د لاسرسي ځای

تازه خبر

جان سالیوان: خبرو ته د راوستلو لپاره د طالبانو ځپل اړین دي


نیول شوي مشکوک وسله وال
نیول شوي مشکوک وسله وال

د امریکا د بهرنیو چارو د وزارت مرستیال جان سالیوان وايي ، د دې لپاره چې طالبان د سولې خبرو ته کښېني ، باید د هغوي مالي سرچینې او جنګي صلاحیت له مینځه یوړل شي.

جان سالیوان دا خبرې د جنورۍ پر ۱۹مه نېټه د افغانستان په اړه د ملګرو ملتونو د امنیت شورا غونډې ته په وینا کې کړې دي.

دې غونډې ته د افغانستان د بهرنیو چارو د وزارت مرستیالحکمت خلیل کرزي ویلي چې اوس ټولو ته ښکاره شوې ده چې د ترهګرۍ خوندي پناځایونه چیرته دي.

په ملګرو ملتونو کې د پاکستان استازې ملیحې لودهي هم وینا کړې ده او ویلي یې دي چې د افغانستان د ستونزې هواری باید له سیاسي لارې وشي.

د ملګرو ملتونو سرمنشې اینتونیو ګوتریس بیا ټینګار کړی چې په سیمه کې له ترهګرۍ سره مبارزه یوازې د افغانستان ذمه واري نه ده.

دا په داسې حال کې ده چې د ملګرو ملتونو د امنیت شورا د جنورۍ پر ۱۹مه د افغانستان د وضیعت او بدلونونو په اړه ځانګړې غونډه وکړه.

په افغانستان کې د روانې جګړې له کبله نه یوازې د کابل او اسلام اباد اړیکې په دې وروستیو کې لا پسې کړکېچنې شوې دي بلکې د اسلام اباد او واشنګټن ترمنځ هم په اړیکو کې تاوتریخوالی رامنځ ته شوی دی.

د افغانستان حکومت تېره اونۍ د ملګرو ملتونو د امنیت شورا پلاوي ته ویلي چې پر پاکستان باید فشار ته دوام ورکړل شي چې د دوی په وینا په افغانستان کې له لاسوهنې ډډه وکړي.

دا خبره په یاد پلاوي کې شاملې په ملګرو ملتونو کې د امریکا سفیرې نیکي هېلي هم نیویارک ته له ستنېدو وروسته خبریالانو ته کړې ده.

نوموړې ویلي چې دوی پاکستاني مشرتابه ته په ډاګه کړې چې په افغانستان کې د حکومت پرضد جنګېدونکو وسله والو ډلو ته دې پر خپله خاوره له پټنځایونو ورکولو ډډه وکړي.

خو د نیکي هېلي په وینا ، پاکستان خپل دې کار ته دوام ورکړی دی او له هم دې کبله امریکايي حکومت ورباندې مرستې بندې کړې دي.

پاکستان د افغانستان او امریکا دا تور ردوي چې ګواکې پر خپله خاوره یې ترهګرو ته پټنځایونه ورکړي دي.

د پاکستان حکومت او پوځ وايي دوی په خپله د ترهګرۍ ښکار دي او د ترهګرۍ ضد جګړه کې یې په مجموعي توګه په زرګونه ولس وګړي او امنیتي عسکر وژل شوي او پراخ مالي زیان ور اوښتی دی.

XS
SM
MD
LG