سوات ـ د جمعيت علمای اسلام (ف) ګوند مشر مولانا فضل الرحمان ويلي چې د اسلامي نظام نفاذ لپاره بايد له تشدده کار وانخيستل شي.
نوموړی چې د خالي پر ورځ سوات ته تللی وو، هلته يې په يوه جلسه کې وویل چې دوی په جمهوريت باور لري او لارښوونه کوي چې ډلې او افراد دې د وسلې پر ځای د انتخاباتو له لارې خپل هدف ته ځان ورسوي.
مولانا زیاته کړه، دوی د ټوپک په زور د مذهب د خورولو طرفداره نه دي او که د دوی د ګوند مرسته نه وای نو د پاکستان پوځ نه شوای کولی چې په ملک کې امن ټینګ ګړي. نوموړي زیاته کړه:
((د وسله وال جنګ سره زموږ هېڅ تعلق نشته او جمیعت علما اسلام په نظریاتي محاذ د وسله وال جنګ مخالفت کړی دی او د هغې ملا یې ماته کړې ده.))
مولانافضل الرحمان وړاندې وویل، د دوی ګوند په پاکستان کې اسلامي نظام خورول غواړي خو دا کار د ووټ په ذریعه کول غواړې، د دې لپاره وسله وال تحریک پیلول نه غواړي.
((موږ د وسله والې جګړې او د طاقت د استعمال طرفداره نه یو. هغه زمانې تېرې شوې چې د ټوپک له لارې به نظامونه بدلېدل او خلک واک ته رسېدل. اوس د تورې او ټوپک ځای ووټ نیولی دی.))
د جمیعت علما اسلام ډلې مشر مولانا فضل رحمان د سوات په مټې سیمه کې خلکو ته د وینا پرمهال د سوات د ولس د قربانیو او کړاوونو یادونه هم وکړه او زیاته یې کړه چې د دې سیمې خلک هم د سولییزه ژوند تېرولو حق لري او پکار ده چې دا حق ورته ورکړل شي.