عورت مارچ: د عدت قضیه کې دې د عمران خان او بشرا بي بي سزا ختمه شي
د ښځو د حقونو لپاره مبارزه کوونکي سازمان عورت مارچ په اسلام اباد کې د عدالت د هغې پرېکړې پر ضد مظاهره کړې چې پکې یې د پاکستان د پخواني وزیراعظم عمران خان او د هغه د مېرمن بشرا بي بي ته د عدت مودې نه پوره کېدو پر سر د بند سزا واوروله. د اسلامي قانون له مخې عدت هغې درې میاشتنۍ مودې ته ویل کېږي چې ښځه یې د مېړه تر مړینې یا تر طلاق وروسته تر بلې نکاح مخکې تېروي. د فبرورۍ شپږمې د مظاهرې ګډونوالو وویل، هغه سزا دې ختمه شي، په سیاسي قضیو کې د ښځو شاملول ودرېږي او د هغوی پر شخصي ژوند دې بحث نه کېږي. د راولپېنډۍ یو عدالت د فبرورۍ پر دویمه خان او د هغه ښځې ته د اووه، اووه کلونو د بند سزا اورولې وه. ویډیویي راپور.