د لاسرسي ځای

تازه خبر

خبرونه

پاکستان کې ۱۹۷۴ نور کسان کورونا وهلي

په پاکستان کې په تېرو ۲۴ ساعتونو کې ۱۹۷۴ نور کسان په کورونا وايرس اخته شوي دي.

د دې هېواد د روغتيا څانګې ویبپاڼې د مې پر ۱۸ مه نېټه ليکلي چې له دې سره په پاکستان کې د کووډ-۱۹ په نوم وايرس د ناروغانو شمېر ۴۲ زره ۱۲۵ ته رسېدلی دی. خو تراوسه پورې ۱۱ زره ۹۲۲ کسان ترې پاخه شوي هم دي. ويبپاڼه وايي، په تېرو ۲۴ ساعتونو کې وايرس ۳۰ نور کسان وژلي دې چې ورسره د مړيو مجموعي شمېر ۹۰۳ ته ورسېد. په پاکستان کې د کورونا زیاتره رنځوران په سيند صوبه کې دي چې شمېر يې ۱۶ زره ۳۷۷ دی. په خيبرپښتونخوا کې د مې تر ۱۸ مې پورې د ناروغانو شمېر ۶۰۶۱ دی او په بلوچستان کې ۲۶۹۲ دي.

د نننۍ ورځې ټول خبرونه وګورئ

ننګرهار: هوایي بریدونو.۱۷ طالبان وژلي



د ننګرهار چارواکي وایي چې په دوو جلا جلا هوایي بریدونو کې د دوه مهمو قوماندانانو په ګډون اولس تنه طالب وسله وال وژل شوي دي.
د ننګرهار ولایت مطبوعاتي مسوول عطاالله خوږیاڼي مشال راډیو ته د جنوري په نولسمه نېټه ناوخته وویل چې لومړی برید مازیکر مهال د سپین غر ولسوالۍ اړوند مامند درې سیمه کې او دویم هغه یې د سره رود ولسوالۍ په ککړک سیمه کې تر شوی چې له امله یې د دوه مهمو قوماندانانو په ګډون اولس تنه وسله وال طالبان وژل شوي دي.
د خوږیاڼي په خبره په دواړو بریدونو کې ملکي وګړو ته زیان نه دی اوښتی.
وسله والو طالبانو په دې اړه رسنیو ته څه نه دي ویلي.

په خیبر پښتونخوا کې۷۰۰ خاصه دار بحال شوي: محمد خان

چارواکي وايي، تر دا مهال ۷۰۰ خاصه دار بحال شوي او پاتې ۲،۵۰۰ به ډېر ژر بحال شي.

د خیبر پښتونخوا صوبايي حکومت وایي چې د باجوړ، مومند او خیبر سیمې د برطرفه شوي خاصه دار به لنډ وخت کې بحال کړل شي.

د جنورۍ پر ۱۸مه د صوبايي اسمبلۍ غونډې ته د وينا پر مهال د قانون صوبايي وزير سلطان محمد خان وويل چې تر دا مهال ۷۰۰ خاصه دار بحال شوي دي او پاتې ۲،۵۰۰ به ډېر ژر بحال شي.

هغه زیاته کړه چې د دوی لپاره کمیټۍ جوړه شوې او برطرفه خاصه دار کولای شي، کمیټۍ ته خپل نومونه او درخواستونه ورکړي چې حکومت ورباندې قانوني چلند وکړي.

پر برطرفه شويو خاصه دارو د پخوانۍ قبايلي انتظامیې لخوا تور وو چې دوی د طالبانو وسله والو ضد د پوځي عملیاتو پر مهال خپله دنده په ښه توګه نه وه ترسره کړې خو خاصه دار وايي چې دوی انکار نه وو کړې بلکې د حکومت په وينا کډواله شوي ول.

پاکستان کې کورونا نور ۵۸ تنه مړه کړي

په سیند کې روغتیاپالي د کورونا وایرس له ناروغۍ مړ شوي یوه تن مړی په اېمبولینس کې ږدي. ۲۰۲۰، ۰۹ نومب

په پاکستان کې په تېر يو شواروز کې له کورونا وایرسه ۵۸ کسان مړه شوي دي.

د پاکستان د روغتيا څانګې وېبپاڼې تر مخه دغه وایرس په تېرو ۲۴ ساعتونو کې ۱،۸۰۰کسان وهلي چې دا ډول په دې هېواد کې په کورونا وايرس د اخته کسانو ټول شمېر پنځه لکه او څه باندې ۲۳ زرو ته رسېدلی.

د جنورۍ تر ۱۹ مې له دې وايرسه په پاکستان کې ۱۱،۰۵۵ کسان مړه شوي خو تر څلورو لکو او ۷۶ زرو زیات ترې بیرته رغېدلي هم دي.

دا په داسې حال کې ده چې د خیبر پښتونخوا په ګډون د پاکستان په شااوخوا ټولو برخو کې د تعلیمي ادارو د بیا پرانیستو لړۍ د جنورۍ ۱۸ مې پیل شوې ده.

سکولونه په تېر نومبر کې د کورونا وایرس د زیاتېدونکو پېښو مخنیوي په موخه تړل شوي ول.

پاکستاني خبریالان د حکومت ضد ملک ګیر احتجاجونه پیلوي

د پاکستان خبريالانو وفاقي اتحاد، فيډرل يونين اف جرنلیسټس په لاهور کې تر درې ورځنۍ غونډې وروسته نن اعلان وکړ چې د حکومت پرضد به په ټول ملک کې احتجاج کوي.

د دوی له خوا په خپره شوې خبرپاڼه کې راغلې چې د تحريک انصاف حکومت پر مهال پر رسنيو بنديز زیات شوی او ګڼ خبريالان بې روزګاره شوي نو ځکه به دوی د اپرېل په لومړۍ اونۍ کې مظاهرې پیلوي.

د پنجاب صوبې د اطلاعاتو مشاورې، فردوس عاشق اعوان په لاهور کې د خبريالانو دې غونډې ته په وېنا کې وويل چې د بيان ازادۍ ته پوره درناوی لري او د خبريالانو حقونو ته پام کوي.

پي ډي اېم د ۱۹م جنورۍ احتجاج لپاره کړنلاره ټاکي

د پاکستان جمهوري تحريک مرکزي کمېټه نن غونډه کوي چې سبا د جنورۍ په ۱۹مه د انتخاباتو کمېشن مخې ته د احتجاج کړنلاره وټاکي.

د دې تحريک وياند، ميا افتخار حسېن نن مشال راډيو ته وويل چې د دې احتجاج مقصد د ټاکنو پر کمېشن فشار اچول دي چې واکمن تحريک انصاف ته له بهره ورغلیو چندو په اړه دې يوه فیصله واوروي.

د ۲۰۱۴ کال په نومبر کې د تحريک انصاف يو بنسټګر او پخواني غړي، اکبر بابر خپل ګوند ته له بهره د ناقانونه پیسو ورتلو خبره کړې وه او بيا یې کېس د ټاکنو کمېشن ته وړی وو. خو د عمران خان حکومت دا تورونه رد کړي دي او پر اپوزیشن ګوندونو، پيپلز پارټي او مسلم ليګ (ن) له بهره د غيرقانوني پیسو ترلاسه کولو تور پورې کوي چې هغو یې بې بنياده بولي.

چارواکي: تخار او کندهار کې د طالبانو د بریدونو مخه ونیول شوه

ارشیف، کندهار کې د افغان ځواکونو عملیات

په تخار او کندهار کې چارواکي د وسله والو طالبانو د بریدونو پر شا تمبولو او هغوی ته د زیانونو اړولو ادعا کړې ده.

د تخار د امنیه قوماندانۍ ویاند عبدالخلیل مشال راډیو ته وویل چې افغان امنیتي ځواکونو د دې ولایت په خواجه غار ولسوالۍ کې د طالبانو د یوې حملې مخه ونیوله.

نوموړي طالبانو ته د اوښتې مرګ‌ژوبلې په اړه وویل: "د صادق په نوم چې د لایزري قطعې مرستیال دی، په ګډون پنځه طالبان وژل شوي او څو تنه هم ټپیان دي."

اسیر په دغو نښتو کې خپل لور ته د یوه سرتېري د ټپي کېدو خبره وکړه.

بلخوا دفاع وزارت وایي، په کندهار کې یې د وسله‌والو طالبانو د پراخو بریدونو مخه نیولې او د دې ډلې له ۲۰ زیات وسله‌وال یې وژلي دي.

دې وزارت نن په یوه خپره کړې خبرپاڼه کې ویلي چې تېره ورځ طالبان د کندهار ولایت "ژړۍ" او " ارغنداب" ولسوالیو کې د دفاعي او امنیتي ځواکونو پر پوستو د برید په موخه راټول شوي وو چې دفاعي او امنیتي ځواکونو د فعالې دفاع په چوکاټ کې پرې بریدونه وکړل.

د دغو بریدونو په پایله کې ۲۵ طالبان ووژل شول او ۸ نور ټپیان شول.

د خبرپاڼې له مخې د نښتو په پایله کې د طالبانو دوه پناګاوې او یوه اندازه وسلې او مهمات له‌منځه یوړل شول.

طالبانو په تخار او کندهار کې دې ډلې ته د اړول شویو زیانونو په اړه د دغو ادعاوو په اړه تر اوسه څه نه‌دي ویلي.

امریکا او جرمني د مخالف روسي سیاستوال الیکسي ناوالني نیول وغندل

نیول شوی الکسي ناوالني

امریکا او جرمني په روس کې د حکومت مخالف سیاستوال الیکسي ناوالني نیول غندلي دي.

۴۴ کلن ناوالني چې له تېرې اګسټ میاشتې راهیسې په جرمني کې تر درملنې لاندې وو، د اتوار پر ورځ (پرون) د مسکو هوایي ډګر ته له رسېدو سره سم پولیسو ونیاو. د اخبره د هغه دوو ملګرو په ټویټونو کې کړې او ویلي یې دي چې ناوالني د خیمکي ښارګوټي کې یوې تاڼې ته وړی دی.

د امریکا د بهرنیو چارو وزیر مایک پومپیو په یوه بیان کې د ناوالني د "بې‌قیده او شرطه" خوشې کېدو غوښتنه کړې ده.

پومپیو د ناوالني د نیولو په اړه د امریکا اندېښنه په ډاګه کړې او دا ګام ‌یې د ناوالني او نورو هغو څېرو د غږونو غلي کول بللي چې د روس پر حکومت نیوکې کوي.

د جرمني د بهرنیو چارو وزیر هایکو ماس هم د ناوالني نیول غندلي او د هغه د زغرده پرېښودو غوښتنه ‌یې کړې ده.

د امریکا د منتخب ولسمشر جو بایډن ادارې هم چې د شورو/چارشنبې په ورځ کار پیلوي، د ناوالني د خوشې کېدو غوښتنه کړې.

د جنوبي افریقا د کرکټ لوبډله ۱۴ کاله وروسته پاکستان ته تللې ده 

د پاکستان او جنوبي افريقا کرکټ لوبډلو لومړۍ ټيسټ لوبه به پر ۲۶ جنورۍ په نيشنل لوبغالي کراچۍ کې پیل شي.

د جنوبي افريقي دکرکټ لوب ډله د جنوري په ۱۶ کراچۍ ته رسېدلې ده.

د پاکستان کرکټ بورډ ویاند عماد احمد حميد د جنورۍ پر ۱۶مه مشال راډيو ته ويلي
چې د ټولو لوبغاړو د کورنا معانيې شوې دي.

د ده په وینا، د نتيجو تر راتلو به ټول لوبغاړي قرنطین وي .

د پاکستان او جنوبي افريقا کرکټ لوبډلو لومړۍ ټيسټ لوبه به پر ۲۶ جنورۍ په نيشنل لوبغالي کراچۍ کې پیل شي.

د دوی تر منځ به دویمه لوبه پر ۴ مه فروري په راولپنډۍ کې وي. دا لوبډلې به د فرورۍ پر ۱۱، ۱۳مه او ۱۴مه ۲۰ اوریزې لوبې هم کوي.

پاکستان کې نړيوال کرکټ هغه وخت درېدلی وو چې د ۲۰۰۹ د مارچ پر درېمه په لاهور کې د سري لنکا پر لوبډله برید شوی وو.

د امریکا منتخب ولسمشر جوبایډن د ولسمشر ټرمپ ځینې پرېکړې بیرته اخلي

ټاکل شوې ده چې منتخب ولسمشر جوبایډن د جنورۍ پر ۲۰مه د ولسمشرۍ لوړه وکړي.

د امریکا منتخب ولسمشر جوبايډن به د واک ترلاسه وروسته د اوسني ولسمشر ډونلډ ټرمپ یو شمېر لانجمنې پرېکړې بیرته واخلي.

دا خبره د جوبایډن د دفتر مشر ران کلين د جنورۍ پر ۱۶مه خپلو کارکوونکو ته په یو لیک کې کړې ده.

ران کلین ویلي چې د جوبایډن په دې لومړیو ګامونو کې به د ځينې اسلامي هيوادونو پر وګړو امریکا ته د سفر بنديزونو کې نرمي راوستل هم شامل وي.

دا به د امریکا د تګلارو بدلولو په لړ کې د جوبایډن لخوا د یو شمیر صدارتي احکاماتو لومړی حکم وي.

په امریکا کې د ولسمشر احکامات د کانګرس لخوا قانوني منظورۍ او یا اجازت ته اړتیا نه لري.

ټاکل شوې ده چې منتخب ولسمشر جوبایډن د جنورۍ پر ۲۰مه د ولسمشرۍ لوړه وکړي.

د افغانستان په هرات کې ۱۲ افغان سرتېري وژل شوي

تر اوسه د دغه پېښې ذمه واري چا نه ده منلې.

د افغانستان په هرات ولایت کې د وسله والو طالبانو د یو ډلې په برید کې ۱۲ ځايي‌ افغان سرتېري وژل شوي دي.

د هرات ولایت د پولیسو ویاند عبدلاحد ولي زاده د جنورۍ پر ۱۶مه ویلي, دغه حمله تېره شپه ناوخته د طالبانو دریو تنو کړې ده،

دی زیاتوي چې برید کوونکي د وژل شویو سرتېرو له وسلو سره تښتېدلي دي او اوس سیمه بېرته د افغان حکومتي عسکرو په واک کې ده.

بلخوا د پولیسو په وینا, د جنورۍ پر ۱۶مه په کابل کې د پولیسو له یو موټر سره د مقناطیسې بم په چاودنه کې دوه پولیس چارواکي وژل شوي دي.

تر اوسه د دې پېښې ذمه واري چا نه ده منلې.

د حکومت خلاف د طالبانو لخوا د تشدد پېښې په داسې حال کې دوام لري چې په قطر کې د سولې د بین الافغاني خبرو په اړه داسې هیله مندي ښودل کېږي چې دغه به په افغانستان کې تل پاتې سوله راولي.

بلخوا داعش وسله والې ډلې په دغه هېواد کې په وروستیو میاشتو کې د ناامنۍ د یو شمېر پېښو ذمه واري منلې ده.

په نړۍ کې د کورونا وژلیو شمېر تر دوه میلیونه واوښت 

دا شمېره د جانز هاپکېنز پوهنتون لخوا اعلان شوه.

په نړۍ کې د کوېډ ـ ۱۹ ناروغۍ څخه د مړو شویو کسانو شمېره د جنورۍ پر ۱۵مه له دوو میلیونو واوښته.

دا شمېره د جانز هاپکېنز پوهنتون لخوا اعلان شوه.

د ملګرو ملتونو سیکرټري‌ جنرل انتونیو ګوتریش ویلي، دا یوه زړه بوګنوونکې شمېره ده.

په امریکا کې منتخب ولسمشر جوبایډن ویلي، د جنورۍ پر ۲۰مه د واک له ترلاسه کولو سره سم به هغه له ناورین سره د مبارزې فیډرالي ادارې کارکوونکي او ملي ګارډ د واکسینونو مرکزونو جوړولو لپاره په کار وګماري.

په همدې حال کې د اروپايي ټولنې د کوېډ ـ ۱۹ واکسینو لړۍ له هغې وروسته اغېزمنه شوې چې امریکايي درمل جوړوونکې ادارې فایزر او د هغې جرمنۍ همکارې ادارې بایو اېن ټیک اعلان وکړ چې هغوی په موقتي ډول اروپا ته د واکسینو لېږل کموي.

فایزر کمپنۍ ویلي، هغوی د دووه بیلیونه خوراکه واکسین تیارولو لپاره اړ دي چې په بیلجیم کې خپله فابریکه پیاوړې کړي.

واشنګټن کې د جوبایډن لوړې مراسمو وړاندې امنیتي تدابیر نیول شوي

چارواکي وايي، په واشنګټن کې د امنیت څارنې لپاره به د ملي ګارډ ۲۰ زره سرتېري موظف وي.

د جنورۍ پر ۲۰مه د امریکا منتخب ولسمشر جوبایډن د لوړې له مراسمو وړاندې په واشنګټن ډي سي کې د مظاهرو او لاریونونو په ترڅ کې د تشدد اندېښنو له کبله ځانګړې تدابیر نیول شوي دي.

د جنورۍ له ۱۵مې تر ۲۱مې به په واشنګټن کې نېشنل مال او هغه پارک تړلی وي چې پکې مشهور ملي څلي جوړ دي او عموما پکې په دودیزه ډول زیات شمېر خلک د لوړې مراسمو کتو لپاره ورټول وي.

د سپینې ماڼۍ شاوخوا سیمې هم تړل شوې دي.

چارواکي وايي، په واشنګټن کې د امنیت څارنې لپاره به د ملي ګارډ ۲۰ زره سرتېري موظف وي.

د جنورۍ پر شپږمه ټرمپ پلوه کسانو د امریکا په پلازمېنه کې مظاهرې وکړې چې پکې پينځه کسان ووژل شول.

د امريکا د تحقيقاتو فيډرالي ادارې (اېف بي ای) مشر کريسټوفر رې ( Christopher Wray ) د جنورۍ پر ۱۴مه ویلي، هغوی هغه انلاین ( پرلیکه) ډله تعقیبوي چې له خلکو څخه یې د مسلح مظاهرو غوښتنه کړې ده.

ملګري ملتونه وايي، په تېرو دوو لسیزو کې نړیواله کډوالي زیاته شوې

د ملګرو ملتونو راپور لیکي چې د نړیوالو کډوالو په درېیو کې دوه برخې یې په ۲۰ هېوادونو کې استوګنه لري.

د ملګرو ملتونو لخوا د جنورۍ پر ۱۵مه خپور شوي رپورټ کې ویل شوي چې په تېرو دوو لسیزو کې د نړیوالې کډوالۍ کچه لوړه شوې ده.

رپورټ لیکي چې په ۲۰۲۰ز کال کې دا شمېره ۲۸۱ میلیونو ته ورسېده کومه چې د نړۍ ټولې ابادۍ ۳،۶ فیصده کېږي.

خو د لومړنیو انګیرنو له مخې کېدای شي تېر کال د کورونا وایرس ناروغۍ له کبله د کډوالۍ په شرحه کې دوه میلیونه کمی راغلی وي.

د ملګرو ملتونو رپورټ لیکي چې د نړیوالو کډوالو په درې کې دوه برخې یې په ۲۰ هېوادونو کې اوسي.

امریکا په ۲۰۲۰ز کال کې د ۵۱ میلیونو کډوالو کوربه و. دا په نړۍ کې په کوم هېواد کې د کډوالو تر ټولو لویه شمېره ده کومه چې د ټولو کډوالو ۱۸ فیصده جوړېږي.

په جرمني کې نېږدې ۱۶ میلیونه، په سعودي عرب کې ۱۳ میلیونه، په روسیه کې ۱۲ میلیونه او په برتانیا کې نهه میلیونه پناه غوښتونکي موجود دي.

په ۲۰۲۰ز کال کې هند د هغو هېوادونو په سر کې و چې زیات وګړي یې په نورو هېوادونو کې ژوند کوي چې ۱۸ میلیونه هندیان دا مهال له هېواده بهر ژوند تېروي.

خیبر پښتونخوا کې د کورني تشدد مخنیوي بل منظور

د خېبر پښتونخوا اسمبلۍ کي نن د جمعې په ورځ د ښځو پرضد د کورني تشدد د مخنیوي بل منظور کړی دی.

دغه بل د خیبر پښتونخوا د ټولنیزې خير ښېګړې او د ښځو پرمختګ صوبايی وزیر هشام انعام الله اسمبلۍ ته وړاندې کړ.

د اسمبلۍ غونډي ته په خپله وینا کي هشام انعام الله وویل چې د دې قانون ترمخه به پر ښځو تشدد کوونکو ته د پنځوو کلونو د بند سزا ورکړل کيږي او په پنځلسو ورځو کي دننه به په عدالت کې د شوي تشدد خواست جمع کېږي او عدالت به په دوو میاشتو کي دننه د کورنې تشدد د قضیو د فیصلو کولو پابند وي.

د بل په مسوده کي لیکل شوي دي چې په کور کې په ښځو د وهلو ټکولو ترڅنګ معاشي، نفسیاتي، او جنسي فشار به هم تشدد ګڼل کېږي. د بل د مسودې ترمخه د کورني تشدد د پېښو د پلټنو لپاره به په هره ضلع کي یوه تحقیقاتي کمیټي جوړېږي او کمیټۍ به متاثره ښځو ته بیړنۍ طبي مرسته، سرپناه او د ژوند ضرورتونو لپاره د پېسو ضمینه برابروي.

خیبر پښتونخوا اسمبلۍ کي د کورني تشدد دا بل له تېرو اوو کلونو راهیسې ځنډنی وو او بیا وروستو د ټولو ګوندونو د اتفاق لپاره دا بل د اسمبلۍ ځانګړې کمیټۍ ته لېيږدول شوی وو او د بل په مسوده کي د ځینو ترمیمونو پس نن له اسمبلۍ منظور کړل شو.

سورلۍ کې د کورونا وایرس مثبتو پېښو پس چین ته پر پي ای اې بندیز

د پاکستان قامي هوايي شرکت پي ای اې

چين د پاکستان قامي هوايي شرکت پي ای اې پر پروازونو د درېوو اوونیو لپاره بندیز لګولی دی.

د راپورونو له مخې دا بندیز له هغه وروسته ولګول شو چې له اسلام اباده و بيجينګ ته دورغلې یوې الوتکې په ۱۰ مساپرانو کې د کورونا وایرس وو.

د جنورې پر ۱۵مه مشال راديو سره په خبرو کې د پي ای اې وياند عبدالله د چين لخوا د بندیز لګېدو پخلی وکړ.

نوموړي چې له پاکستانه د تلو پر مهال له دغو مساپرو سره د کورونا وایرس د معاينو منفي راپور وو خو بيجينګ ته له رسيدلو وروستو یې هلته راپور مثبت راغلی دی.

پاکستان سرکار د سکولونو پرانستلو پلان اعلان کړ

د جنورۍ له ۲۵ مې راهیسې به پرایمري سکولونه پرانستل شي او د لوړو زده کړو ادارې به د فېبرورۍ په لومړۍ نېټه پرانستل کېږي.

د پاکستان د تعلیم وفاقي وزیر د کورونا وبا له کبله د بندو سکولونو د پرانستلو لپاره پلان اعلان کړی دی.

په اسلام اباد کې د تعلیم او روغتیا وزارت د چارواکیو غونډې وروسته شفقت محمود یو خبري کانفرانس ته وویل چې های او هایر سیکنډري سکولونه به د جنورۍ په ۱۸مه نېټه بیرته پرانستل شي.

له حکومتي پلان سره سم به تعلیمي ادارې په مرحله واره توګه پرانستل کېږي.

د جنورۍ له ۲۵ مې راهیسې به پرایمري سکولونه پرانستل شي او د لوړو زده کړو ادارې به د فېبرورۍ په لومړۍ نېټه پرانستل کېږي.

د تعلیم وزیر وویل، د سکولونو له تړل کېدو سره زده کړې اغیزمنې شوي دي، خو د ماشومانو روغتیا حفاظت تر ټولو مهمه خبره وه، نو ځکه یې تعلیمي ادارې تړلې وې.

دا تعلیمي ادارې پروسږ کال د نومبر ۲۶ مې راهیسې تړلې پرتې دي خو کاروباري مرکزونه پرانستې دي او د ډاکټرانو په وینا په ډېرو ځایونو کې د کورونا مخنیوي په تدابیرو عمل نه کېږي.

د سکولونو پرانستلو په اړه پریکړه په داسې حال کې کېږي چې په پاکستان کې یو ځل بیا د کورونا د رنځورانو شمېره په ډیرېدو ده.

پاکستان کې د کورونا وایرس پېښې بیا زیاتې شوې

ډاکټران اندیښمن دي چې که چیرې بندیزونه عملي نه شي نو وایرس به لا خور شي خو حکومت وايي، نه غواړي چې خلک روزګارونه وبایلي او اقتصاد ته تاوان ورسي نو ځکه  ټولبند نه عملي کوي.

په پاکستان د کورونا څار مرکز ویلي چې د کورونا د رنځورانو شمېره بیا په ډېریدو ده او په تیرو ۲۴ ساعتونو کې د وایرس نورې ۳،۰۹۷ مثبتې پېښې ثبت شوي دي.


نېشنل کمانډ اپریشن سنټر په یو بیان کې ویلي چې په تیرو دوو میاشتو کې دا تر ټولو لویه شمېره ده.

په بیان کې راغلي چې په پاکستان کې د وایرس ناروغانو ټوله شمېره له پینځه لکه او ۱۰ زرو اوښتې ده او تر اوسه ترې له ۱۰ زرو ډېر کسان مړه شوي دي.

له وایرسه ۴۷۰،۰۰۰ کسان بیرته روغ شوي هم دي.

د جنورۍ پر ۱۴مه له مشال راډیو سره په خبرو کې د پاکستان انسټيیوټ اف میډیکل ساینسز ډاکټر فضل وهاب وویل چې په پاکستان کې لا واکسین نه شته نو د حفاظت یوازیني لاره په احتیاطي تدابیرو عمل کول دي. خو ډېر خلک یې نه عملي کوي چې ورسره وایرس لا خور شوی دی.

ډاکټران اندیښمن دي که بندیزونه عملي نه شي نو وایرس به لا خور شي خو حکومت وايي نه غواړي چې خلک روزګارونه وبایلي او اقتصاد ته تاوان ورسي نو ځکه ټولبند نه عملي کوي.

د تعلیم وفاقي وزیر د کورونا د وبا له کبله د بندو سکولونو د پرانستلو لپاره پلان اعلان کړی دی.

بایډن د کورونا وبا بحران مخنیوي لپاره مرستندویه پیکج وړاندې کړ

بایډن به د جنورۍ پر ۲۰ مه په رسمي توګه د خپلې ولسمشرۍ دوره پیل کوي.

د امریکا منتخب ولسمشر جو بایډن د کورونا وبا له کبله له رامنځ ته شوي بحران سره د مقابلې لپاره یو لوی مرستندویه پیکج وړاندې کړی دی.

نوموړی وايي، امریکا دغه پلان ته اړتیا لري.

بایډن به د جنورۍ پر ۲۰ مه په رسمي توګه د خپلې ولسمشرۍ دوره پیل کوي.

نوموړي موجوده صورتحال د انسانانو لپاره د کړاونو یو ژور بحران بللې او ویلي یې دي چې باید ستونزې بې له ځنډه هوارې شي.

بایډن د مالي مرستې د پیکج تجویز د جنورۍ پر ۱۴مه وړاندی کړ.

د مرستی ددغه پکیج ترمخه به ۴۱۵ اربه ډالر له دغه وایرس سره د مبارزې او د کوېد- ۱۹ واکسین وېشلو لپاره او یو ټریلیون ډالره مرستې به نیغ په نیغه امریکايي وګړیو ته ورکول کېږي.

دا لا یقیني نه ده چې ایا کانګرس به د بایډن پلان منظور کړي او که نه.

د ریپبلکن ګوند ګڼو استازو د ولسي مرستو په لوړ خرڅ او د پلان لپاره د قرض شوي رقم په کارولو اعتراضونه کړي دي. خو د کانګرس په دواړو ایوانونو کې د ډیموکریټ ګوند د استازو د شمېر ډېرېدل د پلان په منظورۍ کې مرسته کولی شي.

نړیوال ماهرین د کورونا وایرس سرچینې پلټنو لپاره چین ته ورسېدل

په مارچ کې د روغتیا نړیوال سازمان د وایرس خپرېدو ته په کتو جهاني وبايي حالت اعلان کړ.

د کورونا وايرس د ريښو معلومولو لپاره د صحت نړيوالې ادارې ماهرين تر اوږده ځنډ پس د جنورۍ پر ۱۴مه چين ته ورسېدل.

د چين سرکاري رسنيو راپور ورکړی چې په لسو غړو مشتمله د پوهانو نړيواله ډله ووهان ته رسېدلې.

تمه څرګندېږي چې دوی به په هغه ښار کې يوه مياشت ايسار وي چېرته چې د ۲۰۱۹ ز کال په اخره کې په لومړي وار کورونا وايرس معلوم شوی و.

د امريکا، اسټراليا، جرمني، جاپان، برتانيا،روس، قطر، نېدرلېنډز او ويتنام دا ماهرين به په قرنطين کې خپل کار پیل کوي او چينايي ماهرينو سره به د ويډيو کانفرنس د لارې غونډه کوي.

د صحت نړيوالې ادارې ( ډبليو اېچ او) مشرتېره اوونۍ د دې سفر لپاره د انتظاماتو پر ځنډ د خپګان څرګندونه کړې وه.

نوموړي ويلي ول چې د ساينس پوهانو تمرکز به پر دې وي چې څرنګه په لومړی ځل کورونا وايرس انسانانو ته ولګېدو.

د کورونا وايرس د ريښو په اړه داسې اټکل کېږي چې دا خاپرکو راوړی او د هغه ځناور په وسيله انسانانو ته خور شوی چې د ووهان په مارکېټ کې د خوراک يا دوايي لپاره خرڅ شوی و.

چينايي حکومت بيا دا نظرې خورې کړي دي چې کورونا وايرس د درامد شوي خراب سمندري خوراک له وجې مخې ته راغلی دی خو نړيوال ساينس پوهانو او ادارو بيا دغه دريځ رد کړی دی.

د پوځ مشر کوټه کې د وژليو هزاره کانکیندونکيو له کورنیو سره وليدل

د پاکستان پوځ مشر جنرال قمر باجوه

د پاکستان پوځ مشر په کوټه کې د وژليو هزاره کانکیندونکيو له کورنیو سره ليدلي دي.

د پوځ عامه اړيکو ادارې" ای اېس پي ار" په بيان کې ويلي چې جنرال قمر باجوه د جنورۍ پر ۱۳مه د وژل شويو کسانو کورنيو ته ډاډ ورکړ چې د دې پېښې عاملينو ته به سزا ورکول کېږي.

دغه ۱۰ کانکیندونکي د جنورۍ پر څلورمه د مچ په سيمه کې وژل شوي ول چې ذمه واري يې داعش وسله والې ډلې منلې وه.

د وژل شوو هزاره ګانو مړي خاورو ته وسپارل شو
تم شئ

هېڅ میډیايي سرچینه اوس نشته

0:00 0:01:56 0:00

له دې وروسته هزارګانو له مړو سره په کوټه کې تر شپږو ورځو پورې درنا ورکړه.

د پوځ بيان زياتوي چې جنرال باجوه ته د غونډې پر مهال د بلوچستان پر امنيتي حالاتو مالومات ورکړل شول.

وروسته نوموړي پوځي افسرانو ته په وينا کې وويل چې بلوچستان ډېر سټرېټېجک ارزښت لري چې نو ځکه د ده په ادعا د دښمنانو ورباندې نظر دی.

خو زياته يې کړه چې د دښمنانو لخوا د حالاتو ګډوډولو هڅې به کاميابۍ ته پرې نه ښوول شي.

د افغانستان او ترکمنستان ولسمشران درې مهمې پروژې پرانیزي

افغان ولسمشر محمد اشرف غني او ترکمنستان قربان قلي بردي محمدوف د ویډیو کانفرانس له لارې د پرانستې دغو مراسمو کې برخه اخلي او ویناوې هم کوي.

ټاکل شوې چې د افغانستان او ترکمنستان ولسمشران د جنورۍ پر ۱۴مه د دواړو هېوادونو ترمنځ درې مهمې پروژې پرانیزي.

په دغو پروژو کې یوه یې د اقینې-اندخويي ترمنځ د ریل پټلۍ ده چې د جوړېدو کارونه یې په دې وروستیو کې مکمل شوي او دوه نورې پروژې د برښنا د لېږد او شمسي فایبر دي.

افغان ولسمشر محمد اشرف غني او ترکمنستان قربان قلي بردي محمدوف د ویډیو کانفرانس له لارې د پرانستې دغو مراسمو کې برخه اخلي او ویناوې هم کوي.

د تېرې جمعې په ورځ د ترکمنستان د بهرنیو چارو وزیر د همدغو پروژو په تړاو د بحث لپاره په یوه دوه ورځني سفر کابل ته تللی و.

شاوخوا یوه میاشت وړاندې د ایران او افغانستان ترمنځ د هرات- خواف د اوسپنې پټلۍ هم پرانستل شوه چې ۲۲۵ کیلو متره اوږدوالی لري.

جلال اباد کې درې داعش وسله وال وژل شوي

چاوراکي وايي، په دې عملیاتو کې ولسي وګړو ته کوم زیان نه دی اوښتی.

د ننګرهار چارواکي ادعا کوي، بېګا شپه د ملي امنیت ځانګړو ځواکونو د جلال اباد ښار په باګرامیو کې درې تنه داعش وسله وال د نښتې پر مهال وژلي دي.

د ننګرهار ولایت مطبوعاتي مسوول عطاالله خوږیاڼي د جنوري پر ۱۳مه مشال راډیو ته وویل چې له دغه داعش وسله والو څخه درې دانې کلاشنکوفونه، ۱۸ شاژورنه، يو قبضه راکټ له څلور فايره مرميو سره، ۵ کړۍ لاسي بمونه، دوه عرادې موټرونه، يوه هندي ريکشا، يو پايه لب ټاپ کمپيوټر، ۳ سيټه موبايلونه، يو عدد هارډسک، او ۱۰ متره ثانيه سوز لين د امنیتي ځواکونو لاسته ورغلل.

د خوږیاڼي په دې عملیاتو کې ولسي وګړو ته کوم زیان نه دی اوښتی.

پاکستان کې له کووېډ-۱۹ ناروغۍ نور ۵۵ تنه مړه شوي

په پاکستان کې د کورونا وایرس تر ټولو زیاتې پېښې په سېند صوبه کې مخې ته راغلي خو تر ټولو زیات کسان یې په پنجاب کې مړه کړي دي.

په پاکستان کې په تېرو ۲۴ ساعتونو کې د کورونا له وجې نور ۵۵ کسان مړه شوي چې ورسره په دې هېواد کې له یادې ناروغۍ له وجې د مړو شویو کسانو ټول شمېر ۱۰،۷۷۲ ته ورسېده.

د کورونا وايرس په اړه د حکومتي ويبپاڼې ترمخه، په تېر شوا روز کې د کورونا وایرس نور ۲۱۲۳ کیسونه ثبت شوي چې ورسره په پاکستان کې د کورونا وایرس وهلو ټول شمېر پنځه لکه اته زره ۸۲۴ ته ورسېده. خو څلور لکه، ۶۴ زره او نهه نیم سوه ترې بېرته رغېدلي هم دي دي.

دا مهال په دې هېواد کې د کورونا د فعالو کېسونو شمېر ۳۳ زره یو سل او دوه ده.

بلخوا د کورونا نړیوالې شمېرې راټولوونکی امریکايي جان هاپکینز پوهنتون وايي، د جنورۍ تر ۱۳ مې دې وبا په ټوله نړۍ کې له نهو کروړو، ۱۵ لکو او ۳۹ زرو زیات کسان ناروغه کړي چې پکې یې څه د پاسه ۱۹ لکه او ۵۹ زره مړه کړي خو له پنځو کروړو، پنځو لکو او ۷۶ زرو څخه زیات ترې بېرته رغېدلي هم دي.

افغانستان کې پروسږکال د ساه او زړه ناروغۍ څخه نېږدې ۵۰۰۰ کسان مړه شوي

د وزارت په خبره، د دې ناروغیو وجه د هوا ککړتیا ښکاري.

د افغانستان روغتیا وزارت وايي، پروسږکال په دې هېواد کې د ساه او زړه ناروغیو له کبله نېږدې ۵۰۰۰ کسان مړه شوي دي.

د وزارت په خبره، د دې ناروغیو وجه د هوا ککړتیا ښکاري.

ډي پي اې خبري اژانس خبر ورکړی چې د وزارت له معلوماتو سره سم، په دې کې لس فيصده په کابل کې مړه شوي دي.

د وزیر اکبر خان روغتون مشر ډاکټر عبدالله احمدي ډي پي اې ته ویلي چې هره ورځ په اوسط ډول ۲۰ د ساه ناروغان روغتون ته ورځي.

نوموړي زیاته کړه، دامسلې زیاتره د هوا ککړتیا له وجې دي.

د ماحولیاتو د خوندیتوب ملي ادارې یو چارواکي ویلي، د هوا ککړتیا زیاتېدو مهم وجوهات په یخنۍ کې د سکرو زیات استعمال، پخواني ګاړي او ناسم سړکونه دي.

دا مسلې د بجلۍ کمیښت، د پیټرولو لوړ قیمتونه او د غیر معیاري تیلو له وجې هم دي.

د روغتیا نړیواله اداره ډبلیو ایچ او وايي، د هوا ککړتیا یوه نړیواله مسله ده او له اټکل سره سم، هرکال ترې په نړۍ کې اووه میلیونه کسان مړه کېږي.

اسلام اباد کې د پاکستان، ترکیې او اذربایجان د بهرنیو چارو وزیرانو غونډه

د پاکستان، ترکیې او اذربایجان ترمنځ د دا ډول خبرو لومړۍ پړاو د ۲۰۱۷ز کال پر نومبر کې په باکو کې شوی وو.

د جنورۍ پر ۱۳ مه د پاکستان، ترکیې او اذربایجان د بهرنیو چارو وزیران په اسلام اباد کې غونډه کوي.

د پاکستان د بهرنیو چارو وزارت په خپله ویبپاڼه لیکلي چې وزیران به پر نړیوالو او سیمه ییزو مسلو، د سیمې امنیت ته د ګواښونو، د کوېډ -۱۹ له کبله راپورته شوو ننګونو، اب او هوا بدلون او د اقتصادي پرمختیا پر اهدافو خبرې کوي.

وزارت زیاتوي، په غونډه کې به د شریکو ګټو په برخو کې د درېوو واړو هېوادونو ترمنځ د همکارۍ زیاتولو په ګډون امنیت، تجارت او سرمایه کارۍ، ساینس او ټیکنالوژۍ، تعلیم او کلتور په اړه هم خبري کېږي.

د پاکستان، ترکیې او اذربایجان ترمنځ د دا ډول خبرو لومړۍ پړاو د ۲۰۱۷ز کال پر نومبر کې په باکو کې شوی وو.

نور پورته کړئ

ځانګړې پاڼې

له موږ سره اړیکي

XS
SM
MD
LG