د لاسرسي ځای

پاکستان هند ته په ماتې ورکولو سره د ۲۰۱۷ م کال « ای سي سي چېمپېنز ټرافي » په خپل نوم کړه. د پاکستان وزیراعظم نوازشریف، د پوځ مشر جنرال قمر جاوید باجوه او د اکثرو سیاسي ګوندونو مشرانو د کرکټ لوبډلې ته په دې بریا مبارکي ویلي ده.

د یکشنبې په ورځ د هند او پاکستان لوبډلې د لندن په اوول لوبغالي کې د یو بل پرضد میدان ته ووتل. د لوبې پچه هند وګټله او پاکستان ته یې لومړی د بېټېنګ کولو بلنه ورکړه. پاکستان په ټاکلو ۵۰ اورونو کې د ۴ لوبغاو په زیان ۳۳۸ منډې جوړې کړې چې پکې د پښتون لوبغاړي فخرزمان ۱۱۴ منډې هم شاملې وې.

د هند د لوبډلې مینه وال د فاینل لوبې ننداره کوي
د هند د لوبډلې مینه وال د فاینل لوبې ننداره کوي

د هند لوبډله نن نه په بالنګ او نه هم په بیټنګ کې وځلېدله. د دوی لوبغاړي د دې باوجود چې د ښه بیټنګ کولو لپاره مشهور دي، یو په بل پسې د پاکستان د بالرانو په وړاندې اوټ شول. د هند له غاړې یواځې HH Pandya ښه بیټنګ وکړ او ۷۶ منډې یې جوړې کړې. د هند لوبډله په ۳۱ م اور کې په ۱۵۸ منډو وسوځېده او په دې توګه پاکستان دا لوبه په ۱۸۰ منډو سره وګټله.

د کاټلنګ خیبر پښتونخوا سره تړاو لرونکی پښتون لوبغاړی فخرزمان د لوبې غوره لوبغاړی وټاکل شو.

د پاکستان د کرکټ لوبډلې کپتان سرفراز احمد د ايي سي سي چمپینز ټرافي په ګټلو پاکستاني ملت ته مبارکي ورکړېده. نوموړې د ټرافۍ ترلاسه کولو پر مهال وویل، « موږ یواځې د بري لپاره جنګېدلو او لوبه مو وګټله. »

که یو پلو پاکستان کې د کرکټ په دې بریا خوښۍ لمانځل کېږي، اخوا په هند کې بیا د کرکټ مینه وال د خپلې لوبډلې په ماتې خپه دي. دا بېله خبره ده چې کپتان ویرات کوهلي د پاکستان لوبډلې ته د جایزو د وېش په غونډه کې روایتي مبارکي وویله او د هغوی د لوبې ستاینه یې وکړه.

د پاکستان ولسمشر ممنون حسین هم د کرکټ لوبډلې په بریا ملت ته مبارکي ورکړېده. له یوې اوږدې مودې وروسته پاکستان داسې کومه لویه ټرافي په خپل نوم کړېده.

ستاسې نظر

تبصرې ښکاره کړئ

XS
SM
MD
LG