د لاسرسي ځای

تازه خبر

خبرونه

پر پوځي اډه د ایران برید امریکايي سرتېري ناروغه کړي؛ د امریکا دفاع وزارت

په عراق کې پر امریکايي اډه د ایران برید

امریکا ویلي چې په عراق کې د دوی پر پوځي اډه د ایران راکټي حملې له کبله ۳۴ سر تېرو ته دماغي ضربه رسېدلې ده.

د پنټاګون ویاند، جانتن هوفمن د جنورۍ پر۲۴مه په واشنګټن کې خبریالانوته وویل چې په دغو ژوبل شوو سرتېرو کې نيمايي په عراق کې خپلو دندو ته ستانه شوي دي خو ۱۷ سرتېري لا هم تر درملنې لاندې دي.

امریکا چارواکو مخکې ویلي ول چې په عراق کې د امریکايي ځواکونو پرعين الاسد پوځي اډه د ایران په حمله کې هېڅ امریکايي عسکر ته تاوان نه دې رسېدلی. خو تيره اوننۍ امریکايي پوځ وويل چې د ايراني بريد وروسته د يولسو سرتېرو درملنه شوې

د جنورې پر اتمه ايران په عراق کې د امریکايي سرتېرو په عين الاسد پوځي اډه وروسته له هغې راکتي بريد کړې وو چې د جنورې پر درېیمه د امریکايي بې پايلټه الوتکې په يو بريد کې ايراني جرنيل قاسم سليماني ووژل شو.

د نننۍ ورځې ټول خبرونه وګورئ

ماه جبین قزلباش په پېښور کې خاورو ته وسپارل شوه

د ماه جبین جنازه

د پښتو وتلې سندرغاړې ماه جبین قزلباش په چارشنبه په پېښور کې د زړه له ناروغۍ مړه شوه او په پنجشنبه د پېښور په ګلګشت کالونۍ کې خاورو ته وسپارل شوه.

پر هغې سږکال د جنورۍ په اوله نېټه د زړه دوره راغلې وه او له هغې راهيسې بېهوشه وه او چارشنبه يې د پېښور په ليډي رېډنګ هسپتال کې ساه ورکړه.

ماه جبین قزلباش
ماه جبین قزلباش

ماه جبین قزلباش په ۱۹۵۸ز کال کې په پیښور کې زېږېدلی او لویه شوې وه. هغه په خټه قزلباش وه، نیکه یې د افغانستان له هراته و کندهار او پلار یې بیا پیښور ته کډه شوی وو.

هغې د قبایلي سیمې اورکزو د پښتو فلمونو له تکړه اداکار اېمل خان سره واده کړی وو، هغې دوه زامن او يوه لور لرله.

ماه جبینې په زرګونو سندرې ویلې وې چې په افغانستان او پاکستان کې ډېر مینوال لرل.

امریکا کتایب حزب الله ډلې مشر نړیوال ترهګر ګرځولی

د امریکا بهرنیو چارو وزارت د ترهګرۍ مخنیوي چارو مشر نېتن سېلز

امریکا په عراق کې د ایران پلوې کتایب حزب الله وسله والې ډلې مشر له هغه وروسته ترهګر ګرځولې چې په عراق کې په دې وروستیو کې د امریکايي او نورو بهرنیو ځواکونو په مرکزونو راکټي بریدونه تر سره شول.

د امریکا بهرنیو چارو وزارت د ترهګرۍ مخنیوي چارو مشر نېتن سېلز د فبرورۍ پر ۲۶مه یوې خبري غونډې ته وویل چې واشنګټن د کتایب حزب الله د وسله والې څانګې مشر احمد الحامدوي د نړیوالو ترهګرو په فهرست کې شامل کړ.

د دې اقدام په ترڅ کې به له الحامدوي سره ورکړه راکړه جرم بلل کېږي او که نوموړی په امریکا کې اثاثې لري نو هغه به هم منجمد کولی شي.

کتایب حزب الله په ۲۰۰۹ م کال کې ترهګره ډله ګرځول شوې وه.

پر کرایمیا د ماسکو دعوا نه منو: پامپیو

د امریکا بهرنیو چارو وزیر مایک پامپیو

د امریکا بهرنیو چارو وزیر مایک پامپیو وايي چې واشنګټن په کرایمیا سیمه د ماسکو دعوا هېڅ کله په رسمیت نه مني.

ټاپو وزمه کرایمیا په ۲۰۱۴م کال کې روس له اوکراینه جدا او له ځان سره یو ځای کړه.

پامپیو ویلي د فبرورۍ پر ۲۷مه د روس لخوا د کرایمیا قبضه کولو د هڅې شپږمه کلیزه ده او امریکا په دې یو وار بیا تاکید کوي چې کرایمیا د اوکرین برخه ده.

نوموړي زیاته کړه، امریکا په روس غږ کوي چې په کرایمیا دې خپله قبضه ختمه کړي.

پامپیو دا څرګندونې له هغه څو ګنټې وروسته وکړې چې د اوکرین ولسمشر ولادیمیر زیلینسکي د فبرورۍ پر ۲۶مه یو فرمان جاري کړ چې ترمخه یې د فبرورۍ پر۲۶مه په کرایمیا د روس قبضې د یادونې ورځ ګرځول شوې ده.

نړیوالو د روس هغه اقدام په رسمیت نه دی منلی او په نتیجه کې يې په ماسکو یو لړ بندېزونه لګېدلي دي.

سعودي د کورونا وایرس له کبله عمره وځنډوله

په سعودي عرب کې د حرا غار

سعودي عرب د کورونا وایرس د ممکنه خورېدلو د مخنیوي په خاطر دغه هېواد ته د عمرو لپاره د خلکو ورتګ په عارضي توګه ځنډولی دی.

د فبرورۍ پر ۲۷مه سعودي چارواکو دغه هېواد ته له هغو هېوادونو د سېلګرو ورتګ هم وځنډوه چیرته چې د کرونا وایرس کېسونه مخې ته راغلي دي.

د سعودي عرب بهرنیو چارو وزارت وویل، دا اقدامات یې د وګړیو، دغه هېواد کې د مېشو خلکو او سیلګرو د ژغورنې لپاره کړي دي.

د چارواکو په وینا دا اقدامات عارضي دي او له وخت سره سره به ورته کتنه کوي.

کورونا وایرس: له ایران سره د افغانستان وګړو تګ راتګ اندېښنې راټوکولې

ارشیف

په افغانستان کې د ملګرو ملتونو د بشري مرستو د همغږۍ اداره (اوچا) وايي، له ایران سره د غربي ولایتونو د تګ راتګ له کبله د کورونا وایرس د خپرېدو اندېښنه ده.

د دې ادارې په خبرپاڼه کې چې د فبرورۍ پر ۲۶مه خپره شوه راغلي چې په افغانستان کې یوازې یوه مثبته پېښه ثبت شوې خو ۱۰ وګړي تر دې شک لاندې دي چې کورونا وایرس لري.

په خبرپاڼه کې لیکل شوي چې په افغانستان کې اوسمهال ۷۰۹ بسترونه په کورونا وایرس د اخته کسانو لپاره ځانګړي کړل شوي او د روغتیا نړیوال سازمان نېږدې پنځه لکه خبرپاڼې خلکو ته د معلوماتو ورکولو لپاره چاپ کړې دي.

د افغانستان حکومت د فبرورۍ پر ۲۳مه په نیمروز او هرات کې له ایران سره پوله وتړله خو د فبرورۍ پر ۲۵مه یې تګ راتګ ته اجازه ورکړه.

د ملګرو ملتونو د بشري مرستو همغږۍ ادارې ویلي چې په نیمروز او هرات کې به د عامې روغتیا وزارت ځانګړې ډلې هغه خلک چې ایران ته ځي او راځي معاینه کوي.

روسیه بیا په ټاکنو کې د لاسوهنې هڅه کوي: امریکا

امریکا سېنېټ

د امريکايي سېنېټ د ډيموکراټ ګوند مشرانو د فبرورۍ پر۲۴مه د ولسمشر ټرمپ پر ادارې ټينګار کړی چې پر روسيې بنديزونه ولګوي.

دا له هغه وروسته ده چې د امريکا استخباراتي چارواکو د کانګرېس غړيو ته په معلوماتي غونډه کې وويل چې روسيه يو ځل بيا د دې هېواد په ټاکنو کې د لاسوهنې هڅه کوي.

سېنېټر چک شومر، باب مېنېنډيز او شېروډ براون د بهرنيو چارو وزير مايک پامپيو او د خزانې وزير سټيون منوچين ته ليکلي چې امريکا دې په سمدستي ډول او بشپړه قوت سره د روسيې پر حکومت او هر هغه کس بنديزونه ولګوي چې د روان ۲۰۲۰م کال د ولسمشرېزو انتخاباتو په متاثره کولو لاس لري.

د کانګرېس غړيو ته د معلوماتو ورکولو پر مهال استخباراتي چارواکو ويلي چې روسيه او نور هېوادونه د نومبر مياشتې انتخاباتو ثبات ته ګواښونه پېښوي.

دا ليک پر هغو هڅو راڅرخي چې ښايي روسيه يې د ټرمپ د بيا انتخابېدو لپاره وکاروي.

نړۍ کې د کورونا وایرس خورېدو ویره زیاته شوې

د چین په یوه روغتون کې د کورونا وایرس ناروغان.

د کورونا وایرس د خورېدو ویرې له کبله د ایران، اټلي او جنوبي کوریا په ګډون ځینې نور هېوادونه د دې مخنیوي لپاره هلې ځلې کوي.

دې وایرس په چین کې له ۲۶۰۰ زیات کسان وژلي دي.

د فبرورۍ پر ۲۴مه افغانستان، عراق، بحرین، کویت او عمان کې هم د کورونا وایرس لومړني کیسونه رپورټ شوي دي او وویل کېږي چې دا ټول کسان په ورستیو کې له ایرانه ورغلي ول.

له چین بهر د کورونا وایرس له کبله تر ټولو زیات کسان په ایران کې مړه شوي دي.

د ایران نیم سرکاري خبري اژانس اي اېل اېن اې ویلي چې په مرکزي ښار قوم کې د کورونا له وجې ۵۰ تنه مړه شوي دي خو د روغتیا مرستیال وزیر ایراج حریرچي دا راپورنه رد کړي او خبري غونډې ته یې ویلي چې په ایران کې تراوسه په ۶۱ کسانو کې د کورونا وایرس تصدیق شوی چې پکې ۱۲مړه شوي دي.

جرمني کې یوه موټر چلوونکي ګڼ کسان ټپيان کړي

په جرمني کې د پېښې ځای

د جرمني پولیس وايي، د فبرورۍ پر ۲۵مه د هېواد په مغربي ښارګوټي واک مارسین کې یوه کس د عیسویانو د مېلې پر ګڼې ګوڼې ګاډې خیژولې چې پکې د ماشومانو په ګډون ګڼ کسان ټپیان شوي دي.

حکومتي څارنوالانو او پولیسو ویلي، یو مشکوکه جرمن وګړی چې ۲۹ کلن دی، د قتل د هڅې په تور نیول شوی دی.

چارواکو ویلي، تراوسه د پېښې سبب نه دی جوت او پلټنې دوام لري.

له دې وړاندې د جرمني خبري ویبپاڼې اېچ اېن اې ته عیني شاهدانو ویلي ول، له ډرایوره څرګندېدل چې له کسته یې ماشومان په نښه کړي او پر ګڼې ګوڼې یې ګاډی خیژولی دی.

په جرمني کې څو ورځې وړاندې هم یوه تن په ډزو خپلځان او ۱۱ تنه ووژل چې په دې هېواد کې له دوهم نړیوال جنګ پس د توکمپالنې په پېښو کې تر ټولو خونړۍ هغه ده.

د خوست دیني عالمان: ښکېلې غاړې دې جنګ ودروي

خوست کې د سولې په اړه د دیني عالمانو غونډه

د دوشنبې په ورځ د خوست د مرکز او ولسوالیو لسګونو دیني عالمانو او قومي مخورو د یوې غونډې له لارې له طالبانو سره د تاوتریخوالۍ د کمولو اونۍ له هوکړې ملاتړ وکړ او د دایمي اوربند غوښتنه يې وکړه.

دوی وویل، دیني عالمان او قومي مخور حاضر دي، چې د جګړې له ټولو اړخونو سره د سولې په مسایلو خبرې وکړي او ټول ولسونه ددې بهیر ملاتړ ته راوبولي.

په خوست کې دا ځل لسګونو دیني عالمانو او قومي مخورو په یو غږ د یوې اونۍ لپاره د تاوتریخوالي د کمښت له هوکړې ملاتړ څرګند کړ او د جګړې له ښکېلو خواوو يې وغوښتل، چې په دې هېواد کې د روانو ناخوالو او وژنو د بندولو لپاره دایمي اوربند او سوله وکړي.

قومي مشر حمیدګل منګل غونډې ته په خپلو خبرو کې وویل، دوی د تاوتریخوالي د کمولو له اونۍ ملاتړ کړي او هیله يې داده چې دا بهیر په میاشتو، کلونو او دایمي اوربند بدل شي.

ده زیاته کړه، د جګړې د داوړو لورو قربانیان افغانان دي او دوی باید د دایمي سولې لپاره بین الافغاني مذاکرات ترسره کړي.

دیني عالم مولوي محمدسلیم منصور مشال راډیو ته وویل، دیني عالمان حاضر دي، چې د جګړې له ټولو لورو سره کیني او هغوی په دې هېواد کې د سولې پر حقانیت قانع کړي.

د مجاهدینو شورا مرستیال مولوي عبدالصمد بیا له دیني عالمانو وغوښتل، چې د منبر له لارې د افغان حکومت څخه په ناراضو مخالفینو غږ وکړي، چې سوله ومني،څو افغانان له دې اوږدې جګړې وژغورل شي.

ده له افغان حکومت هم وغوښتل، چې په دې هېواد کې د سولې لپاره دې خپلې هڅې لا ګړندۍ کړي.

د امریکا ولسمشر ډونالد ټرمپ هم د یکشنبې په ورځ هند تر سفر مخکې د خبریالانو د پوښتنې په ځواب کې ویلي وویل، که د تاوتریخوالي د کمښت موده سم کار ورکړي له طالبانو سره به تړون لاسلیک شي.

هغه ویلي خپل نوم به د دې تړون لاندې ولیکي.

له دې سربېره په همدې ورځ د اسلامي همکارۍ سازمان "او ای سي" په افغانستان کې د تاوتریخوالي د کمښت له پیله هرکلی وکړ.

د دغه سازمان په خپره شوې اعلامیه کې راغلي د امریکا او طالبانو ترمنځ د تاوتریخوالي د کمښت موافقه چې د افغان حکومت په مشوره شوې په افغانستان کې به د با ثباته سولې د راتلو لپاره لار هواره کړي.

مینګوره: د حکومتي پالیسیو خلاف د جماعت اسلامي لاریون

جماعت اسلامي د خپل ګوندي امیر سراج الحق په مشرۍ د سوات له مینګورې چوکه تر نشاط چوکه پورې لاریون وکړ.

په نشاط چوک کې جلسې ته د وینا پر مهال سراج الحق د تحریک انصاف د حکومت پر اقتصادي پالیسۍ او په ملک کې په ګرانۍ نیوکې وکړې او د اوسني حکومت خارجه، داخله او اقتصادي پالیسۍ یې ناکامه وبللې.

تر دې وړاندې د پاکستان یوشمر نورو سیاسي ګوندونو هم د مظاهرو په ترڅ کې پر حکومت ورته اعتراضونه کړي خو د حکومتي ګوند تحریک انصاف غړي فضل حکیم په دوشنبه/اتوار مشال راډیو ته وویل، د اپوزېشن خبرې ناسمې وبللې او زیاته یې کړه چې حکومت یې په کامیابۍ سره پرمخ روان دی.

د ایران پارلېماني ټاکنو کې سخت دریځو زیاتې رایې اخېستي

تمه کېږي چې د ایران د پارلېماني ټاکنو لومړنۍ نتیجې به د فبرورۍ پر ۲۳مه اعلان شي.

خو دا تقریباً ښکاره ده چې بنسټ پالو او سخت دریځو پکې ډېرې رایې اخیستې دي.

داسې څرګندیږې چې د فبرورۍ پر ۲۱مه په ترسره شویو پارلیماني ټاکنو کې د پخوا پرتله کمو خلکو برخه اخیستې وه.

داسې ښکارېده چې په دې ټاکنو کې به بنسټ پالي په ګټه کې وي هغه ځکه چې تر انتخاباتو وړاندې په زرګونه اصلاحات غوښتونکي او نسبتاً منځلاري کاندیدان رد کړل شوي وو. امریکا دا عمل غندلی وو.

د ایران د انتخاباتو ملي ادارې د فبرورۍ پر ۲۲مه ناوخته ویلي چې هغوی له ۲۰۸ انتخابي حلقو څخه د ۷۱ حلقو رایې شمارلې دي.

ملګري ملتونه: ۲۰۱۹ کال کې زرګونو افغانانو ته مرګ ژوبله اوښتې

د جلال اباد یو اوسیدونکي د خپلو وژلو شویو خپلوانو انځورونه پر خپل موټر لګولي.

په افغانستان کې د ملګرو ملتونو ماموریت وايي چې په ۲۰۱۹م کال کې په یاد هیواد کې تشدد ۳۴۰۴ عام وګړي وژلي او ۶۹۸۹ یې نور ټپي کړي وو.

د یاد ماموریت له خوا د فرورۍ پر ۲۲مه په خپاره شوي رپورټ کې ویل شوي، دا پرلپسې شپږم کال دی چې په افغانستان کې هر کال تر ۱۰ زره زیاتو عامو خلکو ته مرګ ژوبله رسېدلې ده.

دا رپورټ په داسې وخت کې راغلی چې افغان چارواکو د فبرورۍ ۲۲مې له نیمې شپې په عملي توګه په تاوتریخوالي کې د کمي اعلان کړی دی.

طالبان، امریکا او افغان ځواکونه سره سلا شوي دي چې تر یوې اوونۍ به په تشدد کې کمی راولي.

ټاکل شوې ده چې تر هغې وروسته به د فبرورۍ پر ۲۹مه د امریکا او طابانو ترمنځ د سولې تړون لاسلیک شي.

د ایران د پارلېماني ټاکنو لومړۍ نتیجې ښايي نن اعلان شي

په ایران کې د پارلېماني ټاکنې

په ایران کې د فبرورۍ پر ۲۱مه، ماخوستن د رایو مرکزونه وتړل شول.

د ایران د ټاکنو ادارې درې واره د رايې ورکولو وخت تمدید کړ څو ډېر خلک د رایې اچولو موقع پېدا کړي.

لومړنۍ پایلې به د فبرورۍ پر ۲۲مه معلومې شي خو وروستۍ پایله به یې د دوشنبې په ورځ اعلانېږي.

په ایران کې ۷۱۴۸ کسانو ته اجازه ورکړ شوې وه چې ځانونه کاندید کړي او نږدې ۹۰۰۰ وګړي له کاندیدۍ منع شوي وو.

د کاندیدانو لېست د ایران د اسلامي رژیم د سختدریځې شوراي نګهبان د یوې څارونکې ډلې تر نظر تېر شوی و او له دې کبله زرهاوو داسې کاندیدان چې د اصلاحاتو ملاتړ یې کاوه، له لېسته وایستل شول.

د ایران اوسني پارلېمان ۹۰ غړي هم په کاندیدانو کې و چې د شورای نګهبان پلاوي یې کاندیدي رد کړه.

په ایران کې ۵۸ میلیونه وګړي د رایې ورکولو په شرایطو برابر ګڼل شوي دي.

د امریکا ولسمشر ډونلډ ټرمپ هند ته ځي

ارشیف

په داسې حال کې چې د امریکا ولسمشر ډونلډ ټرمپ د فبرورۍ پر ۲۴مه هند ته سفر کوي د سپینې ماڼۍ چارواکي وايي تمه نه لري چې د دواړو هیوادونو ترمنځ به د سوداګرۍ یوه محدوده تړون هم لاسلیک شي.

امریکايي چارواکي او کاروباري کمپنۍ وايي، د دې وجه د هند لخوا لګول شوي سوداګریز محدودیتونه دي.

د ټرمپ انتظامیې یو لوړ پوړي چارواکي د فبرورۍ پر۲۱مه خبریالانو ته وویل چې د دواړو هیوادونو ترمنځ د کرکیلې، طبي الاتو، ډیجیټیل سوداګرۍ او د مجوزه نوو بیو په سر اختلاف لا نه دې هوار شوی.

نوموړي زیاته کړې چې ولسمشر ټرمپ به له وزیر اعظم نریندرا مودي سره د دغه موضوعاتو په ګډون په هغه تړون هم خبرې کوي چې له مخه يې هند له روسیې د پنځه بیلیونه ډالره په بدل کې له ځمکې په هوا کې د توغندیو ویشتلو نظام اخستی دی.

ولسمشر ټرمپ به د فبرورۍ پر ۲۴مه د هند په احمداباد کې د نړۍ تر ټولو لوی کرکټ لوبغاړې کې له وزیر اعظم مودي سره شریکې ولسي غونډې ته وینا کوي.

ایټالیا کې یو تن د کورونا وایرس له کبله مړ شوی دی

په ایټالیا کې د کورونا وایرس پېښه

په داسې حال کې چې کورونا وایرس په چین کې له ۲۳۰۰ نه ډېر کسان وژلي دا په اروپا کې له دې وایرس څخه د چا مړه کېدو لومړۍ پېښه ده.

د ایټالیا روغتیا چارواکیو د فبرورۍ پر ۲۱مه وویل چې په دغه سړي کې وایرس موندل شوی وو او په روغتون کې يې ساه ورکړې ده.

په ایټالیا کې له دې وړاندې د کورونا وایرس مخنیوي لپاره ۱۰ ښار ګوټي تړل شوي دي او د شاوخوا ۳۳۰۰ کسانو د وینې نمونې اخستل کېږي.

په عین حال کې چینايي چارواکیو ویلي، د فبرورۍ پر۲۱مه هلته په نورو ۳۹۷ کسانو کې د کورونا وایرس تصدیق شوی دی.

له دې سره په مرکزي چین کې د وایرس ځپل شویو شمیره ۷۶،۲۸۸ ته رسېدلې ده.

په لوګر کې اوربند غږ مشاعره

شاعر مطیع الله تراب وايي، ممکن دا ډول غږونه کاڼي زړونه نرم کړي.

د فبرورۍ پر ۲۰مه د لوګر په مرکز پل علم کې د التمور د کلیوالي سیمې د ځوانانو په نووښت د اوربند غږ په نوم مشاعره جوړه شوه.

په یاده مشاعره کې چې له لوګر سربیره د خوست، پکتیا، پکتیکا، لغمان او کابل بېلابېلو ولایتونو شاعرانو او د شعر او فرهنګ مینه والو برخه اخیستې وه او تابیا کوونکو يې موخه د سولې او اوربند لپاره د عامو ولسونو د غږ اوچتول یاد کړل.

د لوګر د اطلاعاتو او فرهنګ رئیس عبدالرحمن تسل وايي، پخوا به د سولې او اوربند غږ د غونډو او ناستو د ویناوالو لخوا کېده، خو دا ځل دا غږ د هغو سره په توپیر د شاعرانو لخوا اوچتیږي.

ده وویل، پخوا خلکو د ګواښونو له کبله د سولې او اوربند خبره په احتیاط سره کوله، خو اوس په دې لاره کې ګواښونو پسې نه ګرځي او د سولې خبره په جرئت سره کوي.

د لوګر په اوربند غږ مشاعره کې له خوست میمله شاعر مطیع الله تراب هم د التمور د سیمې ځوانان وستایل، چې سوله يې په یو نوي پیغام کې نغښتې وه او ممکن دا ډول غږونه کاڼي زړونه نرم کړي.

د لوګر په اوربند غږ مشاعره کې ګڼو شاعرانو خپل او د نورو انتخابي شعرونه او غزلونه وویل.

د لوګر د اوربند غږ مشاعرې په پای کې پر یو شمېر میلمنو شاعرانو برابرې شوې ډالۍ هم وویشل شوې.

امریکا او برتانیا پر روس د انټرنېټي برید تور پورې کړی

ارشیف

تر جارجیا (ګورجستان) وروسته امریکا او برتانیا هم د تېر کال د هغې لویې انټرنېټي حملې ګوته روسیې ته نیولې چې له کبله یې زرګونه جارجیايي ووبپاڼې بندې شوې او ان ټېلېوېژني خپرونې وځنډېدې.

د جارجیا بهرنیو چارو د وزارت ویاند ولادیمیر کونستانتېنېدي د فبرورۍ پر ۲۰مه په تېبلیسي کې یوې خبري غونډې ته وویل چې روسیې انټرنېټي برید پلان او ترسره کړی وو.

ده وویل، "د جارجیايي چارواکو پلټنې او له ملګرو څخه ترلاسه شوي معلومات ښيي چې د روسیې د پوځ یوې عمومي څانګې دا انټرنېټي برید کړی وو."

د نوموړي تر خبرو څو ساعته وروسته امریکا او برتانیا بېګا په جلا، جلا بیانونو کې وویل چې انټرنېټي برید د روسیې د پوځي استخباراتي ادارې یوې څانګې کړی چې ۷۴۴۵۵ څانګه او سینډورم نومېږي.

سینډورم د روسیې په پوځي استخباراتو کې د انټرنېټي غلو د یوې ډلې نوم دی چې د امنیتي پوهانو په وینا د فرانسې ولسمشریزو انتخاباتو د نوماند اېمانوېل مکرون د کیمپېن د برېښلیکونو (اي مېلونو) په غلا او په ۲۰۱۶ز کال کې د امریکا ولسمشریزو انتخاباتو پرمهال د ډېموکراټ ګوند پر ضد د کیمپېن پر کولو تورنه ده.

برتانیې هم پر دې ډلې په ۲۰۱۷ز کال کې په اوکراین کې د دوو انټرنېټي حملو تور پورې کړی.

د امریکا بهرنیو چارو وزیر مایک پامپېو بېګا پر روسیې غږ وکړ چې "په جارجیا او نورو هېوادونو کې له دې ډول کړنو لاس واخلي."

مسکو د تازه تورونو په غبرګون څه نه دي ویلي خو په تېرو وختونو کې یې دا دعوې بې اساسه بللي.

چین: د کورونا وایروس پېښې کمې شوې دي

د چین په یوه روغتون کې پر کرونا وایروس باندې د اخته کس درملنه

چین وايي چې پر کرونا وایروس د اخته کېدونکو کسانو شمېر خورا کم شوی او ورسره هیلې پیدا شوي چې دا ساري ناروغي ممکن کنټرول شي.

د چین د روغتیا ملي کمېسیون نن پنجشنبه اعلان وکړ چې ۶۲۸ نوې قضیې یې ثبت کړې دي.

دا کمېسیون همداراز وايي چې ۴۵ نورې قضیې یې د چین په نورو برخو کې ثبت کړې دي.

دا په نږدې یوه میاشت کې په هوبې ولایت او په ځانګړي ډول په ووهان ښار کې تر ټولو کم شمېر قضیې دي چې ثبت کېږي.

په مجموع کې تر اوسه پورې ۲ زره ۱۱۸ تنه په کرونا وایروس مړه شوي دي.

په چین کې تر ۷۴ زره ډېر کسان په کرونا وایروس اخته شوي.

همداراز په ۳۰ نورو هیوادونو کې سلګونه کسان په دې وایروس اخته شوي دي.

هنګو: د ماشومې مدیحې د وژنې په تور یې د تره زوی ګرفتار

د هنګو ضلعې پولیس وايي چې د درسمندو سیمې د اته کلنې ماشومې مدیحې د وژنې په تړاو یې یو تن نیولی دی.

د پولیسو یوه ځايي مشر شوکت علي شاه نن د فبرورۍ پر ۲۰مه مشال ریډيو ته وویل چې نیول شوی تن الیاس نومېږي چې د وژل شوی ماشومې د تره زوی دی.

پولیس وايي دوی پر دغه تن د قتل الزام ثابت کړی دی چې هغه یې په خپله اعتراف کړی خو ملزم پر ماشومې د جنسي تېري له توره انکار کړی دی. پولیس وايي د وینې نمونې یې د ازموینې لپاره لېږلي دي.

مدیحه د فبرروۍ پر ۱۵مه لا درکه شوې وه چې مړی یې یوه ورځ وروسته په یو ځايي ځنګل کې و موندل شو. د پېښې پر ضد په سیمه کې مظاهرې هم شوی وی

جرمني کې د ډزو په دوو پېښو کې ۱۰ تنه وژل شوي

د جرمني پلټونکي وايي له فرینکفرټ سره نږدې بېګا د ډزو په پېښه کې د لږ تر لږه لسو کسانو وژنه یو 'ترهه ګر برید' و او موخه یې له بهرنیو وګړیو کرکه وه.

پولیس وايي، د هناو ښار په چیلم خانه او کیفې کې د هغه تن مړی د هغه له اپارتمانه موندل شوی چې ګمان کېږي دا ډزې یې کړې دي.

په عین حال کې د ترکیې ولسمشر رجب طیب اردغان یوه ویاند نن د فبرورۍ پر شلمه په استنبول کې وویل چې په وژل شویو کې د ترکي وګړي شامل دي.

ابراهیم کلین وویل ترکي تمه لري چې د جرمني انتظامیه به د وژنو په پلټنو کې هر ممکن کوشش کوي.

ځايي رسنیو ویلي جې بیګا ناوخته د هناو په چیلم خانه او قهوه خانه کې یو تن پر خلکو ډزې وکړې.

پولیسو نن په بیان کې وویل چې پېښه د شپې مهال شا او خوا لس بجې وشوه چې پکې د لسو کسانو د وژل کېدو سربېره ځيني کسان زخمیان شوي هم دي.

پولیسو وویل چې مشکوک تن د پېښې له ځایه و تښتېد خو مړی یې نن له اپارتمانه موندل شوی دی. پولیس وايي هلته د یو بل تن مړی هم وو.

جلال‌اباد کې چاودنې درې تنه وژلي

د جلال‌اباد ښار د سره رود په دو سرکه کې د چاودنې ځای

پېښه څو شېبې وړاندې د جلال‌اباد ښار د سره رود دو سرکه سیمه کې د سنوکر په یو کلب کې شوې ده.

د ننګرهار امنیتي چارواکو تر دې دمه د پېښې په تړاو څه نه‌ دي ویلي.

د چاودنې نوعیت هم نه‌ دی معلوم شوی.

د ننګرهار روغتیايي مسولینو ویلي چې تر دې دمه د پېښې له ځایه درې مړي او دوه ټپيان وروړل شوي دي.

پامپیو په ریاض کې له سعودي چارواکو سره د ایران په اړه غږېږي

پامپیو په ریاض کې له سعودي چارواکو سره د خبرو پر مهال.

د امریکا بهرنیو چارو وزیر مایک پامپیو ریاض ته رسېدلی او تمه ده چې نوموړی به له سعودي چارواکو سره د ایران په اړه خبرې کوي.

د امریکا بهرنیو چارو وزارت د فبرورۍ پر ۱۹مه ویلي چې پامپیو به د شاه سلمان، وليعهد محمد بن سلمان او د بهرنیو چارو وزیر فېصل بن فرهان سره ویني.

سعودي ته له تللو وړاندې د ایتوپیا مرکز ادیس ابابا ته د سفر پروخت پامپیو خبریالانو ته ویلي دوی به له سعودي چارواکو سره زیاتره پر هغو امنیتي مسلو خبرې کوي چې په خاصه توګه د ایران لخوا د خطر له وجې رامخې ته شوي دي.

له ایران سره په شخړو کې ریاض د واشنګټن کلک اتحادي دی.

پامپیو دا هم ویلي واشنګټن له تهران سره خبرو ته تیار دی خو باید لومړی ایران په خپله رویه کې بدلون راولي.

ولسمشر غني او خلیلزاد له طالبانو سره د تاوتریخوالي پر کمېدو غږېدلي

ولسمشر غني، زلمی خلیلزاد سره د لېدو پر مهال.

د افغانستان لپاره د امریکا خصوصي استازي زلمي خلیلزاد د فبرورۍ پر ۱۹مه په کابل کې له افغان ولسمشر محمد اشرف غني سره لیدلي دي.

دواړو مشرانو له طالبانو سره د امریکا سولې پر هغه تړون خبرې کړي دي چې پکې تر اوو ورځو پورې د تشدد کمولو خبره شوې ده.

د ولسمشر غني دفتر په یوه بیان کې ویلي چې خلیلزاد له ځايي مشرانو سره په دې اړه ګټه ورې خبرې کړي دي چې څنګه افغان حکومت د سولې عمل پرمخ یوسي، چې بل اخر په دغه هېواد کې د نېږدیو دوو لسیزو جګړه پای ته ورسوي.

دغه شان د اروپایي ټولنې مشر جوزف بورېل ولسمشر غني ته په ټیلیفون پر بیا منتخبېدو مبارکي ویلې او د بشپړې سولې عمل پر مخ وړلو یې خبرې کړي دي.

د اروپایي ټولنې د یو خبر ترمخه بورېل له ولسمشر غني سره په خبرو کې د سولې د عمل د مرستې او په دې اړه په یووالي ټینګار کړی او دا یې هم ویلي چې اروپایي ټولنه به د افغانستان د سولې د عمل مرسته کوي.

روس د کرونا وایرس له کبله پر چینايي وګړو بندیز لګولی

ارشیف

روس وايي، د وژونکي کورونا وایرس د مخنیوي په غرض یې دغه هېواد ته د چینايي وګړیو په ورتګ عارضي بندیز لګولی دی.

د روس مرستیالې وزیر اعظمې تاتیانه ګولېکوا چې د صحت څانګې مشري هم کوي، له دفتره د فبرورۍ پر۱۸مه خپور شوي بیان کې راغلي چې دا بندیز به د فبرورۍ له ۲۰مې پیل کېږي.

د بیان ترمخه په دې بندیز کې به روس ته د کار، زده کړو، سېل او یا نور کوم شخصي سفر لپاره د چیني وګړیو ورتګ شامل وي خو زیاتوي چې د روس له لارې نورو هېوادونو ته د چینايي وګړیو په تګ راتګ به بندیز نه وي.

په بیان کې دا نه ویل شوي چې دا بندیز به تر کومې جاري وي.

کورونا وایرس چې زیاتره په چین کې محدود کړل شوی تر اوسه یې په نورو هېوادونو کې ۵۰۰ ناروغان رپوټ شوي دي، دا راز تر دې دمه له چین څخه بهر د دې وایرس له کبله په فرانس، هانګ کانګ، فلپاین او جاپان کې یو، یو تن مړ شوی دی.

له طالبانو سره هوکړې ته د رسېدو امکان وینو: ټرمپ

د امریکا ولسمشر ډونالډ ټرمپ

د امریکا ولسمشر ډونالډ ټرمپ وایي، له طالبانو سره خبرې دوام لري او دی له دې ډلې سره تړون ته د رسېدو یو امکان ویني.

ټرمپ د فبرورۍ ۱۹مه واشنګټن ته نېږدې په اندرو هوایي اډه کې خبریالانو ته وویل حکومت یې له طالبانو سره خبرې کوي او یوې هوکړې ته د رسېدو چانس شته.

ټرمپ یو ځل بیا خپلې پخوانۍ خبرې تکرار کړې چې اوس مهال امریکا په افغانستان کې د قانون عملدارۍ ادارې په توګه کار کوي.

هغه وویل، افغانستان کې د تاوتریخوالي د ډېرېدو پلوی نه دی او نه غواړي چې میلیونونه کسان ووژني.

ټرمپ دا څرګندونې داسې مهال کوي چې د امریکا او طالبانو ترمنځ خبرې حساس پړاو ته رسېدلي او د رپوټونو ترمخه د دوی ترمنځ تړون لاسلیک ته چمتو شوې ده.

نور پورته کړئ

ځانګړې پاڼې

د مشال ځانګړې پاڼې

له موږ سره اړیکي

XS
SM
MD
LG