په پاکستان کې د سېنېټ د نوي مشر او مرستيال مشر د ټاکلو لپاره سياسي هلې ځلې ګړندی شوې دي خو لوی ګوندونوواکمن مسلم ليګ نواز او پيپلز پارټۍ لا هم خپل اميدواران اعلان کړي نه دي.
خو بل خوا تحريک انصاف د سېنېت د نوی مشر او مرستيال مشر لپاره د بلوچستان د وزيراعلی د کانديدانو ملاتړ کړی دی.
د شنبې په مازيګر په اسلام اباد کې د تحريک انصاف له مشر عمران خان سره د خبري غونډې پر مهال د بلوچستان وزيراعلی عبدالقدوس بزنجو وویل چې انوارالحق او صادق سنجراني به د دوی اميدوران وي.
د هغه د دې خبرې په ځواب کې عمران خان وويل چې د ګوند سېنېټران به يې خپل ووټ د بلوچستان د وزيراعلی اميدورانو ته ورکوي.
د بلوچستان وزيراعلی د سېنېټ د نوي مشر لپاره انوارلحق او صادق سنجراني و نومول.
خو د دې هلو ځلو ترتر ټولو مهم لوبغاړی واکمن مسلم ليګ نواز دی خو لا يې هم خپل اميدوران په ډاګه کړي نه دي
البته د دې ګوند د يو مشر مشاهدالله خان د شنبې مازيګر په اسلام اباد کې د خبرې غونډي پر مهال وويل چې نوازشريف به ډېر ژر د اميدوارانو نومونه اعلان کړي.
بل خوا دويم مهم لوبغاړۍ پيپلز ګوند دی چې که يې څه هم د بلوچستان د وزيراعلی ملاتړ اعلان کړی خو غواړي چې له بلوچستانه د دوید خوښې اميدوران و نومول شي.
د پاکستان د سېنېت د غړيو شمېر ۱۰۴ دی چې پکې د چيرمين او مرستيال چيرمين د ټاکلو لپاره د ۵۳ رايو اړتيا وي.
د پاکستان ولسمشر ممنون حسين د دوشنبې پر ورځ د سېنېت غونډه رابللې ده.
سهار به د سېنېت نوي ټاکل شوي ۵۲ غړي سوګند پورته کوي او ماسپښن به د سېنېت د نوي مشر او مرستيال مشر انتخابيږي.
