د افغانستان جمهوري ریاست وايي، د افغانستان د سولې لپاره د امریکا د بهرنیو چارو وزارت ځانګړی استازی زلمی خلیلزاد او د امریکايي چارواکو ټیم په منظم ډول له افغان ولسمشر اشرف غني سره تماس لري او په قطر کې د طالبانو له استازو سره د دوی د روانو خبرو په اړه سلا مشورې ورسره کوي.
له دې مخکې د امریکا د پوځ د مرکزي قرارګاه عمومي قوماندان جنرال جوزف ووټل ویلي و چې ولسمشر غني په عام محضر کې د خپلو اندېښنو له څرګندولو سره- سره د امریکايي چارواکو او د طالبانو د استازو ترمنځ د روانو خبرو د نوښت ملاتړ کوي.
ښاغلي ووټل، تېره ورځ د امریکا د کانګرس د استازو د جرګې د پوځي خدماتو د کمېټې په استماعیه غونډه کې وویل، له ښاغلي خلیلزاد سره له خپلو بحثونو یې دا نتیجه اخېستې چې نوموړی په منظم ډول له ولسمشر غني سره سلا مشورې کوي او د خبرو له جریانه یې پوره خبروي او ولسمشر د دې خبرو ملاتړ کوي.
د جمهوري ریاست ویاند هارون چخانسوري نن د جمعې په ورځ ازادي راډیو ته وویل چې د امریکايي چارواکو او افغان حکومت ترمنځ دوامداره تماسونه شته.
نوموړي وویل:
"ښاغلی خلیلزاد او ټیم یې له ولسمشر غني سره تماس لري او موږ د هر هغه اقدام چې له افغان حکومت سره د همغږۍ او د حکومت د سولې له پلان پر اساس پرمخ ځي او نتیجه یې له افغان حکومت سره مخامخ خبرې وي، ملاتړ کوو."
خو ښاغلي چخانسوري دا یادونه هم وکړه چې پهدې برخه کې تر اوسه کافي پرمختګ نه لیدل کېږي.
افغان ولسمشر له دې مخکې څو ځلي د سولې د روانو هڅو د څرنګوالي په اړه غیر مستقیمه اندېښنه ښودلې او ویلي یې دي چې د سولې په خبرو کې ښکېل لوري باید په هېواد کې د دایمي سولې د ټینګښت لپاره هڅه وکړي او یو ځل خو یې خبرداری ورکړ چې افغانانو ته تحمیلي سوله د منلو وړ نه ده.
ولسمشر د سلواغې- دلوې په ۱۳مه نېټه د هېواد د امنیتي- دفاعي ځواکونو له استازو سره په کتنه کې وویل چې مؤقتي سوله به ونهمني.
