د کډوالو په چارو کې د ملګرو ملتونوعالي کميشنر وايي له پاکستانه د افغان کډوالو ستنېدل په افغانستان کې له دوامدارې سولې سره تړاو لري.
فیلیپو ګرانډي دا خبره د جمعې په ورځ په اسلام اباد کې له پاکستاني چارواکو سره تر کتنې وروسته وکړه.
د کډوالو لپاره د ملګرو ملتونو عالي کمېشنري یا (یو اېن اېچ سي ار) په یوه بیان کې د ګراندي له قوله ویلي چې افغان کډوال به د تل لپاره په پاکستان کې پاتې نشي خو هغه مهال خپل هېواد ته ستنېدلای شي چې په افغانستان کې پراخه سوله او ثبات وي.
د افغانستان د کډوالو او ستنېدونکو چارو د وزارت ویاند حفیظ الله میاخېل مشال راډیو ته د مهاجرينو لپاره د ملګرو ملتونو د عالي کمېشنر خبرې تايید کړي دي.
نوموړي وايي، د افغان کډوالو د دوامداره ادغام لپاره یوه اساسي اړتیا د سولې ټینګښت دی چې افغان حکومت او نړیوال يې لپاره کار کوي.
د ملګرو ملتو د کډوالو چارو کميشنر په داسې حال کې پاکستان ته سفر کړی چې په دې هېواد کې د افغان کډوالو د اوسېدو لپاره ټاکل شوې قانوني موده د روانې سېپټمبر میاشتې په پای کې ختمېږي.
