د لاسرسي ځای

تازه خبر

خبرونه

ولسمشر ​ټرمپ د ځمکنیو ماینونو پر استعمال لګېدلي بندیزونه نرم کړل

د امریکا ولسمشر ډونالډ ټرمپ

د امریکا ولسمشر ډونالډ ټرمپ د جنورۍ پر۳۱مه هغه بندیزونه نرم کړل چې د ځمکنیو ماینونو پر استعمال لګېدلي وو.

نوموړي وویل چې مخکېنۍ پالیسي د امریکا ځواکونو ته سخت زیات تاوان پېښ کړی و.

د امریکا پخواني ولسمشر بارک اوباما د پالیسي په بدلولو سره، ډونالډ ټرمپ هغو ماینونو ته چې لازمه نه ده چې ټول عمر تر خاورو لاندې پاتې شي او د ریموټ په وسیله کنټرولېږي، زرغون څراغ ورکړ.

د سپینې ماڼۍ په بیان کې په دې اړه لیکل شوي چې د امریکا پخواني ولسمشر بارک اوباما پالیسي چې بندیزونه یې لګولي و، د امریکا پوځیان د جګړې او بحران په ډګر کې په شدت له تاوان سره مخامخ کول.

د نړۍ ۱۶۰ هېوادونه د اوتاوا د کنوانسیون غړي دي چې په ۱۹۹۹ز کال کې د پرسونل ضد ماینونو د بندولو لپاره جوړ شو خو امریکا، چین، روس، هند او پاکستان یې غړیتوب نه لري.

د نننۍ ورځې ټول خبرونه وګورئ

کورونا وایرس: خوست ته له درېو ولایتونو پر ورتګ بندیز

خوست ښارګوټی

د خوست والي حلیم فدايي پر اتوار/یکشنبه رسنیو ته وویل، دا ګام یې د کورونا وایرس د مخنیوي لپاره اخېستی او د اوس لپاره به تر درېو اونیو پورې د خوست او نورو ولایتونو ترمنځ لارې تړلې وې.

له دې بندېزه د پوځ او پولیسو سرتېري، د خوراکي موادو او درملو لېږدونکي ګاډي وتلي دي.

حلیم فدايي له خلکو وغوښتل، چې د ځانونو او کورنیو د روغتیا ساتنې لپاره دې خوست او له خوسته بهر سیمو ته له تګ راتګ ډډه وکړي.

تر اوسه په خوست کې د کورونا وایرس هېڅ مثبته پېښه نه ده لیدل شوې.

پاکستان ۲۰ زره تبلیغیان قرنطین کړي

تبلیغیان د لاهور په رایونډ کې

پاکستاني چارواکي وايي هغه ۲۰ زره کسان‌ یې قرنطین کړي چې د مارچ له ۱۰مې تر ۱۲مې د تبلیغیانو اجتماع کې یې برخه اخیستې وه.

چارواکي وايي په لسګونه زره نورو هغو کسانو پسې ګرځي چې د کرونا ویروس له ګواښ سره سره په لاهور کې دې تبلیغي اجتماع ته ورغلي ول.

د خیبر پښتونخوا د اعلی وزیر سلاکار او ویاند اجمل وزیر ویلي چې یو شمېر معاینه شویو تبلیغیانو کې د کرونا ویروس موجود دی.

اجمل وزیر ویلي اووه زره تبلیغیان په لاهور، اته زره په سند او پاتې ۵۳۰۰ نور تبلیغیان په خېبر پښتونخوا کې قرنطین شوي.

په لاهور کې د تبلیغي اجتماع جوړوونکو ویلي چې څه باندې یو لک کسان دې غونډې ته ورغلي ول.

چارواکو ویلي غواړي د دې غونډې ګډونوال معاینه او قرنطین کړي.

افغانستان کې ۳۰ تنه نور کورونا وهلي

افغانستان کې ټولې مثبتې پېښې ۳۶۷ ته ورسېدې.

په افغانستان کې د کورونا وایرس ۳۰ نورې مثبتې پېښې ثبت شوې دي.

د افغانستان د عامې روغتیا وزارت ویاند وحیدالله مایار رسنیو ته په استولي پيغام کې ویلي چې وروستۍ مثبتې پېښې په هرات، کابل، نیمروز، کندز، فاریاب او دایکنډي کې ثبت شوې دي.

د عامې روغتیا وزارت د معلوماتو په اساس د نویو پېښو په ثبتېدو سره په دې هېواد کې د کورونا ټولې مثبتې پېښې ۳۶۷ ته ورسېدې.

نیویارک کې پړانګ پر کورونا وایرس اخته شوی

دا تر دې مهاله په امریکا کې لومړی ځل دي چې یو ځناور په کورونا اخته کېږي.

د نیویارک په یو ژوبڼ یا چړیا ګر کې په یو پړانګ کې د کورونا وایرس موندل شوی دی.

دا تر دې مهاله په امریکا کې لومړی ځل دي چې یو ځناور په کورونا اخته کېږي. د ژوبڼ چارواکي وايي، داسې ښکاري چې پړانګ ته به د عملې د یو کس لخوا دا وایرس لېږدېدلی وي.

په ژوبڼ کې دا مهال شپږ نور پړانګان او زمریان هم ناروغه شوي، خو د وینې د معاینې نتیجې یې لا نه دي مخې ته راغلي.

چارواکي وايي، په ځناورو کې هم د کورونا نخښې هماسې د انسانانو په شان دي، وچ ټوخی کوي، ساه یې لنډه لنډه کېږي او خوراک نه کوي.

په نیویارک کې له سلو زرو زیات انسانان کورونا ځپلي دي. په ټوله امریکا کې بیا دا شمېره درې لکه ۳۷ زره نه د پاسه ده.

په جنوبي‌ وزیرستان کې ماین چاودنې څلور ماشومان ټپي‌ کړي‌

جنوبي وزیرستان

په جنوبي وزيرستان کې د اپرېل پر پنځمه په مځکه کې ښخ کړل شوي بم چاودنې ۴ ماشومان ژوبل کړي دي.

د سيمي انتظامي مشر حميد الله جان خټک، مشال راډيو ته وويل چې دا پيښه په شکئ کې شوې.

نوموړي‌ زياته کړه چې ماشومان سرسری زخميان شوي او کورونو ته ستانه شوي دي.

د يادونې وړ ده چې په جنوبي وزيرستان کې په ماين چادونو کې تر اوسه ۱۲۵ کسان مړه يا معذوره شوي دي. په دي کې زیاتره ماشومان دي.

په سيمه کې ځاي اوسيدونکې له ډيرې مودې راهيسي له حکومته غوښتنه کوي چې د ځمکې لاندي بمونو شنډولو لپاره اقدامات وکړي.

روس او سعودي‌ د تېلو بيو په مسله کې ځان خرابوي: ټرمپ

ولسمشر ډونلډ ټرمپ

د امريکا ولسمشر ډونلډ ټرمپ وايي د تېلو د بيو پر سر په روانه کشاله کې سعودي عرب او روس خپل ځانونه خرابوي.

ولسمشر ټرمپ د اپرېل په څلورمه په وايټ هاوس کې خبريالانو ت وويل چې که ضرورت وو نو د امريکې د تېلو انډسټري ژغورلو لپاره د سعودي او روس پر تېلو اضافي ټيکس لګولی شي.

د کورونا وایرس خورېدو له وجې په نړۍ کې تېل ارزانه شوي. روس او سعودي عرب تېره مياشت د تېلو پېداور کمولو لپاره سره نه وو سلا شوي او پلان شوې وه چې د تېلو توليدونکي هېوادونه د اپرېل په شپږمه د تېلو قیمتونو او پېداوار کمولو په اړه سره خبرې وکړي خو دغو هېوادونو وويل چې دوی دا ملاقات نه کوي.

تر دې مخکې ټرمپ ويلي وو چې سعودي عرب او روس سره یو داسې جوړ جاړي ته ورسېد چې له مخې يې دغه دوه هېوادونه د تېلو توليد کمولو ته تیار شول.

ولسمشر ټرمپ زیاته کړه چې د سعودي وليعهد او روس ولسمشر سره یې د اپرېل په دويمه په ټيليفون خبرې وکړي او هغوی دې ته تيار شول چې د تېلو پېداوار د ورځې په حساب له لس ميلیونو څخه پنځلسو ميليونو بيرلو پورې کم کړي.

حنیف اتمر د بهرنیو چارو وزارت سرپرست وزیر وګمارل شو

حنیف اتمر

افغان ولسمشر اشرف غني، حنیف اتمر د بهرنیو چارو د وزارت د سرپرست په توګه نومولی دی.

د ولسمشر دفتر د اپرېل پر څلورمه په بیان کې وویل، حنیف اتمر به د بهرنیو چارو د سرپرست وزیر په توګه دنده ترسره کوي.

اتمر تر دې مخکې د ولسمشر د ملي امنیت سلاکار وو خو بیا یې استعفا ورکړه او تېر کال یې د حق او عدالت ګوند د مشر په توګه د ولسمشرۍ انتخاباتو ته ځان نوماند کړ خو بیا ورڅخه په شا شو.

په افغانستان کې د وزارتونو سرپرستان د ولسي جرګې تایید ته اړتیا لري چې د وزیرانو په توګه کار وکړای شي.

د افغان ولسمشر یو ساتونکی وژل شوی دی

قیام مقصودي

د افغانستان کورنیو چارو وزارت وايي، وسله والو د ولسمشر د ساتونکو د ډلې یو غړی وژلی دی.

د کورنیو چارو د وزارت ویاند طارق ارین د اپرېل پر څلورمه وویل چې بېګا ناوخته په پغمان ولسوالۍ کې په شوې حمله کې د ولسمشر د ساتونکو ډلې بل غړی ټپي شوی دی.

ارین وویل، پر قیام مقصودي او د هغه پر بل همکار امېد د برید پلټنې کوي.

د کابل امنیه قومندانۍ سرپرست محمد نبي بیان د اپرېل پر څلورمه مشال راډیو ته وویل چې مقصودي او امېد دواړه په شخصي سفر پغمان ته تللي ول چې وسله والو ورباندې ډزې وکړې.

د حملې ذمه واري چا نه ده منلې.

سوات کې وسله والو د عوامي نېشنل ګوند یو غړی وژلی

پولیس وايي، په سوات کې وسله والو د عوامي نېشنل ګوند یو غړی ویشتلی دی.

د مټې د پولیسو مشر شوکت خان بېګا مشال راډیو ته وویل، د امن کمېټۍ غړی عبدالولي خان د اپرېل پر درېیمه مازیګر په خرېړۍ سیمه کې د سړک پر غاړه وسله والو په نښه کړ.

د ده په خبره، دا ترهګر برید وو چې مقدمه یې دایره کړې او د وسله والو لټون روان دی.

عبدالولي خان په پوځ کې هم پاتې شوی وو او د وژنې ذمه واري یې چا نه ده منلې.

د خیبر پښتونخوا حکومت چترال ته پر تګ راتګ بندیز لګولی

د چترال یو عکس

د خیبر پښتونخوا د ملاکنډ ډېوېژن کمېشنر وايي، د چترال له دوو ضلعو پرته په ټوله سیمه کې د کورونا وایرس مثبتې پېښې ثبت شوې دي.

ریاض خان مسعود د اپرېل پر درېیمه د سوات په سیدو شریف کې خبریالانو ته وویل چې د ملاکنډ ډېوېژن له نهو ضلعو څخه یوازې کوز او بر چترال ضلعې له وایرسه محفوظه پاتې دي.

ده وویل، همدا لامل دی چې له چتراله یې د خلکو پر وتلو او ورتګ بندیز لګولی.

مسعود زیاته کړه چې که څوک هرو مرو هلته ورتګ غواړي نو لومړی به ۱۴ ورځې ګوښه کېږي او بیا به د ورتګ اجازه ورکوي.

د ملاکنډ کمېشنر زیاته کړه چې په چترال کې د خوړو او د ولس د نورو اړتیاو پوره کولو لپاره یې کوټلي اقدامات کړي.

د امریکا د جانز هاپکېنز پوهنتون له وینا سره سم، د اپرېل تر څلورمې نېټې پورې په پاکستان کې د کورونا وایرس ټولې ۲،۷۰۸ پېښې ثبت شوې دي چې ورڅخه یې ۴۰ کسان مړه شوي او ۱۳۰ رغېدلي دي

د تېلو پیداوار کمولو له هوکړې نه یو پرشا شوي: سعودي عرب

د سعودي عرب او روس د انرژۍ وزیران

د سعودي عرب د توانايي وزیر د روس هغه تور رد کړی چې وايي سعودي عرب تیره میاشت د تیلو پیدوار د کمولو له موافقې شاته شوی.

دا خبر د سعودي عرب سرکاري خبري اژانس (ایس پي اې) د اپرېل پر څلورمه د شهزاده عبدالعزیز بن سلمان په حواله ورکړی دی.

اژانس لیکلي چې نوموړي یوه ورځ وړاندې د خپل روسي سیال د څرګندونو ځواب ویلی دی.

د سعودي عرب د بهرنیو چارو وزیر شهزاده فېصل بن السعود هم ویلي چې د روس له ولسمشر ولادیمیر پوټین سره تړل شوی دا بیان سم نه دی چې ګواکې سعودي عرب د تیل پیدا کونکیو هېوادونو د تنظم (اوپیک) او د دوی له تړون څخه پرشا شوی دی.

شهزاده فېصل بن السعود زیاته کړې چې دا کار روس کړی دی.

سعودي عرب او روس تیره میاشت د تیلو پیدوار پر کمولو سلا نه شول. له هغه راهسې د دواړو هېوادونو ترمنځ لانجه روانه ده.

دا په داسې حال کې ده چې د کورونا وایرس د بحران له کبله د تیلو په نرخونو کې کمی راغلی دی.

هنګو ضلع کې د کورونا وړجنو شمېر ۳۴ تنو ته ورسېد

د پېښور یوه کوڅه کې مول پلورونکي

د هنګو ضلعې په دوه نورو کسانو کې د کورونا وايرس موندل شوی چې په ياده ضلعې کې دا شمېر نهه او ډیويژن کې څلور دېرشو ته رسېدلی.

روغتيا محکمې تر مخه تر اوسه په کواټ ضلعې کې ۱۹، هنګو کې ۹، کرک کې ۳، کرمې کې دوه او اورکزو کې يو تن په کورونا وايرس اخته شوی.

په وړجنو کې يولس هغه کسان هم شامل دي چې د بلوچستان مستونګ ضلعې نه دره ادم خېلو ته تبليغ لپاره ورغلي ول.

بل خوا د ياد ډويژن کمشنر سيد عبدالجبار شاه د ټولو ضلعو انتظامي مشرانو ته صوبائي حکومت له اړخه جاري شوي د لاک ډاؤن او نور حکمونه سختۍ سره عملي کولو وېنا کړي ده.

سعودیه او روسیه د تېلو پیداوار پر راکمولو تیار شول: ټرمپ

د امريکا ولسمشر ډونلډ ټرمپ وايي سعودي عرب او روس سره یو داسې جوړ جاړي ته ورسېد چې له مخې يې دغه دوه هېوادونو د تېلو توليد کمولو ته تیار شول.

ټرمپ زیاته کړه چې د سعودي او روس ولسمشرانو سره یې د اپرېل پر دوهمه په ټيليفون خبرې وکړي او هغوی دې ته تيار شول چې د تېلو پېداوار د ورځې په حساب له لس ميلیونو څخه پنځلسو ميليونو بېرلو ته راټیټ کړي.

د کورونا وایرس خورېدو له وجې په نړۍ کې تېل ارزانه شوي. روس او سعودي عرب تېره مياشت د تېلو پېداور کمولو لپاره سره نه وو سلا شوي دي.

امریکا په پاکستان کې د خبریال ډینیل پرل د قاتل سزا کمول وغندل

احمد عمر شیخ د وال سټریټ خبریال ډانیل پرل د تښتولو ترشا تورن سرغنه د مارچ پر ۲۹مه ۲۰۲۰، د کراچۍ یوه عدالت ته د ورسېدو مهال.

د جنوبي ایشيا لپاره د امريکا بهرنيو چارو مرستيالې وزيرې، ايلس ويلز د سيند های کورټ د پنجشنبې ورځې هغه پرېکړه غندلې چې د امريکايي خبريال ډېنیل پرل په وژنه تورن يو کس سزا یې کمه کړې او درې نور ملزمان يې خوشې کړي دي.

ايلس ویلز د اپرېل په درېمه پر ټويټر ليکلي چې دا پرېکړه د ترهګرۍ قربانيانو بې عزتي ده.

په تورنو کسانو کې د عمر شېخ سزا ۷ کلونو ته راکمه شوې. پر هغه تور دی چې په ۲۰۰۲ کال یې پرل تښتولی او وژلي وو. د پاکستان حکومت ويلي چې د دې سزا خلاف به اپېل کوي. ايلس ويلز د پاکستاني حکومت دا دريځ ستایلی.

نړیوال بانک افغانستان ته ۱۰۰ میلیونه ډالره ځانګړي کړي

ارشیف

افغان چارواکي وايي چې د کرونا ویروس پرضد د مبارزې لپاره له افغان حکومت سره د نړیوالو مرستې راروانې دي.

د کرونا ویروس پرضد د مبارزې لپاره دولتي کمېټه چې د ولسمشر دوهم مرستیال سرور دانش یې مشري کوي وايي، په دې لړ کې نړیوال بانک سل میلیونه ډالر د افغانستان لپاره ځانګړي کړي دي.

د ښاغلي دانش مطبوعاتي سلاکار محمد هدایت پرون له آزادۍ راډیو سره په خبرو کې وویل دا مرستې په لومړي ګام کې هغو بېوزلو کسانو ته ورسېږي چې په ورځنیو کارونو بوخت دي.

هغه زیاته کړه: "دا ټول خوراکي مواد دي او هغو کسانو ته به ورکړل شي چې ورځني کارونه درلودل او د ګرځبندیز له کبله زیانمن شوي، هغه کسان چې پر کراچیو شیان پلوري او د ټولنې محرومه طبقه ده."

ښاغلی هدایت وايي چې د کرونا ویروس پرضد د مبارزې کمېټه به په نژدې ورځو کې په کابل او ولایتونو کې د دې مرستو د مستحقو کسانو فهرست برابر کړي.

نوموړی زیاتوي، د نورو هېوادونو او نړیوالو موسسو مرستې هم راروانې دي چې د کرونا ویروس پرضد د مبارزې د هڅو په ترڅ کې به ولګول شي.

افغانستان کې د کورونا وایرس د مثبتو پېښو شمېر ۲۷۳ ته ورسېد

زیاتې پېښې په هرات کې ثبت شوي

په افغانستان کې د اپرېل پر دویمه د کورونا وایرس د ۲۹ نویو مثبتو پېښو له ثبتېدو سره د ناروغانو شمېر ۲۷۳ ته رسېدلی دی.

د عامې روغتیا وزارت ویاند وحید مایار له مشال راډیو سره په خبرو کې وویل، د کورونا وایرس ۱۵ پېښې په هرات، ۹ په کابل، ۲ په پکتیا، یوه په کندهار، یوه په بغلان او یوه په دایکنډي کې ثبت شوي.

له بلې خوا د اپرېل پر دویمه، په افغانستان کې د کورونا وایرس له کبله د یو بل ناروغ د مړینې راپور هم ورکړل شوی.

د دایکندي د عامې روغتیا رییس اسحاق علي درمان وايي، یوې ۶۵ کلنې مېرمنې چې د پنجشنبې پر ورځ ناوخته یې ناروغي ثبت شوه، شپې مهال یې په روغتون کې سا ورکړه.

د درمان په وینا دا مېرمن د میرامور ولسوالۍ اوسېدونکې وه، له ایرانه هېواد ته ستنه شوې وه او د پښتورګو او نورې ناروغۍ یې لرلې.

په عین وخت کې نړیوال بانک ویلي چې د کورونا وایرس ناروغۍ مخنیوي په موخه له افغان حکومت سره ۱۰۰ میلیونه ډالره مرسته کوي.

غني او باجوه "د افغان سولې پر هڅو" غږېدلي

غني د زیارت پر ماښام له باجوه سره ټېلېفوني خبرې کړي

افغان ولسمشر اشرف غني د اپرېل دویمې پر ماښام د پاکستان د پوځ له مشر جنرال جاوېد قمر باجوه سره "د سولې پر روانو هڅو" خبرې کړې دي.

د ولسمشر دفتر بېګا په یوه بیان کې ویلي چې جنرال باجوه په ټېلېفوني خبرو کې له طالبانو سره د مذاکراتو لپاره د ټولو خواوو په ګډون د پلاوي د ټاکلو مبارکي ورکړه او د پرمختګ هیله يې وښوده.

په بیان کې نور معلومات نه دي ورکړل شوي.د ارګ بیان زیاتوي چې ولسمشر غني او جنرال باجوه د کورونا وایرس پر ضد د دواړو هېوادونو پر ګډه مبارزه، سوداګرۍ او ټرانزېټ هم خبرې کړي دي.

ایران یوازې د خپلې دفاع لپاره اقدام کوي: ظریف

ظریف پر ټوېټر په بیان کې د امریکايي ولسمشر بیان ته غبرګون ښوولی

د ایران د بهرنیو چارو وزیر ویلي دي چې هېواد یې هر اقدام "د خپلې دفاع" په موخه کوي.

ظریف دا خبره د اپرېل پر دویمه تر هغې یوه ورځ وروسته پر ټوېټر په بیان کې کړې چې امریکايي ولسمشر ډانلډ ټرمپ تهران ته خبرداری ورکړ چې که ایران یا ملګرو یې په عراق کې پر امریکايي سرتېرو یا ګټو برید وکړ نو "لوی تاوان" به وګالي.

د واشنګټن او تهران ترمنځ ناندرۍ پر داسې وخت زیاتې شوې دي چې د دواړو هېوادونو تعلقات ترینګلي دي او دواړه د کورونا وایرس کنټرولولو هڅې کوي.

ټرمپ د اپرېل پر لومړۍ پر ټوېټر ولیکل چې که داسې معلومات یې ترلاسه کړل یا باوري شو چې ایران یا نیابتي ډلو یې په عراق کې پر امریکايي سرتېرو یا ګټو حمله وکړه نو له لوی تاوان سره به مخامخ شي.

پر ټوېټر د ټرمپ بیان

د دې په ځواب کې ظریف پر ټوېټر ولیکل چې ایران "ملګري" لري او هېڅ هېواد "میلیونونه اجیران نشي لرلای."

ده پر واشنګټن د "درواغو ویلو ، غولولو او وژلو" له تور پورې کولو سره زیاته کړه چې د امریکا پرتله، ایران یوازې د خپلې دفاع په موخه اقدام کوي.

د امریکا او ایران تعلقات تر هغې وروسته ترینګلي شول چې ټرمپ په ۲۰۱۸ز کال کې د تهران او د نړۍ د ځواکمنو هېوادونو له موافقې ووت او پر هغه هېواد یې بیا بندیزونه ولګول.

کورونا وبا: د انټرنیټ نشتوالی د قبایلي ضلعو زده کونکي له انلاین زده کړو محرومه کړي

د قبایلي ضلعو زده کونکي وايي، په ټول پاکستان کې د کورونا وبا راخورېدو پس چې کله تعلیمي ادارې وتړل شوې نو په پوهنتونونو کې پرلیکه انلاین زدکړې پیل شوې دي خو دوی ترې ځکه بې برخې دي چې په سیمې کې انټرنیټ نشته. له مشال راډیو سره په خبرو کې دوی ویره وښوده که یې قبایلي ضلعو ته د انټرنیټ اسانتیاوې برابرې نه شوې نو زیات امکان دی چې تعلیمي کال یې زیانمن شي.

د سولې لپاره د افغان حکومتي ټیم جوړولو هرکلی کوو: پاکستان

پاکستان د افغانستان حکومت لخوا له طالبانو سره خبرو لپاره د ډلې جوړولو هرکلي کړی دی.

د پاکستان بهرنيو چارو وزارت پرون په بيان کې ويلي دي چې دې سره به بين الا افغاني خبرو اترو لپاره لاره هواره شي.

په بيان کې ويل شوي چې پاکستان باور لري دا يو مهم ګام دی او د افغانستان حکومت ژمنتيا په ډاګه کوي چې په هغه هېواد کې د سولې پروسه پرمخ بوځي.

افغان حکومت وایي کابل ته د طالبانو ورغلې درې کسیزه پلاوي سره‌ یې کتلي دي او په خبرو کې د بندیانو د تبادلې په اړه بحثونه شوي دي.

هلمند کې ماین چاودنې اته افغان ولسي وګړي وژلي

د هلمند نقشه

د افغانستان د هلمند په نهر سراج ولسوالۍ کې اته ملکي وګړي وژل شوي او دوه ټپیان دي.

د هلمند د امنیه قوماندانۍ ویاند په یوه خبرپاڼه کې نن(د اپریل پر لومړۍ) وویل چې د دې کسانو موټر په ماین الوتی دی.

په اعلامیه کې ویل شوي چې د چاودنې په قربانیانو کې ښځې او ماشومان هم شامل دي.

کومې ډلې لا د دې پېښې مسؤلیت نه‌دی اخیستی.

پاکستان کې د کورونا وړجنو شمېر تر ۲۰۰۰ ورسېد

په پاکستان کې تر دا مهاله د کورونا وړجنو شمېر ۲۰۰۰ ته رسېدلی دی او ۲۶ تنه ترې مړه شوي دي.

په اسلام اباد کې د کورونا وايرس مخنيوي او کنټرول مرکز ترمخه په پنجاب کې نهه په سند کې اته او په خېبر پښتونخوا کې شپږ کسان د کورونا وايرس له وجې مړه شوي دي.

د پاکستان څلورو واړو صوبو ترڅنګ په ګلګت بلتستان او اسلام اباد کې د نهې په ورځ له ۲۰۰ زيات د کورونا وايرس مثبت کېسونه مخې ته راغلي دي.

په پنجاب کې د متاثره کسانو شمېره له ۷۰۰ زياته شوي ده.

په سند کې ۶۷۰ او په خېبرپښتونخوا کې د ۲۵۰ زيات زيات کسان په کورونا رنځ اخته شوي دي.

په بلوچستان کې شاوخوا ۱۶۰ په ګلګت بلتستان کې شاو خوا ۱۵۰، په اسلام اباد کې ۶۰ او پاکستان تر انتظام لاندې کشمير ۶ کسان د کورونا وايرس له وجې متاثره شوي دي.

بلخوا وزيراعظم عمران خان په مشرۍ کې د مارچ په ۳۱مه د وفاقي کابينې په غونډه کې د ۱۲۰۰ اربه روپو د ريليف پيکچ منظوري هم ورکړل شوې ده.

روس او سعودي عرب د تېلو نرخ پر راټیټولو غږېږي: ټرمپ

د امریکا ولسمشر ډونالد ټرمپ

د امريکا ولسمشر ډونلد ټرمپ ويلي دي چې روس او سعودي عرب د تېلو نرخ ټیټولو په اړه خبرې کوي.

ټرمپ د مارچ پر ۳۱مه په سپينه ماڼۍ کې د کورونا وايرس په اړه بريفينګ پرمهال وويل چې "دواړه هېوادونه په دې اړه خبرې کوي او دی به هم که یې اړتیا وه په مناسب وخت کې ګډون وکړي.

د سعودي عرب او روس ترمنځ د تېلو توليد کمولو پر سر لانجې له کبله په نړيوال بازار کې د تيلو نړیوال قيمت ډېر زيات راپرېوتی دی.

تېره اونۍ امريکا په رياض فشار راوړی وو چې د تيلو تولید لوړولو له پریکړې څخه ډډه وکړي.

بلخوا مسکو هم د تيلو تولید کمولو هوکړه څخه انکار کړی وو.

رويټرز خبر اژانس ترمخه د کرميلين وياند ويلي دي چې د مارچ پر۳۰مه روسي ولسمشر ولاديمير پوتين خپل امريکايي سيال ډونلد ټرمپ سره ټيليفوني خبرو پرمهال هوکړه وکړه چې د نړۍ د تیلو په بازارونو کې اوسنی حالت مناسب نه دی.

په افغانستان کې د کورونا وړجنو شمېر۱۹۶ته ورسېد

په افغانستان کې د کورونا وایرس د مشکو کسانو څېړل.

د افغانستان عامې روغتیا چارواکو د مارچ پر۳۱مه رسنیو ته وویل چې په تېرو ۲۴ ساعتونو کې د هرات ولایت په لابراتوار کې د کورونا۱۴۰ مشکوکې پېښې وڅېړل شوې چې ۱۲یې په هرات او یوه یې په فراه ولایت کې مثبتې ثبت شوي.

د دې وزارت ویاند وحیدالله مایار رسنیو ته وویل چې په کابل ولایت کې هم ۴۵ مشکوکې پېښې څېړل شوي چې نهه یې مثبتې ثبت شوي چې ورسره په ټول هیواد کې د مثبتو پېښو شمېر ۱۹۶ ته ورسېده.

له یادو پېښو څخه یوازې هرات ولایت کې ۱۴۳ثبت شوي دي.

پاکستان کې د کورونا وایرس د مړو شمېر ۲۵ ته رسېدلی

ډاکټر د یو مشکوک کس معاینه کوي (پخوانی عکس)

په پاکستان کې د کورونا وایرس تصدیق شویو کېسونو شمېر ۱۸۶۵ ته رسېدلی دی.

د پاکستان صحت قامي ادارې ( این ای اېچ) پر ویبپاڼه له ورکړل شویو شمېرو سره سم په دې کې ۶۵۲ په پنجاب، ۶۲۷ په سند، ۲۲۱ په خیبر پښتونخوا، ۱۵۳ په بلوچستان، ۱۴۸ ګلګت بلتستان، ۵۸ په اسلام اباد او شپږ کېسونه په ازاد کشمېر کې تصدیق شوي دي.

د صحت قامي اداره وايي، تر اوسه په دغه هیواد کې ۲۵ کسان له وایرسه مړه شوي دي او ۵۸ ترې روغ شوي دي.

د (اېن ای اېچ) له تازه شمېر سره سم یو تن په ګلګت بلتستان، درې په پنجاب او دوه کسان په سند کې مړه شوي دي.

نور پورته کړئ

ځانګړې پاڼې

د مشال ځانګړې پاڼې

له موږ سره اړیکي

XS
SM
MD
LG