کابل - د افغانستان حکومت او ملګرو ملتونو له هغو بې کوره شوو افغان کډوالو سره د ژمي مرستې پیل کړې دي چې د هیواد په سړو سیمو کې ژوند کوي.
افغان چارواکي وايي چې د دې کډوالو شمېر شاوخوا دوه لکه ۲۵ زره دی چې ورته به کمبلي، جامې او د سونګ مواد وېل کېږي.
د افغانستان لپاره د ملګرو ملتو د کډوالو د چارو د ادارې مشر بو شاک د چهارشنبې په ورځ د دې مرستو د پیل پر مهال وویل، موږ هیله او باور لرو چې دغه پروګرام به د ژمي په ترڅ کې د هغو بې ځایه شوو کسانو د ستونزو مخه تر یوه بریده ونیسي.
د ملګرو ملتو د کډوالو د چارو اداره اټکل کوي چې اوس په افغانستان کې د ټولو بې ځایه شویو شمیر تر اووه لکه اتیا زره زیات شوی دی. تیرکال دا شمېر شاوخوا یو لک ۳۰ زره وو.
