د امریکا په مرسته په جنوبي وزیرستان کې سړک جوړ شو

دا سړک له ټانکه جنډولې او بیا تر مکینه پورې ځي او د پاکستان د فرنټییر ورکس ارګنایزېشن اداره یې جوړوي.

دا سړک د امریکا د نړیوال پرمختګ ادارې یو ایس اې آی ډي په مالي مرسته جوړشوی.

په یوه خبري بیان کې، د امریکا د نړیوال پرمختګ ادارې یو ایس اې آی ډي مشر ډاکتر انډریو سېسن ویلي، ((دا سړک د پاکستان د حکومت او امریکا تر منځ د همکارۍ ښه مثال دی او موږ په دې ویاړو چې د دې مهم سړک په جوړولو کې شریک یو.))

ډاکتر سېسن وايي: (( موږ په دې نظر یو چېې دا سړک د اقتصادي رغاونې او د پاکستان په دې مهمې سیمې کې د اوږد مهاله امنیت لپاره مهم حیثیت لري ځکه چې دا به د سیمې د اوسېدونکو لپاره د کار موقعې برابرې کړي، زرعي سیمې او بازارونه به له یو بل او له ټولنو سره وتړي چې په تېر مهال کې یې دا اسانتیا نه لرله. دا سړک به په سیمه کې سولې او ثبات ته وده ورکړي.))

د ۲۰۱۰ز کال د سېلاوونو له وجې د ټانک- مکین دا سړک ډېر خراب شوی وو.

دا سړک د جنوبي وزیرستان احمد وام، سره روغه، کوټکۍ له ټانک او اسماعیل خان دېرې سره تړي.

په بیان کې راغلي، د امریکا مالي مرستې د فاټا سېکرټرېټ او فرنټییر ورکس ارګنایزېشن ته دا موقع ورکړه چې وران شوی سړک جوړ کړي او په کې پلونه او سورنګونه هم تعمیر کړي.

بیان زیاتوي، امریکا په جنوبي وزیرستان کې د سړکونو او د نور انفرا سټرکچر د جوړولو لپاره له ۱۵۰ میلیونه زیات ډالر مرسته کړې ده.