امريکايي ورځپاڼې وال سټريټ جرنل د واشنګټن لپاره د پاکستان د پخواني سفير حسين حقاني مقالې ته (( د اړيکو ختميدل يو ډير مشکل کار نه دی)) نوم ورکړی دی.
په مقاله کې ليکوال د پاکستان او امريکا د اړيکو جاج اخلي.
مقاله وايې، پر ځای د دې چې دواړو هيوادونه خپلې نه ختميدونکې جګړې ته دوام ورکړي بايد ومني چې د دوی ګټې له يو بل سره داسې سمون نه خوري چې په نتيجه کې د يو بل ښه ټينګ ملګري جوړ شي.
ليکوال زياتوي، که چرته امريکا له يوه تصوراتي ملګرتيا لاس واخلي نو دا به واشنګټن آزاد کړي چې په جنوبي ايشياء کې د خپلو ګټو د پر مخ وړلو په لړ کې نورې لارې و لټوي.
هم دا شان د ليکوال په خبره، دا به پاکستان ته د خپلو سميه ییزه خواهشاتو د ترلاسه کولو لپاره لاره خلاصه کړي چې يا خو به په کې د تل لپاره سم کامياب شي او يا بيا غالب امکان دا دی، چې دا به پاکستاني چارواکو ته د خپل هيواد د طاقت د حدونو د ټاکلو سبق ورزده کړي.
د حسين حقاني په وينا، د واشنګټن لپاره له پاکستان سره د اړيکو په نرمه توګه تنظيمول يو ګران کار دی.
ليکوال وايې، امريکا له څو لسيزو راهیسې غواړي، د پاکستان له هند سره د سيالۍ او په افغانستان کې د نفوذ ساتلو سټرټيجک توجه بدله کړي او اسلام آباد دې خپله توجه د هيواد پرمختګ او د کورني امنيت د ساتلو پر لور واړوي.
خو د دې سربيره هم پاکستان په خپله رويه کې بدلون نه دی راوستۍ او له پوځي او معاشي پلوه يې پر امريکا تکيه کولو ته دوام ورکړی.
د حسين حقاني په خبره دواړه هيوادونه پر يو بل د لانجمن ملګري تور لګوي چې د ده په وينا د دواړو سوچ پر خپل ځای سم دی.
پاکستان سوچ کوي چې امريکا هر څه ورباندې په زوره مني او واشنګټن بيا فکر کوي چې د پاکستان له جوړيدو راهيسې يې دې هيواد ته څلويشت اربه ډالره ورکړي خو اسلام آباد د دوی دا احسان نه مني.
افغان سیاستوالو پر امریکا د زغم ښودلو غږ کړی
بلخوا وال سټريټ جرنل يو رپورټ خپور کړی دی، چې وايي، د افغان حکومت مخالفه ډلو پر واشنګټن زور ورکړی دی چې د ولسمشر حامد کرزي پر هغه خبره دې سخت ردعمل نه څرګندوي چې ويلي وو طالبان او امريکا له يو بل سره پټه همکاري کوي.د حکومت مخالفې ډلې يو مشر احمد ضياء مسعود د پنجشنبې پر ورځ ويلي، چې امريکا بايد د افغانستان د خلکو په خاطر د حامد کرزي د بيان په اړه له زغمه کار واخلي او پکار ده د هغه يوه خبره هم سنجیده وانخلي.
خو د ورځپاڼي په وينا د حامد کرزي وياند ايمل فيضي بيا د مخالفه ډلو تنقيد رد کړی دی. د ده وينا دغه کسان داسې حالات د ځان په ګټه استعمالوي او د ده په خبره د دې دا معنی نه ده چې ګواکې دوی د ټول ملت استازيتوب کوي.
ايمل فيضي زياته کړه ، حامد کرزی خبر وو چې داسې څرګندوني به غوسه راپاروي خو بيا یې هم د کولو فيصله وکړه دا ځکه چې ولسمشر احساس کړه چې د بندو دروازو شاته چې دی د لويديځ مشرانو ته کوم شکايتونه کوي هغه يې له پامه غورزول کيږي.
