دوی چې د شنبې په ورځ مشال راډیو سره خبرې کولې ټېنګار لاره چې د افغانستان په روانو سیاسي او امنیتي حالاتو کې د سولې د ټېنګیدو او د نظام د ثبات لپاره د یو شخص او ډلې مثبته ونډه هم بې اغیزې نشي باتې کیدای.
د تړون اونیزې مسوول مدیر سپین روان نورزي وویل، د افغان حکومت سره د حکمتیار ممکنه یو ځای کېدل سولې ته د نورو وسلوالو ډلو د هڅونې او د جګړې د کمیدو لامل کیږي.
دی وايي، کچیرې دا ډله د نظام سره له یو ځای کېدو وروسته په رښتیني ډول سولې او نظام ته کار وکړي، نو هڅې به يې تر ډېره ګټورې تمامې شي.
سپین روان نورزی زیاتوي:
((د حکمتيار په مشرۍ د حزب اسلامي وسله والې ناراضه ډلې راتګ د طالبانو په ګډون نورې مخالفې وسله والې ډلې هم د سولې بهير ته مايلوي، د حکمتيار راتګ به د افغان دولت لپاره هغه مهال موثر تمام شي چې ښاغلى حکمتيار له نظام سره له يو ځاى کېدو وروسته په رښتيني ډول د حکومت د سياسي استحکام او د امنيت د ټينګولو لپاره کار وکړي.))
د افغانستان د سولې عالي شورا ویلي، چې د افغان حکومت او حکمتیار په مشرۍ د حزب اسلامي ترمنځ به د سولې چمتو کړی سند په راتلونکو دوه درې ورځو کې لاسلیک شي.
مدني فعال خوشال حسن د افغان حکومت او حکمتیار د ډلې د سولې اغېزو ته خوشبینه دی:
((د حکمتیار په راتګ سره په افغانستان کې د سولې پروسه چټکه شي او هغه مخالفین چې د دولت سره په وسلواله جګړه بوخت دي، هغوی به هم سولې ته وهڅیږي، د مخالفینو د جګړې صفونه به ړنګ شي، د حکمتیار له راتګ سره په نظام کې هغه داخلي کشمکشونه چې اوس په نظر کې راځي، د دې کچه به راکمه شي.))
مدني فعال صاحب ګل فرهاد وايي، چې د حزب اسلامي د وسلوالې برخې هغه ډلې چې عقیدوي رنګ يې اخیستی، هغه به نظام سره په یو ځای کیدو کې د حکمتیار ملګرتیا ونکړي، بلکې د افغان حکومت پر ضد د نورو جنګیدونکو وسلوالو ډلو سره به یو ځای شي.
د خوست یو تن ځوان ادم خان لاریون د افغان حکومت سره د حزب اسلامي د مخالف وسلوال لوري يو ځای کېدل پدې ګټور بولي، چې په ځینو سیمو کې د حزب اسلامي او طالبانو خپلمنځي جګړو هم سیمې نا امنه کړي او افغان حکومت يې په یو ډول بوخت ساتلی دی.
د سیاسي چارو کارپوه او د خوست د ولایتي شورا غړی امیرالله زړه سواند د افغانستان په روانو شرایطو کې له نظام او سولې سره د مخالفو مطرحو شخصیتونو او ډلو یو ځای کېدل له اغېزې خالي نه بولي.
امیرالله زړه سواند زیاتوي:
((د افغانستان په اوسنیو حالاتو کې هر افغان ته ضرورت دی، چې په شته سیاسي او پوځي حالاتو کې داسې رغنده رول ولوبوي چې د خپل وس سره سم پدې حالاتو کې مثبت تغیر راشي، نو ځکه موږ د یو شخص رول هم نه نفي کوو، ځکه هر شخص تر یوه حده څه کولای شي، نو د حزب اسلامي یو ځای کېدل په اوسنیو شرایطو کې بې تاثیره پاتې کیدای نشي.))
ویل کیږي چې د حکمتیار په مشرۍ د حزب اسلامي او د افغان حکومت ترمنځ د سولې له خبرو څخه د جمعیت اسلامي د اجرایوی رییس عطا محمد نور وروستي ملاتړ د دواړو لوریو پر وړاندې شته ستونزې کمې کړې دي.
د ځنو سرچینو د مالوماتو لهمخې دا مهال د افغان حکومت له لوري په کابل کې د ګلبیدن حکمتیار راتګ ته چمتوالی روان دی او په کابل ښار کې امنیتي تدابیر هم ډېر شوي دي.
