د لاسرسي ځای

تازه خبر

د افغانستان ملي امنیت عمومي رئیس وايي، پاکستان دا ومنله چې طالبان یې په خاوره کې شته او له هغه ځایه بریدونه پلانوي.

د افغانستان د ملي امنیت عمومي رئیس او د کورنیو چارو وزیر ظاهراً د پاکستان له سفره خوښ او عملي اقداماتو ته یې په تمه دي.

دوی دواړو لوړ پوړو افغان چارواکو د پنجشنبې په ورځ یوې خبرې غونډې ته وویل چې پاکستانيو چارواکو ته یې په دغه هېواد کې د طالبانو او حقاني شبکې د موجودیت په اړه داسې اسناد ورکړي چې په هېڅ وجه انکار ترې نه شي کېدای او باید په وړاندې یې اقدام وکړي.

اوس نو توقع د بحث نه بلکې د اقدام ده

د ملي امنیت عمومي رئیس معصوم ستانکزی وايي، پاکستان د دغه سفر پرمهال له دوی سره ومنله چې طالبان یې په خاوره کې شته او ترهګر بریدونه پلانوي.

ستانکزی: دا ځل اعتراف له ځینو محدودیتونو سره مل و.
ستانکزی: دا ځل اعتراف له ځینو محدودیتونو سره مل و.

نوموړي زیاته کړه:

"غواړم په یوې کلمې کې دا مسئله خلاصه کړم چې په تېر کې انکار وه، خو دا ځل اعتراف له ځینو محدودیتونو سره مل وو، اوس نو توقع د بحث نه بلکې د اقدام ده."

د ملي امینت عمومي رئیس د ازادي راډیو د دې پوښتنې په ځواب کې چې که پاکستان بیا هم همکاري نه کوي او طالبان خپلو بریدونو ته دوام ورکوي نو د دوی نور اقدامات به څه وي وویل چې د پوځي عملیاتو ترڅنګ ځینې اقدامات شته، خو په اړه یې زیات جزئیات ورنه کړل.

د ملي امنیت عمومي رئیس او د کورنیو چارو وزیر ویس احمد برمک په کابل او ځینو ولایتونو کې له خونړیو حملو وروسته د چارشنبې په ورځ اسلام اباد ته تللي ول.

ویس برمک او معصوم ستانکزی پاکستان ته د سفر پرمهال د افغانستان په سفارت کې.
ویس برمک او معصوم ستانکزی پاکستان ته د سفر پرمهال د افغانستان په سفارت کې.

یادې حملې چې تر ټولو خونړۍ هغه یې د تېرې شنبې په ورځ د جمهوریت روغتون ته مخامخ وشوه او ګڼو کسانو ته پکې مرګ ژوبله واوښته طالبانو یې مسؤلیت په غاړه واخیست.

د انټرکانټیننټال پر هوټل حمله چې د بهرنیانو په ګډون پکې ۲۲کسان پکې ووژل شول د افغان حکومت په خبره د حقاني شبکې کار وو.

که څه هم افغان حکومت تل په پاکستان کې د طالبانو، حقاني شبکې او ځینو نورو تروریستي ډلو د امن پټن ځایونو د موجودیت په اړه ويلي، خو دا لومړی ځل دی چې پاکستان پر دې مسئلې اعتراف کوي.

په اسلام اباد کې مرستیال افغان سفیر زردشت شمس د پنجشنبې په ورځ ازادي راډیو ته وویل چې یادو دواړو لوړ پوړو افغان چارواکو په واضح توګه پاکستانیو مشرانو ته د افغان حکومت پیغام بیان کړ.

له دې ټولو سره ـ سره د کورنیو چارو وزیر ویس احمد برمک بیا وايي، تمه ده چې د راتلونکې شنبې په ورځ هغه پاکستانی پلاوی چې کابل ته راځي د افغان حکومت د وروستیو غوښتونو په اړه وروستي معلومات له دوی سره شریک کړي.

ویس احمد برمک
ویس احمد برمک

نوموړي زیاته کړه:

"د پاکستان یو لوړ پوړی پلاوی کابل ته راځي د افغانستان حکومت له لوري یو مشخص سند چې په هغه کې یې غوښتنې مطرح شوي پاکستان ته سپارل شوی کله چې هغوی راغلل د هغه پوښتونو په اړه چې موږ مطرح کړي واضح بحث کېږي او بیا به طبعاً چې د هغې په رڼا کې اقدامات کېږي."

د کورنیو چارو وزیر همدا راز وویل چې اسلام اباد د دواړو هېوادونو ترمنځ د یوه داسې میکانیزم د رامنځته کېدو غوښتنه هم مطرح کړې چې له مخې یې په لوړه کچه د کابل او اسلام اباد ترمنځ استخباراتي معلومات شریک شي.

د پاکستان یو لوړ پوړی پلاوی کابل ته راځي

په ورته وخت کې د ملي امنیت عمومي رئیس معصوم ستانکزی وايي وضعیت په سیمه او نړۍ کې د بدلیدو په حال کې دی او ښايي پاکستان د تروریستانو پر وړاندې د جدي اقداماتو پرته بل انتخاب ونه لري.

راپور: محمد حدیث پردېس

د مشال ویډیوګانې، انځورونه

انځورونه، ویډیوګانې

باجوړي ځوانان له راتلوکيو ټاکنو څه تمه لري؟
تم شئ

هېڅ میډیايي سرچینه اوس نشته

0:00 0:03:25 0:00
تفصیل...
XS
SM
MD
LG