د شمالي وزير ستان په همزوني سیمه د پوځ لخوا په ډزو د یو تن وژل او اوو نورو د ژوبل کېدو پرضد د اګست پر ۲۵مه د ميرام شاه روغتون مخې ته لسګونه کسانو احتجاجي ناسته دوام لري.
مظاهره کوونکي چې ګن پکې ځوانان وو د وژل شوی کس پر وژنې ذمه وار سرتېري ته د سزا او ټپیانو ته د معاوضه ورکولو غوښتنه کوله.
په سیمه کې د مشال خبریال وايي چې د جمعې پر ورځ دا پېښه هغه وخت رامنځته شوه چې د همزوني د خړ کلي او نورو کليو عام ولس په سیمه کې د پلټنيزو عملياتو پر مهال د نيول شویو کسانو د خوشي کولو ، د اختر پر مهال د ګرځبنديز او ولسي لادرکې شویو پرضد احتجاجي مظاهره کوله.
ويل کېږي چې دا مظاهره کوونکي د لاريون پر مهال د سیمې بېلا بېلو چيک پوستو تيريده دوی چې کله د همزونې سیمې د شنې خوړې پوستې ته ورسیده نو د پوځي سرتېرو سره د مبينه تاو تريخوالي وروسته پرې پوځ ډزې وکړې چې په نتيجه کې يې دا مرګ ژوبله رامنځته شوه.
دوو چارواکو د نوم نه خپرولو په شرط مشال راډيو ته د دې مرګ ژوبلې او احتجاج پخلې کړې خو تر دا مهال د شمالي وزيرستان پوځي او ضلعي انتظامیې په دې اړه څه نه دي ويلي.
په دې اړه پوره رپورټ د غږ په ځای کې اورېدای شئ.
