د خېبر پښتونخوا حکومت دترهه ګرۍ او قدرتي افتونو اغېزمنو سيمو کې کانټينر سکولونو روانه منصوبه درولې ده.
صوبايی حکومت دا منصوبه پروسږ کال پیل کړې وه.
د خېبر پښتونخوا د اېليمنټري اېنډ سېکېنډري اېجوکېشن محکمې د مطبوعاتو سلاکار نجيع الله خټک د چارشنبې په ورځ مشال راډیو ته وويل چې په صوبه کې خراب امنيت او موسم له وجې دا منصوبه ختمه کړل شوه.
دده په وينا د نړيوال بانک په مرسته يې ازمويښتي پروژه پيل کړه وه چې يو سکول يې په لکي مروت کې جوړ کړی وو.
خو دده په خبره د جاج تر اخستو وروسته وليدل شو چې د امنيتي ستونزو او خراب امنيت له وجې دا منصوبه پر مخ وړل ممکنه نه ده.
نجيع الله خټک زياته کړه نړيوال بانک جوړ سکول د جاج لپاره صوبايي حکومت ته حواله کړ او هغه بيا پاکستان انجېنېرنګ کونسل، انجېنېرنګ پوهنتون او سي اېن ډبليو محمکې ته وويل چې د سکول د کېفيت او ظرفيت جاج دې واخلي.
نوموړي په وينا دغو ادارو ورته وويل چې يو خو دغه کانټينر سکول ګرم وي او بل دا چې د امنيت له پلوه هم خوندي نه وي.
د کانټينر سکولونو پروژې ته د سمارټ پروژې نوم ورکړل شوی وو چې له مخې به يې دوه سوه سکولونه جوړېدل.
د منصوبې د لګښت اټکل دوه اربه روپۍ لګول شوی وو.
د صوبې تعليم څانګه وايي، دا پېسې به اوس د زدکړو په برخه کې پر نورو کارونو لګول کېږي.
د خېبر پښتونخوا د تعليم حانګه وايي، په صوبه کې داوخت ۳۰ زره سکولونه دي.
د شوونځيو د څار يوه غيره حکومتي اداره انډيپنډنټ مانېټرنګ يونټ وايي، د صوبې ۳۵ فيصده سکولونه د بجلۍ، ۲۵فيصده پاکو اوبو او۱۲فېصده د تشناب اسانتيا او ۱۱ فيصده چار ديواري نه لري۔
