کابل - د افغانستان په پلازمېنه کابل کې یو بهرنی خبریال وژل شوی دی.
چارواکي وايي، نیلس هارنر د کابل ښار په مرکز کې له یو لبناني رستوران سره نېږدې په سر په مرمۍ وویشتل شو.
د دوی په خبره، هارنز تر ژوبلېدو وروسته په روغتون کې مړ شو.
د کابل پولیسو جنايي پلټنو څانګې مشر سید ګل اغا هاشمي وايي، د پېښې په تړاو یې دوه مشکوک کسان نیولي دي.
د خبریال د وژنې لامل لا نه دی جوت شوی.
وسله والو طالبانو له دې پېښې سره لاتعلقي ښودلې ده او ویلي یې دي چې د خبریال وژنې پړه نه مني.
د سویډنۍ راډیو مشر سیلا بېنکو ویلي، هارنر یو ډېر تکړه خبریال وو. د ده په خبره، هارنر به د اسیا او منځني ختیځ چارو په اړه رپورټونه جوړول.
په کابل کې د سویډن سفارت وايي، نوموړي د سویډن او برتانیې تابعیت درلود.
د خبریالانو ساتنې نړیواله ټولنه وايي، افغانستان د نړۍ له هغو هیوادونو یو دی چې پکې د خبریالانو ژوند ته له مختلفو خواو ګواښونه ولاړېږي.
