د ننګرهار چارواکي وایي، نن ( چارشنبه) سهار نهه نیمې بجې چې د جلال اباد ښار پینځمې ناحیې اړوند د پوهنې ریاست په ښاري مدیریت برید شوی و، شاوخوا یوه نیمه بجه پای ته ورسېده.
د ننګرهار ولایت مطبوعاتي مسوول عطاالله خوږیاڼی وایي چې په دغه برید کې لس تنه وژل شوي او لس نور یې ټپیان کړي دي چې اکثره یې د یاد ریاست کارکوونکي دي.
خوږیاڼی زیاتوي چې د پوهنې پر مدیریت درې تنو وسله والو برید کړی و، چې یو یې د امنیتي ځواکونو له لوری په ډوزو وژل شوی او دوه نورو یې ځانونو ته چاودنې ورکړي دي.
تر اوسه هېڅ یوې وسله والې ډلې د دې برید ذمه واري نه ده منلې.
