د لاسرسي ځای

تازه خبر

خبرونه

افغان حکومت وايي طالبان دې ژر ورسره خبرو ته کښېني

په قطر کې د طالبانو سیاسي دفتر غړي

د افغانستان د ملي امنیت شورا وايي، اوس له طالبانو سره د سولې خبرو د پیل لپاره زمینه برابره ده او څومره ژر چې کېږي باید دا خبرې پیل شي.

د ملي امنیت شورا د دفتر ویاند جاوید فیصل د جون پر نهمه په کابل کې خبري غونډې ته وویل، د افغانستان حکومت له خپل اړخه د دې مذاکراتو د پیل لپاره پوره تیاری لري.

ده وویل، خبرې نور باید و نه ځنډېږي.

د افغانستان حکومت د درې زره طالب بندیانو د خوشې کېدو موضوع ته په اشارې ټینګار کوي چې له طالبانو سره د سولې خبرې باید له قید او شرطونو پرته پیل شي.

فیصل وایي، د طالبانو درې زره بندیان د افغانستان له زندانونو خوشې شوي خو طالبانو بیا یوازې د حکومت ۲۷۷ تنه خوشې کړي دي.

طالبانو تر اوسه له افغان حکومت سره له مستقیمو خبرو انکار کړی او وايي، د فبرورۍ پر ۲۹مه له امریکا سره د سولې له موافقې سره سم، د ټولو ۵،۰۰۰ بندیانو تر خوشې کېدو وروسته بین الافغاني خبرو ته کښېني.

د نننۍ ورځې ټول خبرونه وګورئ

د سپين وام خلک په کورم تنګي ډيم کې نوکرۍ غواړي

شمالي وزیرستان

د شمالي وزیرستان د سپینوام اوسېدونکو د خپلو غوښتنو پوره کولو لپاره احتجاجي لاریون کړی دی. د جولای په ۱۶مه شوي دې احتجاج کې د سیمې پېنځه قامونو مشران او ځوانان شامل ول.

د لاریون یوه ګډونوال ملک لیاقت وزیر بېګا مشال راډیو ته وویل، حکومت ورسره ژمنه کړې وه چې د کورم تنګي ډیم د جوړولو په چارو کې د سیمې خلکو ته نوکرۍ ورکوي.

د وزیرستان د ځوانانو سازمان یو غړی وسیم وزیر وايي، د سیمې روغتون عمله نه لري او های سکول له پېنځو کلونو راهیسې تړلی دی. دوی حکومت ته د اګست تر ۲۰مې پورې وخت ورکړ او ګواښ یې وکړ چې که غوښتنې یې پوره نه کړې نو پراخ احتجاجونه پیلوي.

د شمالي وزیرستان مرستیال کمېشنر شاهد علي خان د خلکو د غوښتنو ژر پوره کولو ډاډ ورکوي. نوموړي بېګا مشال راډیو ته وویل، د روغتون عمله به ژر پوره کړي او د سیمې ښوونځی هم فعالوي. دی زیاتوي چې د کورم تنګي ډیم پروژې مشر یې ورغوښتی چې ورڅخه د سیمې خلکو ته د کاري موقعو ورکولو په اړه پوښتنه وکړي.

پر ټویټر انټرنېټي بریدونه شوي

د ټويټر لوګو

ناپیژندل شویو انټرنیټي غلو د نړۍ د یوشمېر مهمو شخصیاتو په ټویټر پاڼو بریدونه کړي دي.

په دې کې د امریکا د ولسمشریزو انتخاباتو کاندید جو بایډن، پخوانی ولسمشر باراک اوباما او مایکرو سافټ د مشر بل ګیټس رسمي ټویټر اکاونټونه هم شامل دي.

په دې برید کې د سیاست، رسنيوو او حکومتونو د لوړپوړو چارواکیو اکاونټونه په نښه کړل شوي دي. اکثره هغه اکاونټونه دي چې ويريفايډ دي. يعنې د ټويټر له خوا تاييد شوي اکاونټونه دي‌چې اسماني رنګه نښه لري.

تر دې وروسته ټويټر څيړنې پېل کړي او د ويريفايډ اکاونټونو څخه یې د ټويټ ليکلو صلاحيت په لنډمهالي ډول واخیست.

د پېړۍ تر پايه به د نړۍ ابادي له اټکله کمه وي

څېړنه اټکل کوي چې د روانې پېړۍ تر پایه به د نړۍ ټوله ابادي ۸.۸ اربه ته ورسي.

د امریکا واشنګټن پوهنتون د څېړونکو یوې ډلې ویلي دي چې د ماشومانو زېږولو شرحې ټيټېدو او په ځینو سیمو کې د زړښت د کچ لوړوالي له وجې به د نړۍ ابادي هومره زیاته نه شي چې څومره یې چې په اړه اټکل شوی وو.

دا څېړنه چې د جولای پر ۱۵مه د لېنسېټ میډیکل ژورنال په نوم څېړنیزه مجله کې خپور شوی وايي په ځانګړي ډول په اسیا، منځني او ختیځې اروپا کې د زړښت کچه لوړه ده.

څېړنه اټکل کوي چې د روانې پېړۍ تر پایه به د نړۍ ټوله ابادي ۸.۸ اربه وي چې د ملګرو ملتونو له اوسني اټکله دوه اربه کمه ده.

په رپورټ کې راغلي چې د ملګرو ملتونو اټکل او څېړنې له تګلارو سره تړلي متبادل حالات او د بچیو زېږولو او د مړینې د کچې بدلوونکي عوامل په پام کې نه وو نیولي.

بيل او ميلينډا ګېټس بنسټ دا څېړنه تمویل کړې چې پکې راغلي تر ۲۱۰۰ز کاله، د نړۍ له ۱۹۵ څخه شاوخوا ۱۸۳ هېوادونه به د ابادۍ سطحه برقراره ونه شي ساتلی.

په بله معنا په هغو هېوادونو کې به هومره ماشومان ونه زېږي چې څومره د ابادۍ کچې پر ځای ساتلو ته په کار وي.

لیکنه وايي، د ښځو تعلیمیافته کېدل او د زوکړو د کنټرول لارو چارو دودېدو له وجې به د بچیو زېږولو سطح ټیټه شي او د ابادۍ د زیاتېدو بهیر به ورو شي.

د روس پولیسو د تاوتریخوالي په تور لسګونه کسان نیولي

پولیس د خلکو د نيولو پرمهال

د روس پولیسو د جولای پر ۱۵مه مازیګرمهال تر ۱۰۰ زیات هغه کسان ونيول چې په مسکو کې یې په وروستیو کې د منظور شویو اییني بدلونونو پر ضد احتجاج کاوه.

په اساسي قانون کې بدلونونه، ولسمشر ولادیمیر پوتین ته دوه ځلې نور یعنې تر ۲۰۳۶ کاله، په واک کې د پاتې کېدو اجازه ورکوي.

د او وي ډي انفو په نوم یوې خپلواکه سیاسي څارډلې ویلي دي چې پولیسو لږ تر لږه ۱۴۷ مظاهره کوونکي ونیول چې پکې یې ځینې وروسته خوشې کړي. د مشال راډیو د روسۍ څانګې د کرنټ ټایم ټېلېوېژن خبریال وايي، له مظاهره کوونکو څخه ځینې پولیسو پر پاخه سړک کش کول او یو کس یې له ویښتو نیولی وو او د پولیسو ګاډي ته یې وخېژاوه.

سلګونه کسان پر باران سربېره د پلازمېنې مسکو پوشکېن څلورلارې ته وروتلي ول او نعرې یې وهلې چې پوتین دې استعفا ورکړي او پوتین غل دی. دوی د جون له ۲۵مې څخه د جولای تر لومړۍ پورې د شوې هغې ملي ټولپوښتنې پر ضد رسماً د یوه درخواست لاسلیکولو ته ورغلي ول چې پکې خلکو په اساسي قانون کې د بدلونونو منظوري ورکړه. البته ټولپوښتنه لازم الاجرا نه ده. له بدلونونو څخه یې یو پوتین ته دوه ځلې نور د ولسمشریزو انتخاباتو د نوماندۍ اجازه ورکوي.

له روسي ایین سره سم، یو کس دوه ځلې پرلپسې ولسمشر کېدای شي. د پوتین د ولسمشرۍ اوسنی دویم دور په ۲۰۲۴ز کال کې پای ته رسي.

هېواد: جرمني غواړي د افغان سولې خبرو کوربه شي

د افغانستان بهرنيوو چارو وزارت وياند

د افغانستان بهرنیو چارو وزارت وايي جرمني غواړي چې د افغان حکومت او طالبانو ترمنځ د سولې خبرو کوربه شي.

د وزارت ویاند ګران هېواد پرون رسنیو ته وویل، د جرمني د بهرنیو چارو وزیر هایکو ماس د جولای پر ۱۵مه د افغانستان د بهرنیو چارو وزارت له سرپرست حنیف اتمر سره په ټېلېفوني خبرو کې وړاندیز وکړ چې که دواړه خواوې سلا شي نو برلېن د خبرو کوربه توب ته چمتو دی.

بلخوا په قطر کې د طالبانو سیاسي دفتر ویاند سهېل شاهین بد جولای په ۱۵مه مشال راډیو ته ويلي چې لومړنۍ خبرې به په دوحه کې کېږي او وروسته به د دواړو خواو په مشوره د خبرو ځای وټاکل شي.

شاوخوا دوه اوونۍ مخکې ولسمشر محمد اشرف غني هم ویلي ول چې زیات امکان دی چې له طالبانو سره لومړنۍ خبرې په قطر کې وشي.

د امریکا او طالبانو ترمنځ د فرورۍ پر ۲۹مه د سولې د موافقې لومړی پړاو روانه اونۍ بشپړ شو او له ژمنې سره سم، ۴۴۰۰ امریکايي سرتېري له افغانستانه ووتل. په دې خبرو کې یو شرط دا وو چې افغان حکومت به د طالبانو پينځه زره بنديان ورپريږدي او بيا به دا ډله بين الافغاني مذاکراتو ته حاضريږي. تر اوسه پورې د افغان چارواکو په وېنا ۴۵۰۰ طالب بنديان خوشي شوي دي.

پاکستان: ۲۴ ساعتونو کې د کووېډ-۱۹ تر ۲،۰۰۰ زیاتې پېښې ثبت شوي

یو روغتیاپال د کورونا وایرس

په پاکستان کې په کورونا وايرس د اخته کسانو شمېر ۲۵۵،۷۶۹ ته رسېدلی دی.

د جولای پر ۱۵مع، د کووېډ-۱۹ ناروغۍ په اړه د حکومتي ووبپاڼې له وینا سره سم، په تېرو ۲۴ ساعتونو کې په هېواد کې د کورونا وایرس ۲،۱۶۵ مثبتې پېښې ثبت شوې دي چې په پېښو کې د کمي ښکارندويي کوي.

په پاکستان کې له کووېډ-۱۹ ناروغۍ ۵،۳۸۶ کسان مړه شوي خو تر يو لاک ۷۲ زره زيات ورڅخه رغېدلي هم دي.

دا په داسې حال کې ده چې د پاکستان حکومت په يو شمېر سيمو کې نرم ټولبند عملي کړی دی.

کورونا وایرس د ۲۰۱۹ز کال په ډېسېمبر مياشت کې د چين په ووهان ښار کې څرګند شو چې د روغتيا د نړيوال سازمان په وينا د نړۍ تقريباً ټولو هېوادونو ته خپور شوی دی.

د امریکا د جانز هاپکېنز پوهنتون له وینا سره سم، تر دې دمه په نړۍ کې تر يو کروړ ۳۴ لاکه ۶۲ زره زيات کسان په دې وايرس اخته شوي چې تر پېنځه لاکه ۸۱ زره زيات ورڅخه مړه شوي او شاوخوا ۷۸ لاکه بېرته جوړ شوي دي.

د ارمنیا او ازربایجان سرحدي نښتو کې ۱۱ پوځیان وژل شوي

د ازربایجان د دفاع وزارت له ویډیو اخیستی انځور د توغندي تر لګېدو وروسته اور او لوګی ښيي

د ارمنیا او ازربایجانیو ځواکونو ترمنځ په نښتو کې د دواړو خواوو ۱۱ سرتېري وژل شوي دي.

د جولای پر ۱۴مه، د سرحدي نښتو پر درېیمه ورځ د ازربایجان د یوه جنرال په ګډون اووه پوځیان وژل شوي.

په وژلیو کې د ارمنیا څلور سرتېري شامل دي.

هلته پر نړیوال کچ له یرېوان او باکو څخه د تاوتریخوالي درولو غوښتنې شوې دي.

په جګړه کې دواړو خواوو توپونه کارول شوي دي.

د جنوبي قفقاز دې ګاونډیو تر دې مخکې په ۱۹۹۰ز لسیزه کې هم له ازربایجانه د بېلې کړې ناګورنو قره باغ سیمې لانجې پر سر خونړۍ نښتې کړې دي.

خو د نښتو اوسنۍ سیمه له ناګورنو قره باغه خورا لیرې ده او دواړو خواوو پر یو بل د تاوتریخوالي د پیل تورونه پورې کړې دي.

تازه نښتې د جولای پر ۱۲مه پیل شوې چې پکې د دواړو خواوو لږ تر لږه ۱۶ کسان وژل شوي دي.

بلوچستان کې وسله وال برید درې پوځیان وژلي

پنجګور له کوټې څخه جنوب لوري ته پرته ضلع ده

د بلوچستان په پنجګور ضلع کې په يو وسله وال بريد کې د پاکستاني پوځ درې سرتېري وژل شوي او اته ژوبل دي.

د پوځ د عامه اړيکو څانګه (ای اېس پي ار) وايي، وسله والو د جولای ۱۴مې پر مازيګر د پنجګور په کاهان سيمه کې هغه وخت بريد وکړ چې کله پوځيانو په خپلو ګاډو کې ګزمه کوله.

بيان زياتوي چې د پېښې ټپيان د کوټي پوځي روغتون ته رسول شوي چې پکې د پېنځو حالت د اندېښنې وړ دی.

د برید ذمه واري چا نه ده منلې خو تر دې مخکې د دې ډول اکثره پېښو مسوولیت بلوڅ بېلتونپاله ډلو قبول کړی.

پنجګور د بلوچستان له مرکز کوټې څخه څه د پاسه ۵۰۰ کیلومیټره لیرې جنوب لوري ته پرته ضلع ده چې د مکران ډېوېژن برخه ده. د دې په جنوب کې د ګوادر ښار او بندر پروت دی.

پېښور های کورټ: د خبریال حیات الله مقدمې پلټنه دې وشي

د پېښور های کورټ

د پېښور های کورټ د خیبر پښتونخوا صوبايي او د پاکستان وفاقي حکومت ته یو ځل بیا امر کړی دی چې د شمالي وزیرستان د وژل شوي خبریال حیات الله د مقدمې په اړه دې د تحقیقاتي کمېشن رپورټ په ۲۰ ورځو کې په ډاګه کړي.

د پېښور های کورټ پر جسټس اشتیاق ابراهیم او جسټس ناصر محفوظ مشتملې دوه کسیزې جرګګۍ د جولای پر ۱۴مه د حیات الله د ورور له اړخه د داخل کړل شوي درخواست اورېدنه وکړه.

د وژل شوي خبریال د کورنۍ وکیل اډوکېټ طارق افغان مشال راډیو ته وویل چې عدالت تر دې وړاندې هم دا غوښتنه کړې وه خو رپورټ لا هم نه دی په ډاګه شوی.

حیات الله د ۲۰۰۵م کال د ډېسېمبر پر پنځمه له میرعلي تښتول شوی وو او بیا یې د ۲۰۰۶م کال د جون پر ۱۶مه یې په مرمیو ویشتل شوی مړی میندل شوی وو.

قامي اسمبلي: په پوهنتونونو کې دې قران په اردو ترجمه وښودل شي

د پاکستان پارلېمان ودانۍ

د پاکستان قومي اسمبلۍ هغه مسوده په یوه خوله منظوره کړې ده چې له مخې به یې د ملک په ټولو پوهنتونونو او د لوړو زده کړو ادارو کې قران مجید له اردو ترجمې سره ښودل کېږي.

د جولای پر ۱۳مه منظور شوي دې قرارداد کې ویل شوي چې د ایین له مخې د ملک رسمي نوم اسلام جمهوري پاکستان دی او په ملک کې به قران او سنت تر ټولو ستر قانون بلل کېږي.

په قرارداد کې ویل شوي چې د هم دې له کبله باید په ټولو پوهنتونو کې د قران مجید ښودلو لپاره مناسب اقدامات وشي.

د پارلېماني چارو وزیر علي محمد خان ویلي چې د اردو ترجمه به له زره کوونکو سره مرسته وکړي چې په قران مجید په سیمه توګه پوه شي.

د امریکا په کالیفورنیا کې بیا بندیزونه لګېدلي

د کيليفورنيا په يو دکان کې ګوډۍ ته ماسک اغوستل شوی

د امریکا کالیفورنیا ایالت د کورونا وایرس د لاخپرېدو مخنیوي لپاره بیا بندیزونه ولګول.

د امریکا دغه تر ټولو زیات نفوس لرونکی ایالت په دې وروستیو کې د کورونا وایرس د مثبتو پېښو او پر کویډ۱۹ ناروغۍ د ډېرو کسانو د بستري کېدو شاهد و.

په امریکا کې کورونا وایرس تر اوسه له ۱۳۵ زرو زیات کسان مړه کړي دي.

د کورونا وبا د امریکا په سویلي او لویدیځو ایالتونو کې چې په مې میاشت کې په کې بندیزونه لیرې شوي و، ډېره د خپرېدو په حال کې ده.

د کالیفورنیا والي ګاوین نیوسام نوي بندیزونه هغه هیلې مړاوي کوي چې په امریکا کې د اقتصاد پر بیاغوړېدو پورې تړلې دي.

رستورانونه، بارونه، سینماګانې او موزیمونه په دې ایالت کې بند شوي دي.

په امریکا کې په وروستیو پنځو ورځو کې د ورځې په متوسط ډول د کورونا ۶۲ زره نوې پېښې ثبت شوې دي.

د وروستیو شمېرو له مخې په ټوله نړۍ کې پر کورونا وایرس د اخته شویو کسانو شمېر له ۱۳ میلیونو او ۲۴۰ زره کسانو اوښتی او د مړیو شویو شمېر هم له ۵۷۵ زره کسانو اوښتی دی.

د امریکا او روس بهرنیو چارو وزیران پر افغان سوله غږيدلي

د عکس ښي لور ته پومپیو او چپ لور ته لاروف

د امریکا بهرنیو چارو وزیر مایک پامپیو د جولای پر ۱۳مه له خپل روسي سیال سرګې لاروف سره د افغانستان پر حالاتو غږېدلی.

د امریکا بهرنیو چارو وزارت په دې اړه په خپاره کړي بیان کې د دغو خبرو په اړه نور تفصیل نه دي ورکړي خو نوموړی وروسته له هغې له لاروف سره خبرې کوي چې په افغانستان کې طالبانو ته د روس پوځي استخباراتو له خوا د امریکایي سرتېرو د وژلو لپاره د انعام ورکولو پرسر په دې وروستیو اوونیو کې په امریکا کې بحثونه ډېر تاوده شوي دي.

د ټرمپ ادارې په دې اړه راپورونه کم اهمیته بللي او ویلي یې دي چې امریکایي استخباراتي ادارو دا نه دي تایید کړي چې روسیې دې ګنې طالبانو د امریکایي سرتېرو د وژلو په خاطر پیسې ورکړې وي.

روسیې هم دغه ادعاوې رد کړې دي.

د امریکا او روسیې د بهرنیو چارو وزیران داسې مهال د افغانستان پر وضعیت خبرې کوي چې په دې هېواد کې په دې وروستیو کې د طالبانو له خوا حملو بیا زور اخیستی.

د ایران پارلېمان یو غړی له کورونا وایرسه مړ شو

عیسا جعفري

د ایران سرکاري رسنيوو ترمخه د ایران پارليمان یو غړی د کورونا وایرس له کبله مړ شوی دی.

۵۹ کلن عیسا جعفري د ایراني پارلېمان درېم غړی دی چې د فرورۍ میاشتې راهیسې په دغه هېواد کې د کورونا وایرس له وجې مړ شوی دی. د نیم سرکاري اېجنسۍ اېسنا ترمخه د هغه مرګ تصدیق د جولای پر ۱۳ مه وشو.

تر دې وړاندې له تهرانه فاطمه رهبر او شمالي صوبې ګیلانه محمد علي رمیزاني د پارلېمان هغه غړي ول چې د کورونا له کبله مړه شوي دي.

د تېر اپرېل په میاشت کې د ایراني پارلېمان سپیکر علي لارېجاني هم پر کورونا وایرس اخته شوی وو. د جولای پر ۱۳مه د ایران صحت وزارت ویلي په دغه هېواد کې د کورونا وایرس ۲۵۹،۶۵۲ کېسونه رپوټ شوي دي او ۱۳،۰۳۲ کسان ترې مړه شوي دي.

ایران د نړۍ یو په هغو هېوادونو کې دی چې د کورونا وایرس له وجې زیات ځپل شوی دی.

داسې اندېښنې هم شته چې په دغه هېواد کې به د کورونا وایرس کره شمېرې لا زیاتې وي.

ملګري‌ملتونه: د کورونا وایرس له وجې قحطي راتللی شي

په تهران کې يوه مېرمن د اخیستې سودا سره

ملګرو ملتونو ویلي د کورونا وبا له وجې سږ کال په نړۍ کې د ۱۳۰ ملیونو څخه زیات خلک د قحط سره مخامخېدای شي.

د جولای پر ۱۳مه نېټه په خپل یو نوي راپور کې ملګرو ملتونو ویلي د تېر کال په نسبت سږ کال د هغو خلکو په شمېره کې ۱۰ ملیونه زیاتوالی شوی دی چې د خوراک د کمي او لوږې سره مخ دي.

دا راپور د ملګرو ملتونو پينځه ادارو جوړ کړی دی چې پکې ویل شوي دي د لومړنیو مالوماتو او نړیوال اقتصادي حالت ته په کتو سره سږ کال درې اتیا ملیونه نور اضافي خلک د خوراک له کمي سره مخامخیدای شي.

د ملګرو ملتونو ادارو په خپل راپور کې دا هم ویلي چې تېر کال نیږدې ۶۹۰ ملیونه خلک چې د نړۍ د ابادۍ نهه فیصده برخه جوړوي د خوراکي توکیو له کمي سره مخ شوي دي.

دا راپور په داسې وخت مخې ته راغلی چې د صحت نړیوالې ادارې (ډبلیو اېچ او) د جولای پر ۱۳ مه نېټه خبرداری ورکړی که چېرې هېوادونو د کورونا وبا خلاف سم ګامونه پورته نکړل نو په نيږدې راتلونکې کې عادي حالات پر ځای کېدل به ګرانه وي.

چین د واشنګټن د اقدام په غبرګون پر ځینو امریکايانو بندیزونه ولګول

په وروستیو کې د امریکا او چین ترمنځ تعلقات ترینګلي شوي دي

بیجنګ د امريکا له خوا پر چينايي چارواکو د ویزې د بندیزونو او شتمنیو کنګلولو په غبرګون پر يوې امريکايي ادارې، درې رېپبليکن سياستوالانو او یو سفیر ورته بندیزونه لګولي دي.

د چين بهرنيوو چارو وزارت د جولای پر ۱۳مه وویل، امريکا يې په داخلي چارو کې لاسوهنه کړې نو ځکه يې د چين لپاره د امريکا د کانګرس کمېشن، د امريکا د بهرنيوو چارو د مذهبي ازادۍ لپاره ځانګړی استازی سېم براون بېک، د رېپبليکن ګوند سېنيټران مارکو روبيو، ټېډ کروز او کرېس سمېت بنديزونه لګولي دي.

امريکا د جولای پر نهمه پر ځينو لوړپوړو چينايي چارواکو د ویزو بندیز ولګاوه او پر خپله خاوره یې د هغوی د شتمنیو د کنګلولو اعلان وکړ.

د دې بندیزونو وجه په چين کې د يوغور مسلمانانو په اړه د چين مبيينه متعصبه چلند او په هانګ کانګ کې د ملي امنیت د یوه نوي قانون له لارې د خلکو د حقونو سرغړونه ښوول شوې چې بیجنګ یې په خپلو کورنیو چارو کې مداخله بولي.

د کورونا وایرس جهاني وبا له وجې د امریکا او چین ترمنځ تعلقات ترینګلي شوي دي.

امریکايي ولسمشر ډانلډ ټرمپ په بیا بیا چین د وایرس خپراوي لپاره تورن کړی خو بیجنګ دا تور بې بنسټه بللی.

د کورونا وایرس لومړۍ پېښې د ۲۰۱۹ز کال په ډېسېمبر کې د چین په ووهان ښار کې ثبت شوې.

وایرس وروسته د نړۍ زیاتره برخو ته خپور شو.

کووېډ-۱۹ ناروغۍ امریکا تر ټولو زیاته خپلې ده.

پاکستان: د کورونا وایرس مثبتو پېښو شمېر تر دوه نیم لاکه لوړ شوی

اسلام اباد کې یو روغتیاپال د معاینې لپاره د یوه کس له پوزې مایع مواد اخلي

په پاکستان کې د کورونا وایرس له کبله د مړو شمېر ۵،۲۶۶ته رسېدلی دی.

د کورونا وایرس په اړه د پاکستان ځانګړې حکومتي ووبپاڼه وايي، د جولای تر ۱۳مې په ټول ملک کې په مجموعي توګه ۲۵۱،۶۲۵ تنه کورونا وایرس نیولي دي.

ووبپاڼه لیکي چې بل پلو په پاکستان کې تر اوسه له کووېډ-۱۹ ناروغۍ څخه تقریباً ۱۶۲،۰۰۰ تنه جوړ شوي هم دي.

په جون کې په پاکستان کې د کووېډ-۱۹ تر ټولو زیاتې پېښې ثبت شوې خو د جولای له پیل راهیسې د وړجنو ورځنی شمېر ښکته شوی.

شمالي وزیرستان کې په نښته کې څلور سرتېري وژل شوي

په شمالي وزیرستان کې په وسله واله نښته کې څلور امنیتي سرتېري او څلور وسله وال وژل شوي دي.

د سیمې یوه امنیتي چارواکي د جولای پر ۱۲مه د نوم نه ښودو په شرط مشال راډیو ته وویل، دا پېښه د اتوار پر ورځ د وزیرستان په بویه کې شوې.

د ده په وینا، سرتېري د استخباراتي معلوماتو پر اساس د وسله والو پر ضد عملیاتو ته روان ول چې نښته وشوه.

وسله والو لا په دې اړه څه نه دي ویلي.

په وروستیو کې په شمالي وزیرستان کې د هدفي وژنو او پر امنیتي سرتېرو د حملو یو شمېر پېښې شوې دي.

د پاکستان پوځ د ۲۰۱۴ز کال په نیمايي کې په شمالي وزیرستان کې د وسله والو ډلو پر وړاندې عملیات وکړل.

پوځ وايي، قبایلي سیمې یې له وسله والو ډلو پاکې کړې دي.

د انګور اډې محمد رحمان وايي، پولیس یې غږ نه اوري

د جنوبي وزیرستان د انګور اډې محمد رحمان وايي، پولیسو د هغه د کور نړونکو پرضد ایف ای ارج درجولو پر ځای د کورنۍ درې غړي یې نیولي دي.

نوموړي د جولای پر ۱۲مه مشال راډیو ته وویل چې په نیول شویو کې یې یو ورور او دوه تربوران دي.

دا له هغه وروسته ده چې د جنوبي وزیرستان په انګور اډه سیمه کې د ځليخېل وزیر قبایلو لښکر د جولای پر اتمه د محمد رحمان درې کورونه ړنګ کړي وو.

محمد رحمان مشال راډیو ته وویل چې دغه کورونه او مځکه يې د پلار نیکه قبضه ده خو د هغه په وینا، لښکر ترې د یو حکومتي ټرمینل لپاره اخېستل غوښت او دی منلو ته تیار نه وو.

خو د قبیلې مشران وايي محمد رحمان ورسره اول تړون کړی وو خو اوس یې نه مني.

پولیس د کسانو نیول تاییدوي او وايي چې دا یې له قانون سره سم نیولي دي.

د پولیسو مشر شوکت علي د جولای پر ۱۲مه مشال راډیو ته وویل، انتظامي چارواکي ورته لیکلي ول چې رحمان ونیسي ځکه چې د قانون سرغړونه یې کړې ده.

د جنوبي وزیرستان انتظامي مشر حمید الله خټک مشال راډیو ته وویل، حکومت له ټول قامه ځمکه اخیستې چې په انګور اډه کې د مال وړونکو ګاډو لپاره اډه جوړه کړي.

دی وايي، د سیمې اوسېدونکو په ګډه پرېکړه کړې وه او په حکومت یې ځمکه خرڅه کړې وه چې رحمان ورڅخه سرغړونه وکړه او جرګې یې کورونه ورړنګ کړل.

خټک زیاتوي چې رحمان دې له قامي جرګې سره خپله مسله حل کړي.

اوس ټرمپ هم ماسک استعمالوي

ټرمپ د جولای په ۱۱مه له یو پوځي روغتونه د ليدو پر مهال ماسک وتړلو.

د امريکا ولسمشر ډونلډ ټرمپ له کورونا وایرس څخه بچ کېدو لپاره په لومړي ځل ماسک کارولی دی.

هغه دا کار د جولای په ۱۱مه له یو پوځي روغتونه د ليدو پر مهال وکړ.

پر نوموړي تنقید شوی چې د کورونا وایرس د خپرېدو د خطر باوجود په رسمي غونډو او ملاقاتونو کې ماسک نه اغوندي. خو نوموړي د جولای پر ۱۱مه وويل، هېڅکله د ماسک خلاف نه وو خو په وینا يې هر شی بايد په خپل ځای او وخت کې وشي.

دا په داسې حال کې ده چې د کورونا وایرس په اړه شمېرې خپرونکي امريکايي پوهنتون جانز هاپکينز ليکلي چې په امريکا کې د جولای تر ۱۲مې پورې د کورونا وایرس وهلو کسانو شمېر درې اعشاريه دوه ميليونه دی. د معلوماتو له مخې له دغې شمېرې نه نږدې یو میلیون خلک رغېدلي خو له ۱۳۴ زره نه زیات کسان یې وژلي دي.

همدې پوهنتون ويلي چې د جولای تر ۱۲مې پورې په ټوله نړۍ کې په کورونا وایرس د اخته کسانو شمېر ۱۲ اعشاريه شپږ ميليونو ته رسېدلی دی. همداراز پنځه لکه ۶۴ زره نه زیات کسان له دې وايرسه مړه شوي خو شپږاعشاريه نهه ميليونه ترې رغيدلي دي.

امیتاب بچن او د هغه زوی ابېشېک بچن هم پر کورونا اخته شوي

امیتاب بچن او د هغه زوی ابېشېک بچن

د هندي فلمونو مشهور اداکار اميتاب بچن او د هغه زوی ابېشېک بچن په کورونا وایرس اخته شوي دي.

۷۷ کلن اميتاب بچن د جولای په ۱۱مه پر ټويټر پاڼه ليکلي چې هغه په روغتون کې داخل کړل شوی دی.

نوموړي په څه باندې ۲۰۰ فلمونو کې رول لوبولی او د هندوستان په سینما یا بالیووډ کې یې د فعالیت شا و خوا ۵۰ کلونه کېږي.

د هغه زوی ابیشېک بچن هم په خپل ټویټر کې لیکلي، چې د هغه د کرونا ټېسټ هم مثبت ختلی دی.

هند تر امريکې او برازيل وروسته د نړۍ درېيم نمبر هغه هېواد دی چې د کورونا وایرس ځپلو شمېر پکې دا مهال تر ټولو ډېر دی.

د هند د روغتیا وزارت د ویب سايټ ترمخه د جولای تر ۱۲مې پورې پر دې وايرس د اخته کسانو شمېر اته لکه او ۲۰ زره دی، له دې جملې نه ۲۲۱۲۳ کسان مړه خو پنځه لکه، ۱۵ زره او درې سوه پينځه اتيا ترې بېرته جوړ شوي دي.

روس او چین شام ته د بشري مرستو رسولو قرارداد مخه ونیوله

د شام له راس العین ښار سره یوه ښځه ولاړ ده. په اکتوبر کې ترکیو الوتکو په سیمه بمباري وکړه. (ارشیف)

د ملګرو ملتونو سلامتي کونسل کې د جولای پر۱۰مه شام ته د بشري مرستو د رسولو په اړه قرارداد منظور نه شو.

د جولای پر ۱۰مه دغه قرارداد ویټو کړ.

دا دویم ځل و چې بیجنګ او ماسکو د ترکیې په دوه لارو شام ته د مرستو رسولو په اړه قرارداد ویټو کولو سره درولو.

د سلامتي کونسل ۱۵ غړیو په هیوادونو کې ۱۳ هغو یې د جرمني او بلجیم لخوا تیارې شوې مسودې په حمایت کې رایې ورکړې خو چین او روس یې په مخالفت کې ووټ ورکړ.

د دې په مقابل کې د ماسکو لخوا تیاره شوی مسوده وه چې دریو هیوادونو یې په ملاتړ کې رایې ورکړې.

په مسوده کې د مرستو لپاره لاره یوې ته راکمه شوې وه.

ملګرو ملتونو او یوې بلې غیر حکومتي ادارې اکسفیم ویلي، د مرستو په نه رسېدو سره به د شام په میلینونو کورنۍ متاثره شي.

طالبان وايي، ۱۷ افغان سرتېري یې خوشي کړي دي

طالبان وایي، د جولای پر ۱۱مه په غور کې له خپل زندانه یې ۱۷ افغان سرتېري خوشې کړي. (ارشیف)

طالبان وایي، د جولای پر ۱۱مه یې د افغانستان په غور ولایت کې له خپل زندانه ۱۷ پولیس او پوځیان خوشي کړل.

د طالبانو د قطر دفتر ویاند سهیل شاهین پر خپله ټویټرپاڼه ولیکل، دغو کسانو ته یې د سفر لګښت ورکړی او خپلو کورنیو ته لېږل شوي دي.

شاهین مشال راډیو ته وویل، دوی تراوسه د افغان حکومت ۷۶۹ زندانیان خوشې کړي دي، خو افغان چارواکي بیا دا شمېر نه مني او وایي، د طالبانو له خوا څه باندې ۵۰۰ زندانیان ازاد شوي دي.

افغان حکومت هم له خپله اړخه د طالبانو څه باندې ۴۰۰۰ زندانیان پریښي، خو دې وروستیو کې داسې راپورونه خپاره شول چې د طالبانو شاوخوا ۵۰۰ زندانیان چې حق العبدي قضیې لري ممکن خوشې نه شي.

حکومتي سرچینو مشال راډیو ته وویل، له طالبانو یې غوښتي چې د دغو کسانو پر ځای به یې نور زندانیان خوشې کړي او طالبانو دا لېست هم ور سپارلی، خو سهیل شاهین وایي، دوی کوم نوی لېست حکومت ته نه دی ورکړی.

ټرمپ په نیو هیمپشر کې د ولسمشرۍ انتخاباتي کمپاین ځنډولی

ټرمپ په نیو هیمپشر کې د ولسمشرۍ انتخاباتي کمپاین د نه کولو پرېکړه کړی. (ارشیف)

د امریکا ولسمشر ډونلډ ټرمپ د جولای پر ۱۱مه په نیو هیمپشر ریاست کې د ولسمشرۍ انتخاباتي کمپاین جلسې د نه کولو پرېکړه کړی.

دا په داسې حال کې ده چې امریکا د کورونا وایرس کېسونو زیاتېدو په صورتحال کې پر وبا د کنټرول حاصلولو هڅې کوي.

چارواکو وویل، د یوې یا دوه اوونیو لپاره د کمپاین جلسې د ځنډولو فیصله د کورونا وایرس له کبله نه ده شوې بلکې لامل یې یو راتلونکې طوفان دی.

ولسمشر ټرمپ په نومبر کې د صدراتي انتخاباتو مخکې درې اوونۍ وړاندې د اوکلاهوما ریاست په ټلسه ښار کې جلسه وکړه.

د جلسې زیاترو ګډونوالو د ماسکونو اچولو او خلکو ترمنځ د سماجي فاصلې اصول له پامه غورځولي وو.

په ښار کې د جلسې دوه درې اوونۍ پس د کورونا وایرس کېسونه زیات شول.

د امریکا جانز هاپکنز پوهنتون له شمېر سره سم په دغه هیواد کې د جولای پر ۱۰مه د کورونا وایرس کېسونو کې له ۶۳۰۰۰ زیاتوالي سره د وایرس کېسونو مجموعي شمېر درې اشارعیه یو میلیون ته ورسېد.

په دغه هیواد کې له وایرسه ۱۳۴۰۹۷ کسان مړه شوي خو تر نهه لکه ۳۸ زره زیات کسان ترې بېرته رغېدلي هم دي.

د خيبر پښتونخوا د اطلاعاتو سلاکار اجمل وزير له دندې ګوښه کړل شو

اجمل وزير

د اطلاعاتو او عامه اړیکو لپاره د خيبر پښتونخوا د اعلا وزير سلاکار اجمل وزير له دندې لرې کړل شوی دی.

د خيبر پښتونخوا د چيف سکټري له دفتره د جولايي پر ۱۱مه، اعلامیه کې ويل شوي چې اجمل وزير د اعلا وزير د اطلاعاتو سلا کار له دندې نه په سمدستي توګه لېري کړل شوی. خو په هغه نوټيفکشن کې د اجمل وزير لېرې کولو وجوهات نه دي ښودل شوي.

په اعلامیه کې راغلي چې د خیبر پښتونخوا د بلدیاتو، انتخاباتو او کلیوال پرمختګ سلاکار کامران بنګش ته د اطلاعاتو د سلار اضافي دنده سپارل شوې ده.

له دې وروسته نن د حکومت په یوه بله اعلامیه کې ویل شوي چې د یو اډیو برسېره کېدو پس اجمل وزیر له دندې لېرې کړل شوی په کومه کې چې پر وزیر تور پورې شوی چې له چا کمېشن یا رشوت غواړي.

د خیبر پښتونخوا اعلی وزیر محمود خان د اډیو د پلټنې امر کړی.

اجمل وزیر د روان کال په مارچ میاشت کې د اعلی وزیر د اطلاعاتو سلاکار ټاکل شوی و.

په نړۍ کې د کورونا وایرس پېښې پر زیاتېدو دي: ډبلیو اېچ او

د نړۍ په کچه د کورونا وایرس پېښې په زیاتېدو دي.(ارشیف)

د روغتیا نړیوال سازمان (ډبلیو اېچ او) د جولای پر ۱۰مه د نړۍ په کچه د کورونا وایرس د یو وار بیا زیاتیدو راپور ورکړ چې له مخې یې په امریکا، هند او جنوبي افریقا کې زیات خلک پرې اخته شوي دي.

یاد سازمان وايي، په تېرو شپږو اوونیو کې د نړۍ په کچه د کوویډ ـ ۱۹ پېښې یو په دوه زیاتې شوې او هره ورځ په اوسط ډول د ۲۲۸ زرو نه د زیاتو کسانو په بیمارېدو ټوله شمېره ۱۲ اعشاریه درې میلیونو ته پورته شوې ده.

همدا رنګه نېږدې پنځه لکه ۵۷ زره کسانو مړینه ثبت شوې ده.

هلته په امریکا کې د واشنګټن پوهنتون یوې نمونیې وړاندوینې کې ویل شوي، په عام محضر کې د ماسکونو استعمال د کورونا وایرس یو بل ته د لګېدو پېښې اتیا په سلو کې او د کویډ ـ ۱۹ ناروغۍ د مړینې کچه ۶۰ په سلو کې کمولای شي.

د جانز هاپکېنز د جولای پر ۱۱مې تازه شمېرې ښايي چې په ټوله نړۍ کې پر کورونا وایرس د اخته شویو کسانو شمېر ۱۲.۵ میلیونو ته نېږدې شوی دی.

کورونا تر ټولو زیات کسان په امریکا، برازیل، هند او روسیه کې وهلي دي.

د جانز هاپکېنز د معلوماتو له مخې تر دې مهاله کویډ ۱۹ ناروغۍ په نړۍ کې نېږدې پنځه لکه او ۶۰ زره کسان وژلي خو څه کم اووه میلیونه ترې بیرته ښه شوي هم دي.

کورونا وایرس د ۲۰۱۹م کال په ډېسېمبر مياشت کې د چين په ووهان ښار کې راڅرګند شو چې د روغتيا د نړيوال سازمان په وينا د نړۍ تقريباً ټولو هېوادونو ته خپور شوی دی.

نور پورته کړئ

ځانګړې پاڼې

له موږ سره اړیکي

XS
SM
MD
LG