پراګ - د پنجاب حکومت هغه رپورټونه رد کړي چې ګواکې د زندانونو وزیر زوار حسین وړایچ د لاهور په کوټ لکپت زندان کې د ترهګرۍ په تور سزا شویو سره لیدلي دي.
د سېپټېمبر پر ۲۹مه، بېلا بېلو پاکستانیو رسنیو خبر ورکړ چې د کوټ لکپت زندان انتظامي مشر خپلو چارواکو ته ویلي چې د زیارت یا پنجشنبې پر ورځ (د سېپټېمبر ۲۷مه)، وړایچ په زور زندان ته ورننوت او هلته یې د ناقانونه ډلو د غړو او د ترهګرۍ په تور له سزا شویو سره ولیدل.
د سېپټېمبر پر ۲۹مه، د پنجاب د اطلاعاتو وزیر فیاض الحسن چوهان مشال راډیو ته وویل، وړایچ په زندان کې د بېقاعدګیو لیدو ته ورغلی وو.
چوهان وايي: "د زندانونو وزیر دا اقدام له قانون سره سم دی. په دې کې ورسره د [جېلونو د ادارې] دوه چارواکي هم ورغلي ول. وزیر ته له کوټ لکپت زندانه شکایتونه ورغلي ول چې د قیدیانو خوراک ډېر خراب دی، ورسره د جېل د عملې رویه سمه نه ده او عام بندیان د ترهګرۍ په تور له نیولو شویو سره ساتل کېږي."
وزیر ته له کوټ لکپت زندانه شکایتونه ورغلي ول چې د قیدیانو خوراک ډېر خراب دی، ورسره د جېل د عملې رویه سمه نه ده
چوهان وايي، اصلاً د جېلونو وزیر زوار حسین وړایچ پر کوټ لکپت زندان چاپه وهلې ده او هلته یې د بې ضابطګیو د ثبوت لپاره "انځورونه اخیستي او ویډیوګانې جوړې کړې دي."
د پوځ پخوانی برېګېډییر سید نذیر وايي، د زندانونو د وزیر اقدام که قانوني هم وي، پکې جېل ته د ورتګ د پروټوکول خلاف ورزي شوې.
نذیر وايي، پر مسلم لیګ (ن) ډلې تور دی چې د وسله والو او سختدریځو، ناقانونه ډلو له کسانو سره یې رابطې دي، نو "که دې وزیر صاحب له ترهګرو سره ملاقات کړی وي" نو کېدای شي چې د تحریک انصاف مشرانو په صوبه کې د "سختدریځو د پلویانو د ووټونو تر لاسه کولو لپاره" دا کار کړی وي.
د نذیر په خبره، په پاکستان کې داسې هڅې روانې دي چې سختدریځي په سیاسي بهیر کې شامل شي، نو کېدای شي چې دا ملاقات د همدې مقصد لپاره شوی وي.
دی زیاتوي، دا کار نورو چارواکو هم کولای شو، "د وزیر ورتګ د حیرانۍ خبره ده."
د پاکستان ډان ورځپاڼه لیکي، د پنجاب د زندانونو د ادارې مشر مرزا شاهد سلیم بېګ د لاهور د کوټ لکپت زندان د مشر شکایت د صوبې د کورنیو چارو تر سېکرټره رسولی او هغه د پېښې د پلټنو امر کړی دی.
