د امریکا د بهرنیو چارو د وزارت یو ویاند ویلي، جان کېري به په کابل کې د افغانستان د ولسمشرۍ د څوکۍ له دوو کاندیدانو اشرف غني احمدزي او عبدالله عبدالله سره وګوري. د جیف راتکي په وینا جان کېري به همدا رنګه د ولسمشرحامد کرزي سره هم خبرې اترې وکړي.
د امریکا د بهرنیو چارو وزیرجان کري د افغانستان د انتخاباتو پر سر د راپورته شوي کړکیچ د هواري لپاره تیره شپه ناوخته کابل ته رسیدلی دی.
په افغانستان کې انتخاباتي ناندري وروسته له هغې راپورته شوې چې د عبدالله عبدالله په مشرۍ د اصلاحاتو او همپالنې انتخاباتي ټیم د درغلیو ادعا وکړه او لومړنیو نتایجو د اعلان مخالفت یې وکړ.
جان کېري تردې مخکې په چین کې ویلي و، که څه هم دوی د افغانستان د انتخاباتو له کبله راپورته شوي کړکیچ ته جدي اندېښنه لري، خو ډیرهیلمن دی چې په څو ورځو کې به دې اختلافاتو ته د هواري یوه لاره پیدا شي.
