه هلته موږ دواړه وو، درېم کس یې راته نه راپرېښودلو."

محسن داوړ وايي، پر دوی لګول شوي تورونه ناسم دي، دوی د عدم تشدد پلویان دي او د خپلو وکیلانو په مرسته به خپل قانوني جنګ جاري ساتي.

هغه د سېپټمبر پر ۲۱مه په خپل یو ټوېټر پیغام کې لیکلي: د خړ کمر پېښه به د نړۍ په تاریخ کې پر سوله ییزو مظاهرچیانو د ریاست د ظالمانه غبرګون په توګه ولیکل شي.

تم شئ

هېڅ میډیايي سرچینه اوس نشته

0:00 0:02:42 0:00
د ډاېرېکټ لېنک


بل پلو علي وزیر هم مشال راډیو ته وویل چې په زندان کې ورسره هېڅ قسمه رعایت نه دی شوی.

هغه د جېل د شپو ورځو کیسه داسې کوي:

"موږ په هريپور جېل کې څه نا څه درې میاشتې تېرې کړي چې دغه وخت کې یې موږ عدالت ته نه یو وړاندې کړي."

هغه وايي د کورنۍ له غړو او د وکیلانو سره د خبرو او کتو اجازه ورکول کېدله.

علي وزیر په زندان کې پر ده یا پر محسن د تشد په اړه مشال راډیو ته څه و نه ویل، خو دومره یې وویل چې د خړ کمر د پېښې پر ورځ پرې امنیتي کسانو سخت تشدد کړی وو.

نوموړي دا هم وویل چې حکومت د خړ کمر پېښې قربانیانو کورنیو ته معاوضې ورکړې، د زخمیانو درملنه یې وکړه او د دوی ضمانت هم عدالت منظور کړو، نو له دې هرڅه جوتېږي چې دوی او ملګري یې بېګناه دي:

"که په موږ لګېدلي تورونه سم وي نو بیا د ترهګرو خو نه څوک پوښتنه کوي، نه یې علاج کوي او نه هغو ته معاوضه ورکول کېږي. نو دا څنګه ترهګري وه چې دوی ته یې معاوضه هم وکړه، د هغوی علاج یې هم وکړ او ورسره یې معافي هم وغوښته."

تم شئ

هېڅ میډیايي سرچینه اوس نشته

0:00 0:03:05 0:00
د ډاېرېکټ لېنک

د پښتون ژغورنې غورځنګ په وينا د روان کال د مې پر ۲۶مه نېټه د شمالي وزیرستان په خړ کمر کې د پاکستانیو عسکرو په ډزو کې د دوی ۱۴ غړي ووژل شول او تر ۴۰ زيات ژوبل شول خو امنیتي ادارې دا ردوي او تور پورې کوي چې د محسن او علي په مشرۍ مظاهرچیانو د دوی پر یوه پوسته برید کړی وو چې پکې د پوځ پنځه تنه ژوبل شوي ول چې يوه يې وروسته ساه ورکړه.

د عدالت په امر له زندانه تر خوشي کېدو وروسته د محسن داوړ او علي وزير د څرګندونو په اړه د پاکستان پوځ يا حکومت تر دې دمه غبرګون نه دی ښودلی.

XS
SM
MD
LG