عبدالصمد خان اڅکزي ته د درناوي وړاندې کولو ځانګړې غونډه نن په کوټه کې ترسره کېږي چې د پښتونخوا ملي عوامي ګوند مشر محمود خان اڅکزی د یاد ګوند نور مشران ویناوې کوي.
دې غونډې ته د پاکستان پخوانی وزیراعظم او د مسلم لیګ نون ډلې مشر نواز شریف هم ور بلل شوی دی.
عبدالصمد خان اڅکزی د ۱۹۰۷م کال د جولايي پر ۷مه نېټه د قلعه عبدالله ضلعې په ګلستان سیمه کې زږېدلی وو اود ۱۹۷۲م کال د ډسمبر پر ۲مه نېټه په کوټه کې په خپل کور کې په بمي برید کې وژل شوی وو.
نوموړي ټول عمر د پښتنو د خپلواکۍ لپاره په مبارزه تېر کړی وو او تر وژل کېدو وروسته په خان شهید مشهور شو.
د پښتونخوا ملي عوامي ګوند بنسټ اېښودونکي او د محمود خان اڅکزي پلار خان شهید عبدالصمد خان اڅکزي د خپل ۶۵ کلن ژوند شاوخوا نیمه برخه د فرنګي او بیا پاکستان په زندان کې تېره کړې وه.
نوموړي په خپل ژوند کې د سیاسي مبارزې تر څنګ د پښتو ادب او صحافت په برخه کې هم د پام وړ او اساسي کار کړی وو.
