د پاکستان وزیراعظم نواز شریف په پنجاب او د پاکستان تر واک لاندې کشمیر کې د بارانونو له کبله پر مرګ ژوبلې د خپګان څرګندونه کړې ده.
د مشال راډيو خبریال وايي، وزیراعظم له قدرتي ناورینونو سره د مبارزې ملي ادارې ته ویلي دي چې په سمدستي ډول په ځپل شویو سیمو کې خلکو ته مرستې ورسوي.
له قدرتي افتونو سره د مبارزې قامي اداره وايي، د پشکال بارانونو له کبله د پنجاب په لاهور، سیالکوټ او ګجراواله او د کشمیر په باغ، راولا کوټ او کوټلي کې د کورونو د چتونو او دېوالونو نړېدو په پېښو کې لږ تر لږه ۴۰ کسان وژل شوي دي.
د موسمیاتو اداره وايي، د بارانونو له کبله د چناب په سیند کې د ډېرې لویې درجې سېلاو دی. اداره زیاتوي، بارانونه به له دوو تر درو ورځو پورې روان وي.