پراګ ـ په باجوړ ضلع کې د پولیو د وروستي کمپاین پر مهال خوا و شا ۶۵ فیصده ماشومان له ویکسینو پاتې شوي دي.
د یادې ضلعې د صحت د څانګې مشر ډاکټر وزیر صافي په دې اړه د مارچ پر ۳۰مه مشال رېډیو ته وویل چې دا ستونزه په کمپاین کې د برخې اخیستونکیو اهلکارو لپاره د حفاظتي انتظاماتو د نیشتوالي له وجې رامنځ ته شوې ده.
ډاکټر وزیر صافي زیاته کړه چې په سېمه کې به د اپریل میاشتې له ۲۲م نه د پولیو د مخنیوي یو بل کمپاین شروع کوي او تمه ده چې په دغې کې ټولو ماشومانو ته ویکسین ورکړل شي.
بلخوا په خېبر پښتونخوا کې د پولیو د مخنیوي د ادارې ویاند ډاکټر جوهر خان وايي، اوس د لیویز او خاصه دار ځواک هړتالونه ختم شوي او ډېر زر به د قبایلي ضلعو پاتې شویو ماشومانو ته ویکسین ورسول شي.
چارواکي وايي چې سږ کال په پاکستان کې د پولیو وایرس څلور ماشومان ځپلي چې درې يې له خېبر پښتونخوا سره تړاو لري او د دې وجه داده چې په ځېنو سیمو کې ماشومانو ته د پولیو ضد څاڅکي نه رسېږي.
