د لاسرسي ځای

تازه خبر

خبرونه

افغانستان: د کورونا وړجنو شمېر ۲۴ ته ورسېد

هرات کې په کرونا ویروس اخته کسانو لپاره ځانګړی شوی روغتون

د افغانستان عامې روغتیا وزارت وايي، چې په دې هېواد کې د کرونا ویروس د دوو نویو پېښو په راتلو سره یې شمېر ۲۴ ته لوړ شوی.

د دې وزارت ویاند وحیدالله مایار رسنیو ته په یوه استولي پیغام کې ویلي، دواړه پېښې په هرات کې ثبت شوي دي.

مایار زیاتوي، ۳۰ نورې مشکوکې پېښې په لابراتوارونو کې د تر څېړنو لاندې دي چې وروسته به یې جزیات له رسنیو سره شریک شي.

هرات ۱۵، سمنګان ۳، لوګر ۲، بلخ، کاپیسا، دایکندي او بادغیس د کرونا ویروس یوه یوه مثبته پېښه لري.

د هرات روغتیايي چارواکي وایي په دغه ولایت کې په کرونا وایروس د خلکو د اخته کېدو پېښې ۱۵ ته رسېدلي دي.

د هرات د حوزوي روغتون د انتاني ناروغیو د څانګې مسوول محمد ابراهیم بسیم ازادۍ راډیو ته وویل، چې په کرونا ویروس په اخته کسانو کې ۲ ښځې هم شاملې دي.

د ښاغلي بسیم په خبره دا مهال ۴۷ کسان چې شک کېږي په دې وایروس به اخته وي، د ډاکټرانو تر جدي څار لاندې دي.

په هرات کې په کرونا لومړی اخته کس، تر یوې میاشتې درملنې وروسته روغ او پرون هرات له روغتونه رخصت کړای شو.

د دې ویروس د خپرېدو له اوازو سره جوخت په هرات کې تر ۱۹۰ زیات کسان چې شک کېده په دې وایروس به اخته وي د ډاکترانو له خوا په جدي ډول معاینه شوي دي.

د نننۍ ورځې ټول خبرونه وګورئ

د پنجاب، ډسکه ضمني -ټاکنې کالعدم، پر ۱۸ مارچ بیا ټاکنې کېږي

د پاکستان انتخاباتي کمېشن د مارچ پر ۱۸مه د پنجاب په سیالکوټ کې د ډسکې پر حلقې د بیا انتخاباتو کولو اعلان کړی دی.

دا اعلان د انتخاباتي کمېشن مشر سکندر سلطان راجا په مشرۍ یوې پینځه کسیزه کمېټۍ نن په ضمني انتخاباتو کې د درغلۍ د تورونو په اړه د قضیې تر اورېدنې وروسته کړی.

د فبرورۍ پر ۱۹مه د پاکستان مسلم لیګ (ن) نوماندې نوشین افتخار د قامي اسمبلۍ د ۷۵مې حلقې په ضمني انتخاب کې د درغلۍ او د پریزایډینګ افسرانو ورکولو تور پورې کړی وو.

په عین وخت کې د واکمن تحریک انصاف نوماند علي اسجد د حلقې په ۲۰ انتخاباتي مرکزونو کې د بیا انتخاباتو غوښتنه کړې وه. انتخاباتي کمېشن وار له مخې د قامي اسمبلۍ د څوکۍ لپاره د انتخاباتو نتیجه ځنډولې وه.

د جرمني څارنوالانو پر یوه هېوادول د جاسوسۍ تورونه لګولي

د څارنوالانو په خبره، د روسي سفارت کارکوونکی "اصلاً د روسیې پوځي استخباراتو (جي ار یو) لپاره کار" کوي. ارشیف- انځور

پر دې سړي شک دی چې په برلېن کې یې د جرمني د پارلېمان ودانۍ نقشه روسیو استخباراتو ته ورکړې.

چارواکو د مشکوک کس نوم یوازې ینز اېف ښوولی او وايي چې هغه له یوه شرکت سره کار کاوه چې بونډسټاګ یا د جرمني ولسي جرګې ورسره په ودانۍ کې د برېښنايي الاتو د باقاعده معاینې قرارداد کړی وو.

څارنوالانو ویلي، ودانۍ ته د لاسرسۍ له وجې دې کس د پارلېمان نقشې غونډې کړې وې او د ۲۰۱۷ز کال په اوړي کې یې په برلېن کې د روسي سفارت یوه کارکوونکي ته ورکړې وې.

د څارنوالانو په خبره، د روسي سفارت کارکوونکی "اصلاً د روسیې پوځي استخباراتو (جي ار یو) لپاره کار" کوي.

د جرمني چارواکو په سمدستي ډول پر دې موضوع نور تفصیل نه دی ورکړی.

د ارمنیا پوځ پر وزیراعظم د استعفا ورکولو غږ کړی

وزیراعظم نېکول پاشینیان

د ارمنیا پوځ له وزیراعظم نېکول پاشینیان او د هغه له حکومته د استعفا ورکولو غوښتنه کړې، خو وزیراعظم دعوه کړې چې دا د پوځي کودتا هڅه ده.

د پوځ د مشر دفتر مطبوعاتي ویاند سموېل اساتریان نن(د فبرورۍ پر۲۵مه) په بیان کې ویلي چې دا غوښتنه یې د غیر معقولو دلایلو پر اساس د پوځ د مشر د لومړي مرستیال د ګوښه کولو پر ضد د کلک احتجاج په توګه کړې.

د پوځ بیان وايي،" حکومت دا کار د ارمنیا د ملي او دولتي ګټو ته له پام کولو پرته کړی. او په داسې سختو شرایطو کې دا ډول پرېکړه د دولت ضد ده او غیر مسوولانه اقدام دی."

پوځي بیان زیاتوي: "د ارمنیا جمهوریت وزیراعظم او حکومت به په دې مشکل وخت کې د ارمنيو وګړو لپار نور مناسبې فیصلې ونکړای شي."

تر اوسه دا روښانه نه ده چې ایا پوځ به د خپل بیان د ملاتړ لپاره ځواک وکاروي او که نه.

پاشینیان د دندې پرېښودو غوښتنه رد کړې او پر ځای یې د پوځ د مشر اونېک ګاسپریان د ګوښه کولو اعلان کړی.

نوموړي همدارز پر خپلو ملاتړیو غږ کړی چې د ارمنیا د پلازمېنې یرېوان مرکز ته ورغونډ شي.

عمر داودزی نن د افغان سولې په باب له پاکستانيو چارواکو سره غږېږي

پاکستان لپاره د افغان ولسمشر ځانګړی استازی محمد عمر داودزی

ټاکل شوې چې د پاکستان لپاره د افغان ولسمشر ځانګړی استازی محمد عمر داودزی نن (د فبرورۍ پر ۲۵مه) په اسلام اباد کې د بهرنیو چارو له وزیر شاه محمد قریشي سره وګوري.

نوموړی د فبرورۍ پر ۲۴مه د یوه پلاوي په مشرۍ په درې ورځني سفر اسلام اباد ته ورسېد او بېګا یې د افغانستان لپاره د پاکستاني وزیراعظم عمران خان له ځانګړي استازي محمد صادق سره ولیدل.

د دې سفر هدف د افغانستان د سولې په بهیر کې د پاکستان پر رول خبرې کول دي.

د افغان ولسمشر ځانګړی استازی به د پاکستان او افغانستان د سولې د کمېټۍ په غونډه کې هم ګډون کوي.

دا کمېټي تېر کال په نومبر کې کابل ته د پاکستاني وزیراعظم عمران خان تر تګ وروسته جوړه شوې وه.

داودزی پر داسې مهال اسلام اباد ته تللی چې په قطر کې د طالبانو او افغان حکومت مرکچي پلاویو ترمنځ خبرې له ډېسېمبر راهیسې د ځنډ ښکار دي.

د شام استخباراتو یو پخوانی کارمند د جرمني یوه عدالت په بند سزا کړی

د جرمني یو عدالت د شام د استخباراتو یو پخوانی کارمند د بشريت پر وړاندې د جرمونو د ملاتړ په تور په څلور نیم کاله بند محکوم کړی دی.

دا د نړۍ په کچه لومړی ځل دی چې په شام کې د کورنۍ جګړې پر مهال د سرغړونو په تور یو چا ته سزا اورول کېږي.

په کوبلینز کې سیمه یزه لوی عدالت د فبرورۍ پر ۲۴مه ایاد الغریب په ۲۰۱۱ز کال کې په دوما سیمه کې د لږ تر لږه ۳۰ حکومت ضد مظاهرچیانو د نیولو او بیا د دمشق په یوه داسې ځای کې د بندي ساتلو مجرم ګرځولی دی، چیرې چې هغه پوهېده چې دوی به شکنجه کېږي.

۴۴ کلن ایاد الغرب د شام په استخباراتو کې یو تیټ- پوړی چارواکی وو چې له شامه وتښتیده او په ۲۰۱۸ز کال کې د پناه لپاره جرمني ته ورسید.

هغه په کال ۲۰۱۹ز کې ونیول شو.

د بشري حقونو ډلو دا پرېکړه یو داسې ګام بللی دی چې په نتیجه کې به یې د شامي حکومت د هغه پخوانیو غړیو پرضد مقدمې جوړې شي او محاکمه به شي پر چا چې په جنګي جرمونو کې د لاس درلودو شک کېږي او اروپايي هېوادونو ته تښتېدلي دي.

اټومي تړون ته د ستنېدو لومړی ګام دې امریکا واخلي: ایران

په جنیوا کې د ملګرو ملتونو لپاره د ایران دایمي استازی اسماعیل بقايي هامانه

ایران ویلي دي چې امریکا باید د تهران او نړۍ د ځواکمنو هېوادونو ترمنځ د ۲۰۱۵ز کال د اټومي موافقې د خوندي کولو لپاره لومړي اقدامات وکړي.

دا خبره د ملګرو ملتونو لپاره د ایران استازي اسماعیل بقایي هامانه پرون (د فبرورۍ ۲۴مه) په جینیوا کې د بې وسلې کولو په اړه د ملګرو ملتونو په ملاتړ یوې غونډې ته کړې ده.

تر دې یوه ورځ مخکې ایران په رسمي ډول د خپلو اټومي تاسیساتو نړیوال تفتیشونه محدودول پیل کړل چې د اقتصادي بندیزونو لیرې کولو او موافقې بیا پر ځای کولو لپاره پر واشنګټن او اروپايي هیوادونو فشار راولي.

د امریکا د پخواني ولسمشر ډانلډ ټرمپ حکومت په ۲۰۱۸ز له هغې موافقې ووت چې د ایران د اټومي پروګرام د محدودولو په بدل کې یې پر تهران زیاتره نړیوال بندیزونه ختم کړل.

اوس د ولسمشر جو بایډن حکومت د ټرمپ د پرېکړې د لغوه کولو په لټه کې دی خو د ایران له لوري د موافقې سرغړونه او د نړیوالو څارنو محدودول د دې کار د مشکلاتو ښکارندويي کوي.

د احسان الله احسان خوشېکونکي اهلکاران سزا شوي: پاکستاني پوځ ویاند

احسان الله احسان ارشیف-انځور

د پاکستان پوځ وايي، د طالبانو د پخواني ویاند احسان الله احسان له بنده د تښتېدو ذمه وارو ته یې سزا ورکړې ده.

دا خبره د پوځ ویاند میجر جنرل بابر افتخار د فبرورۍ پر ۲۴مه په راولپنډې کې د بهر ملکي میډیا ځيني خبریالانو ته د وینا پر مهال کړې ده.

نوموړي زیاته کړه چې له بنده د احسان الله احسان تېښته یوه جدي معامله وه چې بشپړې پلټنې یې شوي دي او د ذمه وارو پوځي چارواکیو پر ضد قانوني کاروایي شوې ده.

د پوځ ویاند وویل، د طالبانو پخواني ویاند د بیا نیولو لپاره هڅې روانې دي خو هغوی دا مهال د هغه د ځای ځایګي په اړه څه مالومات نه لري.

احسان الله احسان د ۲۰۱۷ز کال د فبرورۍ په میاشت کې خپلځان د پاکستان استخباراتي ادارو ته سپارلی وو. خو پروسږ کال (۲۰۲۰) د فبرورۍ په میاشت کې خبرونه خپاره شو چې هغه د امنیتي ځواکونو له ولکې تښتېدلی دی. وروستو بیا د کورنیو چارو وزیر اعجاز شاه هم د دغه خبر تصدیق وکړ.

تېره اوونۍ د احسان الله احسان له خپله ټویټره د نوبېلوالې او د تعلیم مبارزې ملاله یوسفزۍ ته دړکې ورکړې وې. په دغه اړه د یوې پوښتنې په ځواب کې د پوځ ویاند وویل چې د هغه د مالوماتو تر مخه دغه اکاونټ جعلي دی.

ملالې یوسفزۍ د احسان الله احسان د دغه ټویټ په غبرګون کې د پاکستان له پوځي چارواکو ځواب غوښتی وو چې پخوانی طالب ویاند مو له بنده څنګه ازاد شو؟ وروسته ټویټر ادارې د احسان الله احسان د ټویټر اکاونټ ورتاړه.

د یادونې وړ ده چې د طالبانو پخواني ویاند احسان الله احسان پر ملالې یوسفزۍ له برید سره سره په پاکستان کې د یوشمېر ترهګرو بریدونو ذمه واري قبوله کړې ده. ملاله یوسفزۍ له برید وروسته د برتانیا برمنګهم ښار ته د درملنې لپاره یووړل شوه او لاهم هلته میشته ده.

د لاهور عدالت د حمزه شهباز ضمانت منظور کړ

لاهور های کورټ په پنجاب اسمبلۍ کې د اپوزيشن مشر او مسلم ليګ (ن) مخکښ حمزه شهباز د ضمانت درخواست منظور کړی دی.

د پاکستان ډان رسنۍ وايي چې په مني لانډرنګ يا تورو پيسو سپينولو په کېس کې د نېول شوي حمزه شهباز د ضمانت په درخواست نن( د فبرورۍ پر ۲۴مه) اورېدنه وشوه.

د احتساب قامي ادارې نېب لخوا ځانګړی څارنوال سيد فیصل رضا بخاري وړاندې شو او د حمزه شهباز لخوا وکيلان اعظم نذير تارړ او امجد پروېز وړاندې شول.

عدالت د دواړو خواو لخوا د دلايلو تر اورېدو وروسته د حمزه شهباز درخواست منظور کړ او ورته يې د يو يو کروړ روپو د دوو ضمانتي مچلکو د جمع کولو امر وکړ.

عدالت جېل چارواکو ته امر کړی چې د مچلکو تر جمع کولو وروسته حمزه شهباز خوشي کړي.

بلخوا د مسلم ليګ (ن) يو غړي عطا تارړ په لاهور کې له خبريالانو سره په خپلو خبرو کې وويل چې حمزه شهباز له تېرو شلو مياشتو راهيسې په ناحقه قېد و او پرې د يوې روپۍ کرپشن نه دی ثابت شوی.

د پاکستان لپاره د افغان ولسمشر ځانګړی استازی داودزی د اسلام اباد په سفر دی

پاکستان لپاره د افغان ولسمشر ځانګړی استازی محمد عمر داودزی

پاکستان لپاره د افغان ولسمشر ځانګړی استازی محمد عمر داودزی د فبېرورۍ پر ۲۴مه د چارشنبې په ورځ (نن) اسلام اباد ته ورسېد.

د مشال رېډيو خبريال طاهر خان وايي چې دوادزی به له پاکستانيو چارواکو سره په افغان سولې پروسه خبرې کوي.

د افغان ولسمشر ځانګړی استازی به د سولې پروسې په اړه د پاکستان او افغانستان امن کمېټې په غونډه کې د خپل هېواد استازيتوب هم کوي. دغه کمېټه د تېر کال په نومبر مياشت کې افغانستان ته د پاکستاني وزيراعظم تر سفر وروسته جوړه کړل شوې وه.

دا په داسې حال کې ده چې د افغان حکومت او طالبانو د سولې مذاکراتي ټيمونو له نېږدې پنځو اونیو ځنډ وروسته د فبرورۍ پر ۲۲مه سره وليدل. د افغان حکومت مرکچي ټیم په خپل ټوېټر باندې په دې اړه یو لنډ بیان خپور کړی و. بلخوا د طالبانو د سیاسي دفتر ویاند محمد نعیم رسنیو ته په استولي پيغام کې ویلي دي چې په ياده ناسته کې د تماس ډلو ته دنده ورکړل شوه چې ناستو ته دوام ورکړي.

د سولې مذاکراتي ټیمونو په داسې وخت سره وکتل چې د طالبانو په ډلې باندې د افغان حکومت له خوا خبرو ته د نه حاضرېدو انتقادونه کېدل.

شمالي وزیرستان کې پوځ د ټي ټي پي د یوه قوماندان د وژلو ادعا کوي

په بيان کې راغلي چې د ډزو په تبادله کې د تحريک طالبان پاکستان حافظ ګل بهادر ډلې قومندان حسن عرف سجنا ووژل شو.

د پاکستان پوځ د فبرورۍ پر ۲۳مه په شمالي وزيرستان کې تر بندېز لاندې وسله والې ډلې تحريک طالبان پاکستان د یو مهم قومندان حسن عرف سجنا د وژلو ادعا کړې.

د پاکستان سرکاري راډيو د پوځ مطبوعاتي څانګې اې‌ اېس پي ار مشر په حواله د فبرورۍ پر ۲۳مه خبر ورکړې ‌چې امنيتي ځواکونو د استخباراتي معلوماتو پر اساس د شمالي وزيرستان په ميرلي کې عمليات وکړل.‌

په بيان کې راغلي چې د ډزو په تبادله کې د تحريک طالبان پاکستان حافظ ګل بهادر ډلې قومندان حسن عرف سجنا ووژل شو.

‌ د پوځ په خبره حسن عرف سجنا په مبينه توګه په ميرلي کې د څلورو ښځينه کارکوونکو په وژنه کې ککړ وو او په یو شمېر نورو هدفي بریدونو کې یې لاس لرلو.

د پوځ ادعا په اړه وسله والې ډلې تر اوسه څه نه دي ویلي.

د پاکستان قامي اسمبلۍ پر ماشومانو د تشدد خلاف بل منظور کړی

د قانوني مسودې له مخه پر ماشومانو جسماني تشدد، ورته سپکې خبرې کول، دړکې ورکول، ویرول، ګرمې اوبه ورباندې اړول یا غوږونه یې تاوول او وهل به قانوني جرم وي.

دغه قانوني مسوده چې په قامي اسمبلۍ کې د مسلم لیګ نون ګوند غړې مهناز اکبر وړاندې کړ، د فبرورۍ پر ۲۳مه د اسمبلۍ ټولو غړیو په یوه خوله منظوره کړ.

د قانوني مسودې له مخه پر ماشومانو جسماني تشدد، ورته سپکې خبرې کول، دړکې ورکول، وېرول، ګرمې اوبه ورباندې اړول یا غوږونه یې تاوول او وهل به قانوني جرم وي.

هغه څوک چې په دې جرم کې ککړ وي ورته به هېڅ کله سرکاري نوکري هم نه ملاوېږي.

په مسوده کې د تعذیرات پاکستان د یو قانون د هغه مادې د ختمولو غوښتنه شوی چې وايي پلار، استاد یا بل څوک کولای شي د ماشوم د اصلاح لپاره ورته جسماني سزا ورکړي. خو په قانوني مسوده کې د ترمیم

غوښتنه په دې بنیاد شوی چې په دې سره پر ماشومانو د جسماني تشدد مخه نه شي نیول کېدای. دغه بل تر دې مه په اسلام اباد کې پر ماشومانو د تشدد مخنیوي لپاره دی.

دغه بل به اوس سېنېټ ته وړاندې کېږي چې د ولسمشر تر لاسلیک وروسته به د قانون برخه وګرځي.

دا په داسې حال کې ده چې پر ماشومانو د تشدد ډېرې پېښې په سکولونو او مدرسو کې رپورټ شوي دي.

افغان چارواکي وايي، طالبانو د مرکزي بغلان د روغتون مسوول وژلی دی

خلیل الرحمان نرمگوی

افغان چارواکي وايي وسله والو طالبانو د فبرورۍ پر ۲۳مه مازیګر د مرکزي بغلان ولسوالۍ د روغتون مسوول ډاکتر خلیل الرحمن نرمګوی وژلی دی.

د کورنیو چارو وزارت ویاند طارق ارین د نرمګوی وژل کېدل تایید کړي.

هغه ویلي، د تحصیلي کړیو د وژنې دوام دا قشر له منځه نه وړي بلکې د ده په خبره زرګونه نور ډاکټران، انجینران، خبریالان او دیني عالمان ژوند او کار ته ولاړ دي.

اخوا د افغانستان د بشري حقونو خپلواک کمېسیون مشرې شهرزاد اکبر هم د ډاکټر خلیل الرحمن نرمګوی په وژنې خواشیني ښودلې.

هغې په خپل ټوېټر لیکلي، د هدفي وژنو په لړ کې چې ټول افغانستان کې زیاتې شوي ګڼ ملکیان، فعالان او په کارپوه خلک له منځه وړل کېږي.

طالبانو په دې اړه څه نه دي ویلې.

پر سرکاري کمپیوټري شبکو د بریدونو ترشا د یوه هېواد لاس ښکاري: امریکا

د شرکتونو مشرانو د فبرورۍ پر ۲۳مه د کانګرس په استماعیه غونډه کې دا خبرې وکړې. ارشیف- انځور

د امریکا ټینکالوجۍ کمپنیانو مشرانو د فبرورۍ پر ۲۳مه د پارلېمان غړیو ته وویل چې په دا وروستیو کې پر شرکتونو او حکومتي کمپیوټري شبکو باندې حملې دومره پيچلې وې چې ښکاري یو هیواد یې ترشا لاس لري.

دوی وویل، شواهد د روس طرفته اشاره کوي.

په ډېسمبر کې شوی د انټرنیټي بریدونو په هکله دا لومړۍ اورېدونه وه. وروسته څرګنده شوه چې هیکرانو یا انټرنیټي غلو د یوې امریکايي کمپنۍ سولر ونډز لخوا جوړ د کمپیوټري نیټ ورک د انتظام په سوفټ وییر د یو ناوړه کوډ په وراچولو متاثره کړ.

وروسته دغه سافټ وییر د امریکا د حکومت مختلفو څانګو او بېلا بېلو امریکايي او اروپايي شرکتونو پر خپلو سسټمو ډاونلوډ یا ښکته کړ.

د امریکا استخباراتي چارواکو او د صنعت نورو سرچینو مخکې د پېښې لپاره د روس هیکران تورن کړي وو.

ماسکو پکې له لاس لرلو نه انکار کړی دی.

د افغان حکومت او طالبانو مرکچي پلاویو سره ولیدل

قطر کې د سولې خبرو پیلېدا ورځ: ۱۲/۰۹/۲۰۲۰ (12.9.2020)

د افغانستان حکومت او طالبانو د سولې مذاکراتي ټيمونو له نېږدې پنځو اونیو ځنډ وروسته د فبرورۍ پر ۲۲مه ماښام سره لیدلي دي.

د افغان حکومت مرکچي ټیم په خپل ټوېټر باندې په دې اړه یو لنډ بیان خپور کړی.

په بیان سربېره د لیدنې په اړه د ټيم د یوه غړي غلام فاروق مجروح خبرې هم خپرې شوي چې وايي، د فبرورۍ پر ۲۲مه ماښام مهال په دوحه کې د افغانستان سولې مذاکراتو د دواړو ټیمونو د مشرانو او ځینو غړیو تر منځ ناسته وشوه.

د نوموړي په وینا په دغه لیدنه کې، په دې سلا وشوه چې د تماس ډلې به له مخکې ټاکل شوې اجنډا سره سم د اجنډا په جزییاتو کار وکړي او مذاکرات به نورمال او دوامداره توګه دوام وکړي.

اخوا د طالبانو د سیاسي دفتر ویاند محمد نعیم رسنیو ته په استولي پيغام کې د د فبرورۍ پر ۲۲مه ماښام ناستې یادونه کړې ده.

هغه ویلي ناسته په ښه فضا کې ترسره شوه او د تماس ډلو ته دنده ورکړل شوه چې ناستو ته دوام ورکړي.

وروستی وار دواړه ټیمونه د جنورۍ پر ۱۷مه په دوحه کې سره ناست وو.

د سولې مذاکراتي ټیمونو داسې وخت سره وکتل چې د طالبانو په ډلې باندې د افغان حکومت له خوا خبرو ته د نه حاضرېدو انتقادونه کېدل.

له اوېغورانو سره د چين چلند نسل-وژنه ده: کنېډا پارلمان

د کاناډا استازو جرګې له اوېغورانو سره د چين چلند نسل-وژنه بللې ده.

دا له هغه څو ساعته وروسته ده چې چين ادعا وکړه چې له اوېغور لږکيو سره يې چلند د بشري حقونو د پرمختګ په لړ کې يو ځلانده مثال دی.

د فبرورۍ پر ۲۲مه نېټه په متفقه توګه منظور شوي قراداد کې ويل شوي د چين اويغوران له نسل کشۍ سره مخامخ شوي او مخامخېږي.

د کاناډا پارلېمان د يو ترميم په حق کې هم رايې ورکړې چې په ۲۰۲۲ز کال کې په بېجنګ کې د ژمني اولمپک لوبو وخت په هغه صورت کې د اړولو غږ کوي چې که چېري له اويغورانو سره ناوړه چلند دوام وکړي.

په دې وروستيو کلونو کې د چين او کنېډا ترمنځ تعلقات خراب دي او اوسنی ګام ښايي بېجنګ نور هم خپه کړي.

چین په سېنکیانګ کې د عامه وژنې تورونه رد کړي

 چین سېنکیانګ کې د اوسېدونکو اویغور مسلمانانو او نورو لږکیو د ژوند د وضعې په اړه خپاره شوي دغه تورونه رد کړل او دا یې د چین خلاف له تهمته ډک راپورونه وبلل.

چین په سېنکیانګ کې د عامه وژنې تورونه رد کړي او وايي، د ملګرو ملتونو د څارونکو پر وړاندې یې دروازې پرانېستې دي.

بیجېنګ د فبرورۍ پر ۲۲مه په سېنکیانګ کې د اوسېدونکو اویغور مسلمانانو او نورو لږکیو د ژوند د وضعې په اړه خپاره شوي دغه تورونه رد کړل او دا یې د چین خلاف له تهمته ډک راپورونه وبلل.

د چین بهرنیو چارو وزیر وانګ يي پرون په جینیوا کې د ملګرو ملتونو د بشري حقونو شورا ته وویل، اویغور مسلمانان او نور اقلیتونه چې د هغوی په سېنکیانګ ایالت کې ژوند کوي له مذهبي ازادۍ او د کار له حقونو برخمن دي.

نوموړي له اقلیتونو سره د چین چلند د بشری حقونو په هکله د چین پرمختګ د «یو روښانه مثال» په توګه یاد کړ.

تر دې وړاندې د برتانیې بهرنیو چارو وزیر ډومنېک راب د فبرورۍ پر ۲۲مه د سېنکیانګ د اویغور اقلیتونو سره د چین د سلوک په غندلو سره ویلي ول چې دا په صنعتي کچه د شکنجې، جبري کار او د نسل بندۍ هڅه ده.

خو د چین بهرنیو چارو وزیر وویل، هیواد یې له قانون سره سم د ترهګرۍ پر ضد اقدامات کوي.

په سوات کې څلور کسان په ناموسي پېښه کې وژل شوي

په پاکستان کې ناموسي وژنو کې هر کال سلګونه نارینه او زنانه خپله ژوند بایلي.

د سوات پولیس چارواکي وايي دواړه پېښې د فبرورۍ پر ۲۲مه (پرون) رامنځ ته شوې دي.

د ګل په ورځ (نن) له مشال راډیو سره په خبرو کې د کبل تاڼې د پولیسو مشر ډي اېس پي باچا حضرت وویل چې لومړۍ د کبل تحصیل په کوټلۍ سیمه کې شوې چې په وینا یې یوه سړي خپله مېرمن او یو ځايي تن وژلي او له سیمې تښتېدلی دی.

بلخوا د بهرین باډالۍ تاڼې اېس اېچ او زاهد خان نن مشال راډیو ته وویل چې د باډالۍ یو اوسېدونکی انور علي خپله ښځه سایره او یو بل ځايي تن عیان خان په تبر وژلي دي.

پولیس وايي، ملزم یې نیولی او پرضد یې مقدمه درج شوې ده.

په پاکستان کې په ناموسي وژنو کې هر کال سلګونه نارینه او زنانه خپله ژوند له لاسه ورکوي.

اشرف غني: د تاوتریخوالي وروستۍ څپه پر ټولنې مرګونې حمله ده

اشرف غني یوې غونډې ته د وینا په حال کې - د ارشیف انځور.

د افغانستان ولسمشر اشرف غني وایي، د خلکو، مدني فعالانو او مدني ټولنو، بزګرو او سوداګرو پر وړاندې د تاوتریخوالي "وروستۍ څپه زموږ پر ټولنې مرګونې سېسټماتیکه حمله" ده.

دا خبره نوموړي د فبرورۍ پر ۲۲مه د ملګرو ملتونو د بشري حقونو د شورا ۴۶ غونډې ته په وینا کې کړې چې د جمهوري ریاست پر ووبپاڼه خپره شوې.

غني ویلي، هدفي وژنې "زموږ پر سړیو او ښځو چې په تېرو ۲۰ کلونو کې د بدلې شوې ټولنې استازیتوب کوي، یو مستقیم بربنډ ګوزار" دی.

اشرف غني دغه څرګندونې داسې مهال کوي چې د کابل په ګډون په یو شمېر لویو ښارونو کې په دې وروستیو کې هدفي وژنې او چاودنې چې چارواکي یې د طالبانو کار بولي، زیاتې شوې دي، خو طالبان په دغو چاودنو کې خپل لاس لرل ردوي.

اروپایي ټولنه پر روس نوي بندیزونه لګوي

ارشیف، د اروپايي ټولنې بیرغونه

ټاکل شوې چې د اروپایي ټولنې د بهرنیو چارو وزیران به نن پر روس د نويو بندیزونو لګولو پخلی وکړي.

دغه بندیزونه پر روسیې د کرملېن سخت سیاسي مخالف الکسي نووالني د زنداني کېدو او د هغه پلویانو د ځپلو په تړاو لګول کېږي.

دغه وزیران به د بروکسل په غونډه کې ځانګړې موخې په نښه کړي، پر یو شمېر روسانو او ادارو به د ویزې بندیز ولګوي او شتمني به ‌یې کنګل کړي.

الکسي نووالني تورن شوی و چې جرمني ته د درملنې لپاره په تګ سره‌ یې د زندانېدو په برخه کې سرغړونه کړې وه.

نوموړی په جنورۍ میاشت له جرمني هېواد ته له ستنېدو سره سم ونیول شو. هغه پر ځان لګول شوي تورونه سیاسي انګېزه بللې ده.

د ورکو کسانو د نه پرېښودو ضد د اې اېن پي احتجانونه

عوامي نیشنل ګوند په پاکستان کې د لادرکه کسانو د نه خوشي کېدو پرضد نن د ملک په یو شمېر ښارونو کې احتجاجونه کوي.

د یاد ګوند مخکښ او د خیبر پښتونخوا د اسمبلۍ غړي سردار حسېن بابک نن سهار مشال راډیو ته وویل چې ګوند به یې په هره ضلع کې د پریس کلب مخې ته احتجاجونه کوي.

ده وویل چې د عوامي نیشنل ګوند د بلوچستان ویاند اسد خان اڅکزي په ګډون په لوی شمېر خلک ورک دي او کورنۍ یې هره ورځ تر سخت عذاب تېرېږي.

سردار حسېن بابک زیاته کړه چې دوی به د احتجاج پر مهال پر ریاست، عدالت او د بشري حقونو پر سازمانونو غږ کوي چې د لادرکه کسانو د موندلو او خوشېکولو لپاره ګامونه پورته کړي.

طالبان دې د ښوونځيو او علمي مرکزونو له ورانولو لاس واخلي: محب  

حمدالله محب دا خبرې د مورنۍ ژبو د نړیوالې ورځې په مناسبت په خپل فیسبوک کې په یوه پیغام کې کړې دي.

د افغانستان د ملي امنیت سلاکار حمدالله محب له طالبانو غوښتي چې د ښوونځیو او علمي مرکزونو له ورانولو لاس واخلي څو د ده په خبره افغان ماشومان په مورنۍ ژبه زده کړو ته لاس رسی ولري.

حمدالله محب دا خبرې د مورنۍ ژبو د نړیوالې ورځې په مناسبت په خپل فیسبوک کې په یوه پیغام کې کړې دي.

محب زیاته کړې چې، " ‏د ښوونځیو سوځول او په بمونو ورانول یې په مورنۍ ژبه له تحصیل کولو او د افغان ماشومانو له راتلونکې سره دښمني ده."

طالبانو د حمدالله محب د دغو څرګندونو او تورونو په ځواب کې څه نه دي ویلي.

د فبروري ۲۱مه د ملګرو ملتونو سازمان له خوا د فرهنګي او ژبني تنوع د پياوړتیا په هدف د مورنۍ ژبې د نړیوالې ورځ په نوم یاده شوې ده.

په افغانستان کې هم د دې ورځې په مناسبت په مورنۍ ژبه د تدریس د زیاتېدو کمپاینونه شوي دي.

افغانستان کې خلک څه باندې دېرشو ژبو باندې خبرې کوي چې له ډلې یې پښتو او دري رسمي دولتي ژبې دي او پاتې نورې بیا په خپلو سیمو کې دریمې رسمي ژبې یادیږي.

په ټوله نړۍ کې بیا خلک په شپږ نیمو زرو ژبو غږیږي.

د ايټمي انرژۍنړیوالې ادارې مشر له ایرانیو چارواکو سره لیده کاته کړي

ایران ويلي دي چې د ايټمي انرژۍ نړيوالې ادارې سره به تعاون نه پریږدي او نه به د دغه ادارې معاينه کار له هيواده وباسي.

د ايټمي انرژۍ د نړیوالې ادارې مشر رافيل ګروسي په تهران کې د ايران د ايټمي انرژۍ له مشر علي اکبر صالحي سره ملاقات کړی دی.

ګروسي ایران ته دا سفر پر داسې مهال کوي چې تهران خبرداری ورکړی وو چې که ورباندې د امریکا بندیزونه لرې نه شو نو د فبرورۍ تر ۲۳مې ورستو نه اټومي بټیو ته د اټومي انرژۍ نړیوالې ادارې لخوا څارنه محدوده کړي.

ایران ويلي چې د نړي ووالو قدرتونو سره په ۲۰۱۵م کال کې د شوې لوظنامې مطابق به د شفافيت هغه رضاکارانه اقدامات هم ودروي چې له مخه يې د ايټمي انرژۍ د نړیوالې ادارې معاينه کار له لنډ مهلت ورکولو سره د هغه هيواد ايټمي تنصیباتو ته ورتلای شي چې ایران لا په ډاګه کړي نه دي خو ایران وايي چې له دې ګامونو شاته کيدای هم نه شي.

د ايټمي انرژۍ نړي والې ادارې تیره اونۍ ويلي ول چې تهران ته د رافيل ګروسي د دې سفر موخه په ایران کې د ايټمي هلو ځلو د لازمي کره کتنې د عمل په لړ کې ایران سره یو تفاهم ته رسیدل دي.

بلخوا ایران ويلي دي چې د ايټمي انرژۍ نړيوالې ادارې سره به تعاون نه پریږدي او نه به د دغه ادارې معاينه کار له هيواده وباسي.

فایزر بایوانټېک واکسین د کووېډ -۱۹ پر وړاندې ۹۹ فیصده موثر دی: اسراییل

ولس ته د کويډ ۱۹ د واکسینو ورکولو عمل کې اسرايل د نړي له مخکښو هيوادونو يو دی. 

د اسرايیلو د صحت وزارت وايي چې د کورونا وايرس د سختې ناروغۍ او له مرګه د ژغورنې په لړ کې د فايزر بايوانټېک کمپنۍ واکسین ۹۹ في صده موثره دي.

د دې واکسینو تر کارولو وروسته په لومړي ځل د لویي کچې داسې مالومات دي چې خپريږي.

ولس ته د کووېډ- ۱۹ د واکسینو ورکولو عمل کې اسرایيل د نړي له مخکښو هيوادونو يو دی.

اسرايیلو تر دا مهاله د خپلې نهه میلیونه ابادۍ نژدې نيمايي برخې ته د فايزر بايو اېنټېک واکسینو لومړی خوراک ورکړی دی .

خو نژدې ۲.۹ مليونو خلکو ته د دې واکسینو پوره یعني دوه خوراکه ورکړل شوي دي.

د صحت وزارت وايي چې دا واکسین له دوه خوراکه اخیستونکو څخه ۹۸.۹ فيصده د مرګ او ۹۹.۲ فيصده له سخت ناروغه کېدو ژغوري.

د اټومي انرژۍ نړیوالې ادارې مشر تهران ته رسیدلی دی.

د ایران حکومتي رسنیو راپور ورکړی چې د اټومي انرژۍ نړیوالې ادارې مشر رافایل ګروسي تهران ته رسیدلی دی. (عکس: ارشیف)

د ایران حکومتي رسنیو راپور ورکړی چې د اټومي انرژۍ نړیوالې ادارې مشر رافایل ګروسي تهران ته رسیدلی دی.

ایراني رسنیو ویلي، ګروسي به د دغه سفر پر مهال د ایران د ملکي اټومي انرژۍ له مشر علي اکبرصالحي او د اټومي انرژۍ نړیوالې ادارې کې د ایران له استازي کاظم غریب ابادي او ځينې نورو چارواکو سره هم ملاقاتونه کوي.

ګروسي دا سفر په داسې مهال کوي چې ايران خبرداری ورکړی وو چې که پر دوی په ۲۰۱۸ز کال کې لګول شوي بندیزونه لرې نه کړل شو نو هېواد به یې د فبرورۍ ۲۱مې نه اټومي بټیو ته د اټومي انرژۍ نړیوالې ادارې لنډمهاله پلټنه او څارنه بنده کړي.

ايران او شپږو نړيوالو قدرتونو په ۲۰۱۵ز کال کې يو مهم اټومي تړون لاسليک کړی وو چې ورسره سم به د اورانییمو غني کولو محدودولو په بدل کې یې پر ایران بندیزونه نرمېدل.

خو د امریکا مخکینی ولسمشر ډانلډ ټرمپ ۲۰۱۸ کال کې د ایران له اټومي تړونه ووت او پر دغه هېواد یې بیرته اقتصادي بندیزونه ولګول.

د ولسمشر جوبايډن اداره دغه تړون ته د بیرته ورګرځېدو لپاره لارې لټوي.

د ناټو غړي هیوادونه هڅه کوي چې د افغان سولې بهیر بریالی شي: ستولتنبرګ

ینس سټولټنبرګ دغه څرګندونې د فبرورۍ پر ۲۰مه د افغانستان له ولسمشر محمد اشرف غني سره د ټیلفوني خبرو پر مهال وکړې.

د ناټو عمومي منشي وایي، د دې ټلوالې غړي هېوادونه د فعالې ډيپلوماسۍ له لارې هڅه کوي چې د افغانستان د سولې بهیر بریالی کړي.

ینس سټولټنبرګ دغه څرګندونې د فبرورۍ پر ۲۰مه د افغانستان له ولسمشر محمد اشرف غني سره د ټیلفوني خبرو پر مهال وکړې.

د ولسمشر ویاند دواخان مينه پال مشال راډيو ته وویل چې سټولټنبرګ اشرف غني ته د ناټو د دفاع وزیرانو د وروستۍ غونډې معلومات ورکړل.

د ده په ونیا، دواړو لوريو د سولې پروسې او د افغانستان امنيتي او دفاعي ځواکونو لپاره د ناټو دوامداره ملاتړ په اړه بحث او خبرې وکړې.

ارګ په دې اړه یوه خبرپاڼه هم خپره کړې چې په کې راغلي، د افغانستان په اړه به د ناټو پریکړې مشروطې او له امریکا سره په همغږۍ کې وي.

د ناټو عمومي منشي ویلي، له افغانستانه دبهرنیو ځواکونو د وتلو مشورې روانې دي، خو لا کومه پریکړه نه ده شوې.

نور پورته کړئ

ځانګړې پاڼې

له موږ سره اړیکي

XS
SM
MD
LG