د افغانستان د سولې لپاره د امریکا د بهرنیو چارو د وزارت ځانګړي استازي، زلمي خلیلزاد په قطر کې له طالبانو سره لیده کاته کړي دي.
په قطر کې د طالبانو د سیاسي دفتر یو چارواکي د اکتوبر پر ۱۳مه مشال راډیو ته د دې ناستې د خبر پخلی وکړ خو د خبرو اترو په اړه یې تفصیل ورنه کړ.
په تیرو څلورو میاشتو کې دا دویم ځل دی چې امریکایي چارواکي د طالبانو له استازیو سره مخامخ خبرې کوي.
زلمی خلیلزاد د اکتوبر پر ۱۲مه له قطر څخه کابل ته تللی او هلته یې د اکتوبر پر ۱۳مه سهار له افغان ولسمشر اشرف غني سره لیده کاته کړي دي.
ډاکټر زلمي خلیلزاد ولسمشر اشرف غني ته ویلي چې امریکا د سولې په برخه کې د افغانستان د حکومت په مشرۍ هر ډول همکارۍ ته چمتو ده او په دې برخه کې هڅې جاري ساتي.
ولسمشر اشرف غني د امریکا د بهرنیو چارو د وزارت ځانګړي استازي زلمي خلیلزاد د هلو ځلو مننه وکړه او زیاته یې کړه چې دوي په افغانستان کې د تلپاتې سولې د رامنځ ته کېدو لپاره د هر اقدام او هڅې مننه او قدرداني کوي.
د امریکا او افغانستان حکومتونو لا په قطر کې د زلمي خلیلزاد او طالب استازو ترمنځ د شویو خبرو اترو په اړه څه نه دي ویلي.
د زلمي خلیلزاد په مشرۍ د امریکایي پلاوي دا سفر چې نژدې لس ورځې مخکې پیل شوی وو او د اکتوبر پر ۱۴مه پای ته رسېږي.
زلمي خلیلزاد په دې سفر کې د افغانستان، پاکستان، متحد عرب اماراتو ، سعودي عرب او قطر له لوړپوړو چارواکو سره ملاقاتونه کړي دي.