په پاکستان کې د سفري بندیزونو تور لېسټ ختم شو

پراګ - د پاکستان د سېنېټ د قانون او انصاف کمېټۍ ویلي، له هېواده بهر د سفري بندیزونو تور لېسټ ختم شوی دی او پکې شامل ټول نومونه لرې شوي دي.

د کمېټۍ مشر سېنېټر جاوېد عباسي د جنورۍ پر ۲۳مه مشال راډیو ته وویل، د جنورۍ پر ۲۲مه یې د پاکستان په کورنیو چارو وزارت کې د پاسپورټونو او کډوالۍ چارو مشر عشرت علي وربللی وو او له هغه څخه یې د سفري بندیزونو د تورلېسټ په اړه وپوښتل.

د کمېټۍ بل سېنېټر او د نیشنل پارټۍ مشر حاصل بزنجو وویل، د قانون او انصاف کمېتۍ د ممنوع الخروجۍ (اېګزېټ کنټرول) او د سفري بندیزونو تور لېسټ په اړه په تېرو ورځو کې څو غونډې وکړې او د وفاقي تحقیقاتي ادارې (اېف ای اې) په ګډون یې یو شمېر چارواکي معلوماتو او ځواب ورکولو لپاره ورغوښتي ول.

دواړو سېنېټرانو وویل چې د ممنوع الخروجۍ او تور لېسټ ترمنځ لوی توپیر دی. د یوه کس له هېواده پر بهر د سفر بندیز واک له وفاقي کابینې سره وي او چې کله یې نوم په اي سي اېل کې ورشامل شي، نو حکومت یې ورخبروي. خو د سفري بندیز تور لېسټ غیر قانوني دی او چې څوک پکې شامل وي، هغه خبر هم نه وي.

سېنېټر بزنجو وايي، حکومتي چارواکو سېنېټران قانع یا قایله نه کړای شول: "د تور لېسټ معنا دا ده چې [مشکوک کس]، که هر ځای وي، تر څار لاندې به وي. [نو موږ د وفاقي تحقیقاتي ادارې او له نورو چارواکو] څخه وپوښتل چې ایا په دې اړه کومه قانوني مسوده یا قانون شته؟ نو هغوی هېڅ ځواب رانکړای شو. بیا یې وویل چې دا د اېف ای اې خپل یو انتظام دی چې ورته یې د تور لېسټ نوم ورکړی. بیا د کمېټۍ غړو له هغوی څخه نورې پوښتنې وکړې خو سم ځواب یې رانکړای شو. نو کمېټۍ وویل چې تور لېسټ هېڅ ارزښت نه لري او تاسې هسې خلک په عذابوئ."

د قانون او انصاف کمېټۍ غونډې ته د بشري حقونو وزیره شیرین مزارۍ هم ورغلې وه. د پاکستان ډان ورځپاڼه وايي، مزارۍ هم د سفري بندیز تور لېسټ ناقانونه وباله.

د کمېټۍ مشر جاوېد عباسي وايي، تور لېسټ زیات خطرناک وو او چې د پاسپورټونو ادارې چارواکي عشرت علي یې په اړه سپیناوی ونکړای شو، نو خپله یې د ختمولو اعلان وکړ:

"تور لېسټ هېڅ وجود نه لاره، هېڅ قانوني حیثیت یې نه وو. [د پاسپورټونو او کډوالۍ څانګې مشر] موږ ته وویل چې [د تور لېسټ خبره یې] د پاسپورټونو په قواعدو او کتاب کې وراچولې وه. خو هېڅ [پارلېمان] ورته قانوني شکل یا ملاتړ یې نه دی کړی. [نو هغه وویل] چې تر اوسه پورې یې څه کړي، هغه سم نه ول، د قانون خلاف ورزي وه. هغه وویل، بښنه غواړم او بیا به داسې نه کېږي. له دې سره، کمېټۍ هم هغه وخت فیصله وکړه، [تور لېسټ] ختم شو او په هغه کې چې د خلکو نومونه ول، هغه ټول لرې شول."

ډان ورځپاڼه د بشري حقونو د وزیری شیرین مزارۍ له خولې لیکي چې په جمهوري حکومتونو کې د سفري بندیزونو تور لېسټ لپاره هېڅ ځای نشته.

نوموړې زیاته کړې چې له دې لېسټه هغه وخت خبره شوه چې د ۲۰۱۸ز کال د نومبر پر ۳۰مه چارواکو په قامي اسمبلۍ کې د شمالي او جنوبي وزیرستان استازي او د پښتون ژغورنې غورځنګ غړي محسن دوړ او علي وزیر له پېښور هوايي ډګره، متحده عرب اماراتو ته سفر ته پرېنښودل او ورته یې وویل چې نومونه یې د سفري بندیزونو په لېسټ کې دي.

د کمېټۍ سېنېټرانو زیاته کړه چې اوس به یوازې پر هغو کسانو د سفر بندیز لګي چې نومونه یې وفاقي کابینه د ممنوع الخروجۍ لېسټ یعنې اي سي اېل ته ورواچوي.