پراګ - طالبانو او امريکايانو د فبرورۍ پر ۲۹مه، يوه لوظنامه وکړه چې له مخې به يې امريکايي ځواکونه له افغانستانه ووځي. په واشنګټن کې د پاکستان پخوانی سفیر حسین حقاني وايي، اوس بايد افغانان په خپل منځ کې سره کښېني او يو جوړجاړي ته ورسي. نوموړي زياته کړه چې پاکستان هم بايد پر دې پوه شي چې د طالبانو د ټول واک اخیستو خوب نشي ریښتيا کېدلی نو بايد مخلصه کار وکړي.
حقاني دا څرګندونې د مارچ پر درېیمه له مشال راډیو سره په ځانګړې مرکه کې کړي چې تاسې یې لاندې لوستلای شئ.
مشال راډیو: حقاني صاحب، د امريکايانو او طالبانو لوظنامه د پايدارې سولې سبب کېدلی شي؟
حسین حقاني: ما همېشه ويلي چې د طالبانو او امريکايانو ترمنځ دا جوړجاړی د سولې لوظنامه نه بلکې له افغانستانه د امريکایانو د وتلو موافقه ده. په افغانستان کې جګړه د امریکایانو تر ورتګ ډېره مخکې پېل شوې ده. زما په فکر هر څه د دوی په شتون ورتپل به د افغانستان هېڅ مسله حل نه کړي. حقیقت دا دی چې طالبان د ټولواکۍ فکر لري. دوی غواړي پر ټول افغانستان یې واک وي. دوی امريکايان لوی او قوي دښمن بولي نو د هغوی د وتلو لپاره يې ورسره ځکه تړون وکړ چې د دوی په فکر له واړه دښمن سره مقابلې ته پاتې شي. د دوی په نظر وړوکی دښمن د افغانستان خلک او هلته موجودې ډلې دي.
مشال راډيو: تاسې ته ښکاري چې د امريکايانو او طالبانو دا موافقه به همداسې عملي شي؟
حسین حقاني: زما په فکر امريکايان به پر دې لوظنامه عمل وکړي ځکه چې امريکايان غواړي له افغانستانه ووځي. دا هغه خبره ده چې ولسمشر ډونلډ ټرمپ په بيا بيا کړې ده او همداسې به وکړي. خو په ياد ولرئ چې امريکايان د هغو طالبانو پسې افغانستان ته تللي ول چې لرليد يې نه درلود او سختدريځه فکر يې نظر محدود کړی وو. په دې فکر کې بدلون نه دی راغلی. ډېر ژر به موږ د طالبانو د ظلمونو کيسې واورو چې ښايي د امريکايانو نظر بدل کړي.
مشال راډيو: ځينې خلک فکر کوي چې د امريکايانو وتل په دې مانا دي چې افغانستان يو ځل بيا ګاونډيانو ته پرېښودل کېږي. ايا تاسو هم داسې فکر کوئ؟
حسین حقاني: زما په فکر کله چې امريکايي ولسمشر ډونلډ ټرمپ دا خبره کوي، نو د هغه په نظر دا منطقي کار دی. هغه فکر کوي چې امريکا پر افغانستان – داسې يو هېواد چې دی یې په اړه هېڅ معلومات او پروا نه لري – ډېرې پېسې لګوي. خو دی بايد په ياد ولري چې امريکايان افغانستان ته ځکه تللي چې هلته د ترهګرو خوندي ځايونه ول. افغانستان يوازینی داسې ځای نه دی. ايران او پاکستان هم د ترهګرو خوندي ځايونه لري. له افغانستانه د امريکايانو وتل به په نړۍ کې د ترهګرئ ستونزه حل نه کړي. ګاونډيانو ته، چې خپله هم د ترهګرو خوندي ځايونه لري، د افغانستان سپارل عجبه خبره ده. دا خو بيخي سيمې ته سوله نه شي راوستی.
پاکستان اوس هم دې سيمې ته د پخوانۍ برتانيې غوندې د کالونۍ په شان ګوري خو دوی د دغه نظریې د عملي کولو وسايل نه لري نو ځکه له غېرروايتي جګړو او د وسله والو په کارولو يې لاس ته راوړل غواړي.حسین حقاني
مشال راډيو: تاسو په راتلونکې کې د پاکستان کردار ته څنګه ګورئ؟ دوی په غېر مستقيم ډول د طالبانو او امريکايانو ترمنځ د تړون امتیاز یا کريډيټ اخلي.
حسین حقاني: دا ډېره په زړه پورې خبره ده. پاکستان وايي، په افغانستان کې د طالبانو له کړنو سره هېڅ تړاو نه لري خو اوس چې طالبانو له امريکایانو سره مذکرات وکړل نو اوس یې پاکستان د کولو کريډيټ یعنې امتیاز اخلي يا خپل نوم پرې کوي. د دې مانا دا ده چې که طالبانو په پاکستان کې خوندي ځايونه نه لرلی نو هېڅکله به يې دومره لویه ستونزه نه وای جوړه کړی. زما په فکر پاکستان بايد له ټولو ګاونډيانو ايران، هند او افغانستان سره سمې اړيکې ولري. زه فکر کوم چې پاکستان اوس هم دې سيمې ته د پخوانۍ برتانيې غوندې د کالونۍ په شان ګوري خو دوی د دغه نظریې د عملي کولو وسايل نه لري نو ځکه له غېرروايتي جګړو او د وسله والو په کارولو يې لاس ته راوړل غواړي. پاتې نړۍ دا کار ترهګري بولي. پاکستان به هرومرو خپلې پاليسۍ بدلوي ځکه چې د دوی دا ځان ښودنه پر افغانانو څه اغېز نه لري.
مشال راډيو: نو تاسو څه وړانديز لرئ؟ د افغانستان مسله څنګه حلېدلی شي؟
حسین حقاني: زما په خيال افغانان او د افغانستان ګاونډيان به په اخر کې ځان پر دې پوهوي چې طالبان ښه خلک نه دي. افغانان کولی شي له طالبانو سره خبرې وکړي او د سياسي نظام برخه یې کړي. خو که طالبان بيا هم فکر کوي چې غواړي د ټول افغانستان باداران واوسي نو بايد پوه شي چې افغانان به د دې کار پر وړاندې مقاومت ښيي.
د فېسبوک تبصرې