کوټه - د یکشنبې پر ورځ لسګونه هزاره ګان چې زیاتره یې ښځې او ماشومان دي، د کوټې د خبریالانو مرکز مخې ته ورغونډې شوې او احتجاجي پرلت یې وواهه.
دوی وايي، حکومت دې په کوټې او بلوچستان کې د هزاره ګانو د وژنې مخنیوی وکړي.
د هزاره اېکشن کمېټۍ په نوم د یوې ټولنې مشر لیاقت علي هزاره وویل، دا پرلت اصلاً ښځو وهلی دی چې پکې دوی ورسره ملګري دي او د غوښتنو تر پوره کېدو یې د نه خوړلو هوډ کړی دی.
پرلت ته له هزاره ګانو علاوه نور فعالان هم ورغلي دي. په دوی کې یو ځوان عدنان حسین شادیزي مشال راډیو ته وویل، دوی د پاکستان د پوځ له مشر جنرال قمر جاوېد باجوه څخه د هزاره ګانو د تحفظ غوښتنه کوي.
په وروستیو کې په کوټه کې د هزاره ګانو د هدفي وژنو یو شمېر پېښې شوې دي چې وروستۍ پېښه یې د شنبې پر ورځ شوې چې پکې پر جمال الدین افغاني سړک دوه هزاره سوداګر ووژل شول.
