د امریکا ولسمشر ډونلډ ټرمپ وایي امر یې کړی چې که ایراني بیړۍ امریکایي بېړیو ته مزاحمت کوي پوځیان دې برید پرې وکړي او له منځه دې یوسي.
هغه دا خبره د اپرېل پر ۲۲مه، پر ټوېټر په بیان کې کړې ده.
ټرمپ په ماښامنۍ خبرې غونډه کې هم د ټویټ یادونه وکړه او ویې ویل چې نه غواړي ايرانۍ بېړۍ په هېڅ ځای کې امريکايي بیړیو ته نېږدې شي.
اخوا د ایران د وسله وال پوځ ویاند د ټرمپ د دې خبرو په غبرګون ویلي چې د هغه هېواد چارواکي دې د خپل ځان ژغورلو او د کورونا وایرس وبا د مسلې د حل په فکر کې واوسي.
څو ورځې مخکې په خلیج پارس کې د امریکا د سمندري ځواکونو کښتيو ته د ایران د انقلابي ساتندويانو ځواکونو بیړۍ ورنېږدې شوې وې.
امریکا ویلي و چې د دوی بحري پوځیانو په نړیوالو اوبو کې مشقونه کول.
