ګلبدین حکمتیار د پنجشنبې په ورځ کابل کې یوې خبري ناستې ته وویل، د جمهوري ریاست، د ولسوالیو او ولایتي شوراګانو جلا-جلا انتخابات، ډېر لګښت غواړي او ستونزمن به هم وي.
نوموړي وویل:
"دا سیسټم باید بدل شي، چاره یې دا ده چې موږ د متناسب تمثیل پر بنسټ انتخابات ولرو، یعنې یو ځل انتخابات. په پنځو کلونو کې یوځل له خلکو وغوښتل شي چې خپلې رأیې په صندقونو کې واچوي. د ده رأیه باید د جمهور رئيس، د ولسي جرګې د غړیو، د ولایتي او ولسوالیو د شوراګانو د غړو او حتی د والي په ټاکلو کې اغېز ولري."
حکمتیار وویل،خپله دغه غوښتنه به د ټاکنو له خپلواک کمېسیون او د ملي تفاهم له غونډې سره شریکه کړي.
ده دا هم وویل، د ولسي جرګې په راتلونکو ټاکنو کې به برخه واخلي خو د جمهوري ریاست په انتخاباتو کې د خپل داسې یوه کاندید ترڅنګ ودرېږي چې کورني او بهرني ملاتړ ولري او خلکو ته خدمت وکړي.
نوموړي د موجوده ولسي جرګې د غړیو د انتخاباتو د څرنګوالي په هکله هم نظر ورکړ او ټنیګار یې وکړ چې کاندیدان باید د زور او پیسو له لارې ولسي جرګې ته لاره و نه مومي.
د ګلبدین حکمتیار په مشرۍ د افغانستان حزباسلامي ګوند په تېرو کلونو کې د حکومت له مخالفنیو څخه و، خو تېر کال یې له حکومت سره تفاهملیک لاسلیک کړ او د سولې له بهیر سره یو ځای شو.
حکمتیار شااوخوا یوه نیمه میاشت مخکې کابل ته راغی او د ګوند غړیو یې هم د شوي تفاهملیک له مخې حکومت سره له مخالفته لاس واخېست.
د انتخاباتو خپلواک کمېسیون د حکمتیار د څرګندونو په اړه وايي، د هېواد راتلونکي انتخابات، د انتخاباتو له قانون سره سم ترسره کېږي.
د دغه کمېسیون ویاند ګلاجان عبدالبدیع صیاد مشال راډیو ته وویل:
"د ټاکنو خپلواک کمېسیون مکلف دی چې قانون پلی کړي او دولت هم باید دا کار وکړي. انتخابات چې په پام کې دي ترسره شي هغه د ولسوالیو د شوراګانو او ولسي جرګې انتخابات دي. خو کوم انتخابات چې هغوی یې غواړي هغه د ولایتي شوراګانو او د جمهوري ریاست انتخابات دې چې د قانون له مخې ورته وخت پاتې دی. نو له دې امله له وخته دمخه انتخابات نه شو ترسره کولی."
صیاد وايي، دوی ته هغه وخت د حزباسلامي طرحې د منلو دي چې حکومت یې ومني او د انتخاباتو په قانون کې بدلون راولي.
ګلبدین حکمتیار په داسې حال کې د راتلونکو انتخاباتو پر شفافیت ټینګار کوي چې د افغانستان ولسمشر اشرف غني د کابل پروسې په ناسته کې د ولسي جرګې د انتخاباتو پر شفافیت خبرې کړي او ټنیګار یې کړی چې د جمهوري ریاست انتخابات به په ټاکلي وخت وشي.
راپور: خان محمد سیند
