د امریکايي ولسمشر جوبايډن د انتظاميې يوه چارواکي ويلي چې پر اسراييل د ايران د توغنديو او ډرونونو تر حملو وړاندې او وروسته امريکا د سوېس منځګړيو له لارې له تهران سره په رابطه کې وه.
د رويټرز اژانس د خبر له مخې، دې امريکايی چارواکي د رابطو په اړه له نورو معلوماتو ورکولو انکار وکړ خو دومره يې وویل چې واشنګټن د سوېس مینځګړيو له لارې له ايران سره يو شمېر نېغ په نېغه رابطې لرلې.
هغه دا څرګندونې د ایران د بهرنیو چارو وزیر د هغې خبرې په اړه د پوښتنې په ځواب کې کړې دي چې ويلي یې ول، تهران ۷۲ ساعته وړاندې د حملې په اړه سيمه ییز هېوادونه خبر کړي ول.
خو دې امريکايی چارواکي وويل چې دا خبره رښتیا نه ده او دوی ته داسې خبرتیا نه وه ورکړل شوې.
ايران د اپريل پر ۱۳مه ناوخته پر اسراييل تر ۳۰۰ زیاتو ډرونونو او توغنديو حملې کړې وې چې پکې د اسرايلي چارواکيو په وينا، د ۹۹ فيصده مخه يې نيولې وه.
هغه توغندي د اپرېل پر ۱۴مه سهار دوه بجې د اسراييلو هوايي حريم ته داخل شول خو د هغه هېواد هوايي دفاعي نظام يې مخه ونيوله.
اسراییلیو چارواکو يوې پوځي اډې ته د لږ زیان رسېدو او د يوې اووه کلنې ماشومې د شدید زخمي کېدو راپور ورکړی دی.
اسراییلو ویلي دي چې د ایران حمله یې ناکامه کړې ده خو ایران وايي چې بریدونه یې بریالي ول.
دا په داسې حال کې ده چې د اپرېل پر لومړۍ نېټه د شام (سوریې) په پلازمېنه دمشق کې د ایران پر کونسلګرۍ د اسرايیلو په مبیینه هوايي برید کې د ایران د اسلامي انقلاب ساتونکو د قدس ځواک د یو قومندان جنرل محمد رضا زاهدي په ګډون اووه لوړپوړي چارواکي ووژل شول.
ایران تر هغې وروسته د غچ اخیستو ګواښ وکړ خو اسراییلو د برید په اړه له تبصرې کولو ډډه کړې وه.
دا برید په داسې حال کې شوی دی چې د غزې په تړانګه کې د جګړې د دوام او په شام کې د برید په اړه د ایران او لویدیځ ترمینځ ترینګلتیا زیاته شوې ده.
ایران خپل برید ته د اسرايیلو پر وړاندې د "صادقانه ځواب" عملیاتو نوم ورکړی او "په دمشق کې یې د ډېپلوماټیکو ځایونو پر وړاندې د اسراييلو د تېري ځواب بولي."
