د انګلینډ کرکټ لوبډله د ۲۰۲۱ز کال په اکتوبر کې پاکستان ته ځي چې هلته له کوربه هېواد سره دوه ۲۰ اوریزه سیالۍ وکړي.
د انګلینډ کرکټ بورډ د نومبر پر ۱۸مه وویل، دا به په ۱۶ کلونو کې لومړی ځل وي چې لوبډله یې پاکستان ته ځي.
رویټرز اژانس وايي، د انګلینډ د کرکټ ملي لوبډلې تر دې لنډ سفر وروسته هم په اکتوبر کې په هند کې د ۲۰ اوریزه کرکټ نړیوال جام اتلولي پیلېږي.
په ۲۰۰۹ز کال کې په لاهور کې د سري لنکا پر کرکټ لوبډلې وسله وال برید شوی وو چې پکې شپږ پولیسان او دوه ولسي وګړي وژل شوي ول.
تر هغې وروسته تر کلونو پورې د کرکټ نړیوالو لوبډلو پاکستان ته سفر نه کاوه او زیاتره نړیوالو لوبډلو به له پاکستان سره په متحده عرب اماراتو کې سیالۍ کولې.
د انګلینډ د کرکټ بورډ مشر ټام هیرېسن وايي، راتلونکی کال یې د لوبډلې پاکستان ته سفر د دواړو هېوادونو لپاره خورا زیات ارزښت لري.
ده البته وویل چې د تل په څېر دا ځل هم د لوبغاړو او د کرکټ بورډ کارکوونکو خوندیتوب ته لومړیتوب ورکوي او د پاکستان له کرکټ بورډ سره په رابطه کې دی چې ټول اړین اقدامات وکړي او د لوبغاړو د امنیت ترڅنګ د کورونا وایرس جهاني وبا حالاتو ته په کتو هم پلان تیار کړي.
د ۲۰۱۹ز کال له سېپټېمبر راهیسې د سري لنکا، بنګلادېش او زېمبابوې لوبډلې پاکستان ته تللې دي.
سږکال په اکتوبر کې د زېمبابوې لوبډلې له پاکستان سره درې یو ورځنۍ او درې ۲۰ اوریزه سیالۍ وکړې چې دواړه لړۍ پاکستان وګټلې.
پاکستان د یو ورځنۍ سیالیو په لړۍ کې دوه او زېمبابوې یوه لوبه وګټله او په ۲۰ اوریزه سیالیو کې یې زېمبابوې ته په درې صفر ماتې ورکړه.
د فېسبوک تبصرې