د پاکستان پارلماني پلاوی د افغانستان د دوه ورځني سفر وروسته اسلام اباد ته ستون شوی او د دلې مشر اياز صادق د سفر مالومات د سېشنبې په ورځ له وزيراعظم نوازشريف د ليدو پر مهال شريک کړي دي.
د سفر مهم هدف د دواړو هېوادونو ترمنځ پر ځای ولاړې خبرې بيا پیلول وو.
پلاوي له يو شمېر افغان چارواکيو سره د ليدو ترڅنګ له افغان ولسمشر محمد اشرف غني سره هم وکتل چې لېدنې شاوخوا شپږ ساعته دوام وکړ.
د پلاوي تر سفر سمدستي وروسته د افغانستان اجراييه رياست ريیس وياند جاويد فيصل د چارشنبې په ورځ مشال راډيو ويلي، د پاکستان استخابارتي ادارې مشر لېفټينېنټ جنرل نويد مختار کابل ته ورغلی او د سېشنبې په ورځ يې له افغان ولسمشر اشرف غني او ډاکټر عبدالله عبدالله سره وليدل.
ايا دواړه غاړې د اړيکو ښه کولو لپاره پر ځینو کوټلو ګامونو اخستو سره سلا شوي او که څنګه؟
دا او نورې پوښتنې د مشال تر رڼا لاندې بحث کې څېړل شوې.
په پاکستاني پلاوي کې شامل د قامي اسمبلۍ غړی غازي ګلاب جمال او د افغانستان مشرانو جرګې دوهم مرستيال ډاکټر محمد اصف صديقي د بحث مېلمانه دي.
