د لاسرسي ځای

تازه خبر

کابل کې وسله وال برید ۴۰ تنه وژلي ۳۰ ژوبل


افغان امنیتي ځواکونه د پېښې ځای ته ورغلي

کابل - چارواکي وايي، د کابل په قلعه ناظر سیمه کې وسله وال برید شوی چې پکې لسګونه کسان وژل شوي او ژوبل دي. دوی وايي، پېښه د تبیان په نوم په یوه سیاسي او فرهنګي مرکز کې شوې چې له صدای افغان خبري اژانس پورې اړوند دی.

د افغانستان د کورنیو چارو وزارت وايي، دا ځانمرګي برید د پنجشنبې پر سهار شاوخوا لس نیمې بجې شوی چې له امله‌ يې زیات زیان اوښتي، خو د وژل شویو او ژوبلو کره شمېر نه دی معلوم.

د ځانمرګي برید ځای
د ځانمرګي برید ځای

د دې وزارت مرستیال ویاند نصرت رحیمي مشال راډيو ته وویل چې تر لومړي برید وروسته په سیمه کې دوه نورې چاودنې هم شوې دي.

د کابل د امنیه قومندانۍ ویاند بصیر مجاهد هم پېښه تاييدوي، خو وايي په اړه‌ يې نور معلومات نه‌ لري.

د افغانستان د عامې روغتیا وزارت وايي، تر دې دمه روغتونونو ته پينځه وژل شوي او ۲۱ تنه ټيپان وروړل شوي دي.

خو د صدای افغان اژانس د دفتر مشر سید حسن حسیني مشال راډيو ته وویل نننی ځانمرګي برید چې د دوی دفتر ته نېږدې شوی، پکې شاوخوا ۴۰ تنه وژل شوي او ۳۰ تنه ټپيان دي.

هغه وویل چې د دوی د دفتر په پاسني پوړ کې یو فرهنګي پروګرام پیل وو چې پکې ځانمرګې حمله وشوه.

د دې حملې ذمه واري داعش منلې ده.

د روانې اوونۍ د دوشنبې په ورځ د کابل په ششدرک سیمه کې یوه ځانمرګي برید چې ذمه واري يې داعش ډلې منلې، شپږ تنه وژلي او پینځه یې ټپيان کړي ول.

ستاسې نظر

تبصرې ښکاره کړئ

XS
SM
MD
LG