د افغانستان د پکتیکا چارواکي وايي ، هلته د مشکوکې امریکايي بې پیلوټه الوتکې برید لږ تر لږه لس مشکوک وسله وال وژلي دي.
د پکتيکا ولايت د امنیې قومندانۍ وياند شاه محمود ارین د مې پر ۱۱مه مشال راډیو ته وویل چې دا پېښه د مې پر ۱۰مه د برمل ولسوالۍ په منګړېتۍ سیمه کې شوې ده.
بلخوا پاکستانيوچارواکو ادعا کړې چې په وژل شوو وسله والو کې د پاکستانیو طالبانو د حافظ ګل بهادر ډلې یو کومندان اسدالله عرف سنګري هم شامل دی.
وسله والو ډلو لا هم په دې اړه څه نه دي ويلي.
د پاکستان او افغانستان په سرحدي سیمو کې وخت ناوخته د بې پیلوټه الوتکو بریدونه کېږي چې زیاتره پکې د مهمو وسله والو وژل کېدو ادعاوې شوې دي.
