پراګ - د پښتون ژغورنې غورځنګ یو مشر او په قامي اسمبلۍ کې د جنوبي وزیرستان استازي علي وزیر پر تحریک د وزیراعظم عمران خان تورونه رد کړي دي.
نوموړي د اپرېل پر ۲۴مې ماښام مهال مشال راډیو ته وویل، پښتون ژغورنې غورځنګ د ولس د بنیادي حقونو او امنیت ټینګولو غوښتنې کوي.
علي وزیر دا څرګندونې تر هغې وروسته کړې دي چې وزیراعظم عمران خان د اپرېل پر ۲۴مه په واڼه کې د پښتون ژغورنې غورځنګ له نوم اخیستو پرته تور پورې کړ چې ځېنې مشران یې په سیمه کې ګډوډۍ ته لمن وهي:
"دلته ځېنې خلک دي چې ځوانان د [سیمې] ګډوډۍ ته هڅوي. په دوی کې عام ځوانان سم دي، خو د دوی ځېنې مشرانو ته له بهره پیسې راځي او د دې ځای ځېنې ګوندونه – چې خپله درغلي ژغورل او ساتل غواړي – هم د دوی مرسته کوي."
له سیاسي ګوندونو او موږه ولې تفتیش (پلټنې) نه کېږي؟علي وزیر
علي وزیر وايي، د پاکستان حکومت دې بې پرې پلټنې وکړي او که دا یې ثابته کړه چې د پښتون ژغورنې غورځنګ مشرانو له بهره پیسې اخیستې وي، نو له قانون سره سم دې ورته سزا ورکړي:
"زه یم، منظور [پښتین] دی، محسن [دوړ] دی، دغه درې کسان یو. موږ چې په دې ملک کې د سیاسي ګوندونو [له استازو او مشرانو] سره وینو نو هغه سیاسي ګوندونه خو دلته [ازاد] ګرځي. په ما باندې الزام دی چې [له بهره] فنډ اخلي، پر سیاسي ګوندونو الزام دی نو له سیاسي ګوندونو او موږه ولې تفتیش (پلټنې) نه کېږي؟ موږ دوی خپلو [پلټنیزو] کمېشنونو ته مخامخ ولې نه کښېنوي؟ یا دې سیاسي ګوندونه وپوښتي چې د پي ټي اېم کسان ولې ورسره ګوري؟ که دوی دا وايي نو [په وروستیو] کې د سېنېټ کمېټۍ ده او د [خیبر پښتونخوا] د وزیراعلا له کمېټۍ سره مو هم لیدلي، نو د دې په باره کې یې څه خیال دی؟"
د جلا ضلعې موضوع
علي وزیر پر وزیراعظم عمران خان انتقاد وکړ او ویې ویل چې په جنوبي وزیرستان کې د جلا ضلعې جوړولو په اړه یې څرګندونې په سیمه کې د مسیدو او وزیرو ترمنځ د اختلافاتو زېږولو معنا لري.
عمران خان په واڼه کې غونډې ته په وینا کې وویل چې یوه اوونۍ مشورې کوي او بیا به فیصله وکړي چې په جنوبي وزیرستان کې د وزیرو لپاره جلا ضلع جوړه کړي او که څنګه؟
دی وايي، دا سمه ده چې د وزیرستان وزیر غواړي چې ټولې دفتري چارې له ټانکه منتقلې شي.
د پښتون ژغورنې غورځنګ مخکښ او د قامي اسمبلۍ غړی علي وزیر وايي، د مسیدو او وزیرو اکثریت یو داسې انتظامي جوړښت غواړي چې دفتري چارې یې په خپلو سیمو کې وشي او که د دې لپاره ضلع جوړېږي، نو د دې کار پلویان هم دي.
وزیر زیاتوي چې دا کار باید په سیمه کې د ګډوډۍ او د مسیدو او وزیرو وېشلو لپاره ونشي.
