د لاسرسي ځای

تازه خبر

په خوست کې د امنيتي ادارو ګډ ګارنيزون جوړ شو


دې ګارنيزون کې ملي اردو، ملي پوليس او نظامي پوليس شامل دي

د جنورۍ په ۱۷مه د افغانستان په خوست ولايت کې د امنیت د ښه کیدو او جنايي پېښو د مخینوي لپاره د مېشتو امنیتي ارګانونو څخه جوړ شوي پوځي ګارنیزیون خپل مشترک پوځي فعالیتونه پیل کړل.

چارواکي وايي دا نوی شريک ځواک به په ګډه خوست ښار او نورو ګڼ مېشتو سیمو کې امنیت خوندي کړي او همدارنګه د وسلوالو غلاوو، سړي تښتونو او د نشه يي توکو د کاروبار مخه به ونیسي.

د دې ګارنېزيون په استازيتوب، الله محمد احمدزي مشال راډيو ته نن وويل چې په ښار کې د تورو شيشو موټرو په واسطه په مبيينه توګه جنايتونه کېږي چې دوی به يې دا ښيښې سپينوي. احمدزي له خلکو وغوښتل چې ښار ته دې د تورو شیشو لرونکو ګاډو، ناقانونه وسلې او پوځي یونفورم سره نه داخلیږي.

لومړی بريدمن الله محمد احمدزی
لومړی بريدمن الله محمد احمدزی

لومړی څارن مبارز چې په ګارنیزیون کې د پولیسو د منسوبینو استازیتوب کوي وايي، چې د خوست د پوځي ادارو ګډ ګارنیزیون به دایمي وي او پدې سره به د غلو، سړي تښتونکو او نورو قانون ماتونکو مخه ونیول شي.

د خوست ځينو ښاريانو مشال راډيو سره خبرو کې پر امنيتي چارواکو نیوکه کړې چې دوی د قانون ماتونکو پر خلاف توپیري چلند کوي او پېسو يا سفارش لرونکو ته سزا نه ورکول کېږي. مشال راډيو سره خبرو کې، د خوست دوه تنه ښاریانو ستوري سروري او دین ولي له امنیتي ادارو وغوښتل چې د دې مسلې حل دې راوباسي.

بلخوا امنيتي چارواکو ويلي چې د دوی هلې ځلې به د خلکو له مرستې بغير کاميابه نه شي. دوی له خلکو غوښتي چې د مشکوکو فعاليتونو دې يې خبر کړي.

په همدې حال کې د خوست چارواکي نن سهار د یادو ځواکونو لخوا یو موټر بم هم هدف تر رسیدو مخکې ونیول شو او په دې توګه د لوی زيان مخنيوی وشو. په صرف ډوله موټر کې د الوتکې پنځه سوه کیلويي لوی بم ځای پر ځای شوی وو.

XS
SM
MD
LG