اسلام اباد - د پاکستان پخوانی پوځي ولسمشر پروېز مشرف د امنیتي وجوهاتو له کبله د سې شنبې پر ورځ ځانګړي عدالت ته حاضر نشو.
عدالت نوموړي ته امر وکړ چې د جمعې پر ورځ دې عدالت ته حاضر شي.
پر پروېز مشرف له پاکستان سره د خیانت تور دی.
تر دې وړاندې د پاکستان کورنیو چارو وزارت د اسلام اباد او راولپېنډۍ پولیسو ته د امنیت ټینګولو امر کړی وو.
د کورنیو چارو وزارت وايي، القاعده او طالبان پر پروېز مشرف په عدالت کې برید کولای شي.
که پر مشرف له هیواد سره د غدارۍ تور زبات شو نو د ټول عمر په بند یا اعدام محکومېدای شي.
ځانګړی عدالت د قاضي فیصل عرب په مشرۍ جوړ دی او درې کسیزه جرګګۍ لري.
دا عدالت له میاشتو راهیسې د پروېز مشرف مقدمې اورېدنه کوي خو نوموړی ورته ډېر کم حاضر شوی دی.
د سې شنبې ورځې اورېدنې پر وخت د پروېز مشرف ځینې پلویان هم د ځانګړي عدالت مخې ته ورغونډ شوي ول.
دې کسانو په لاسونو کې بورډونه نیولي ول او د مشرف د مقدمې د سمې او منصفانه اورېدنې غوښتنه یې کوله.
