د افغانستان عامې روغتیا وزارت وايي د کابل په ننني ځانوژونکې برید کې لږ تر لږه ۲۹ کسان وژل شوي او ۵۲ نور ژوبل دي.
داعش وسله والې ډلې ددې برید مسولیت پر غاړه اخېستی دی.
د کورنیو چارو د وزارت مرستیال ویاند نصرت رحیمي ازادۍ رادیو ته وویل چې چاودنه کابل پوهنتون ته نزدې د نوروز جشن لمانځلو پرمهال د خلکو په ګڼه ګوڼه کې شوې ده.
افغان ولسمشر محمد اشرف غني په یوه اعلامیه کې د کابل نننی برید غندلی دی او دا يې د بشریت ضد جنایت بللی دی.
