اسلام اباد ـ په پاکستان کې د افغانستان سفیر شکرالله عاطف مشعل وايي، د هېواد لپاره یې دا د یو لوی ویاړ خبره ده چې په ګاونډي هېواد کې لسګونه افغان زده کونکي د لوړو زده کړو د فراغت اسناد تر لاسه کوي.
نوموړی د مې پر ۱۸ اسلام اباد په علامه اقبال تالار کې د نړیوال اسلامي پوهنتون د افغان زده کونکو د فراغت غونډه کې مشر مېلمه وو.
د اسلام اباد په نړيوال اسلامي پوهنتون کې د افغانستان ۷۰ زده کونکو ته چې خپله څلور کلنۍ دوره یې پوره کړې اسناد ورکړل شول.
غونډې ته د وینا پر مهال عاطف مشعل وويل، افغان محصلینو ته یې سپارښتنه دا ده چې خپل اسناد دې ورسره شريک کړي چې په افغانستان کې ورله د دوی د قابليت پر اساس د کار موقع برابره کړي.
د نړيوالو اړيکو له څانګې څخه فارغه شوې محصله فاطمه يوسفي وايي، له اسنادونو ترلاسه کولو ورسته غواړي چې افغانستان ته لاړه شي او هلته کار وکړي.
په اسلام اباد کې د افغانستان د سفارت په وینا دا مهال د پاکستان په مختلفو پوهنتونونو کې د ۵۰۰۰ نه زيات او په نړيوال اسلامي پوهنتون کې تر ۱۲۰۰ پورې زده کونکي لوړې زده کړې کوي.
