افغان حکومت یوه چارواکي چې نه یې غوښتل نوم یې واخیستل شي ازادي راډیو ته تایید کړه چې د قطر په مرکز کې د افغان حکومت استازیو له طالبانو سره خبرې کړې دي.
دا خبر تر دې مخکې ګارډین ورځپاڼې افشا کړې او څرګنده یې کړه چې د غبرګولې میاشتې له دوهمې نېټې راپه دې خوا چې د طالبانو مشر ملا اختر محمد منصور په پاکستان کې د امریکا د بې پیلوټه الوتکې په برید کې ووژل شو دا لومړی ځل دی چې دواړه خواوې مخامخ خبرو ه سره کېني.
د ورځپاڼې په وینا دا خبرې شاوخوا دوې اوونۍ مخکې او تېره میاشت ترسره شوې دي او پکې د طالبانو د پخواني مشر ملا محمد عمر ورور ملا عبدالمنان اخند برخه اخیستې ده.
د طالبانو د ملا محمد رسول د ډلې مرستیال ملا عبدالمنان نیازي هم ازادي راډیو ته وویل چې دا خبرې شوې دي، خو دی وایي چې د دوی ډله پکې نه وه:
"کومې منابع چې موږ په کوټه او پېښور کې لرو دا مذاکرات له څو ورځو راهیسې د عبدالمنان په مشرۍ روان دي، دا خبرې له امریکایانو سره هم شوي او د افغانستان له حکومت سره هم شوي دي."
ګارډین د طالبانو په وینا وایي چې د قطر په مرکز کې د سپټمبر په لومړیو کې په دوستانه فضا کې خبرې وشوې او په هغې کې د ملا محمد عمر ورور ملا عبدالمنان اخند د افغانستان د ملي امنیت له عمومي رئیس معصوم ستانکزي سره مخامخ خبرې وکړې.
د کوټې شورا یوه غړي ګارډین ورځپاڼې ته ویلي دي چې طالبان په دې باور دي چې د افغانستان مسئاله درې غاړې لري، امریکا، افغان حکومت او طالبان او که چېرته دغه درې سره خواوې خپلو غونډو ته دوام ورکړي په راتلونکې کې به مثبت پرمختګ رامنځته شي.
د کوټې د شورا غړي دا خبره هم وکړه چې ملا عبدالمنان اخند د دوی د شورا له لورې د دې لپاره قطر ته استول شوی دی چې دا خبرې مهمې دي او د ملا منان ګډون په دې خبرو کې دا معنی لري چې د طالبانو سیاسي او پوځي حضور په دې خبرو کې موجود وي.
د راپور له مخې د قطر په غونډو کې پاکستان برخه نه لرله، ګارډین د یوه غربي مسؤل په وینا وایي چې په پاکستان کې په وروستیو کې د طالبانو یو شمېر چارواکي ونیول شول او په دې ډول د پاکستان د استخباراتو شبکې غواړي چې یو ځل بیا د سولې پر خبرو خپل کنټرول ولري.
دوحه له نږدې درې کلونو راهیسې د طالبانو د ډیپلوماسۍ په مرکز بدله شوې ده او هلته طالبانو خپل غیر رسمي دفتر پرانیستی دی.
شاوخوا لس ورځې مخکې ملا عبدالمنان نانی په کوټه کې ونیول شو، دی د طالبانو د شورا مالي مسؤل و.
تر ملا ناني مخکې ملا صمد ثاني چې د طالبانو لپاره د مرستو د جلبولو مسؤل و په کوټه کې نیول شوی و.
افغان ولسمشر ته یوه نږدې کس ګارډین ته ویلي دي چې په پاکستان کې نیول شوي کسان د ملا منصور خلک دي او دوی پر پاکستان شکمن شوي دي چې د ملا منصور په قتل کې یې لاس درلود.
د ګارډین ورځپاڼې په باور د قطر د سولې له خبرو سره به د ملا محمد عمر زوی محمد یعقوب هم یوځای شي.
تر دامهاله افغان حکومت او وسله والو طالبانو په رسمي ډول ددې لیدنې په اړه څه نه دي ویلي.
