د لاسرسي ځای

تازه خبر

خبرونه

د لیبیايي ډلې مشر حفطار د سولې تړون و نکړ

د لیبیا ملي پوځ په نوم د وسله والې ډلې مشر جنرل خلیفه حفطار

د روس د بهرنیو چارو وزیر نن وویل د لیبیا په جنوبي برخه کې په جنګ اخته ډلې مشر جنرل خلیفه حفطار د ډزبندۍ موافقې لاسلیکولو پرته له ماسکو تللی دی.

حفطار د لیبیا ملي پوځ په نوم د وسله والې ډلې مشري کوي چې د ملګرو ملتونو لخوا په رسمیت پیژندل شوي د طرابلس حکومت مشر فایض السراج سره د سولې خبرو اترو لپاره ماسکو ته تللی و.

دواړو مخالیفینو له يو بل سره مخامخ ملاقات نه دی کړی خو ټاکل شویو پلاويو یې د بندو دروازو تر شا اووه ساعته خبرې اترې کړي دي چې پکې د دواړو خواو پر لوړپوړو سفارتکارانو سربېره روسي او ترک پوځي چارواکو هم ګډون درلود.

بېګا ماښام د روس د بهرنیو چارو وزیر سرګي لاوروف او د هغه ترک سیال مولوت چاوش اوغلو ویلي وو چې السراج د سولې د لوظنامې مسوده لاسلیک کړې خو حفطار پر دې د غور لپاره وخت غوښتی دی.

په ليبيا کې د جنورۍ په ۱۲مه یو موقتي اوربند وشو چې تر مخه یې روانه درنه جګړه ودرېده خو دواړو خواوو پر یو بل د وړو وړو نښتو په ترڅ کې د ډزبندۍ د سرغړونې تورونه پورې کړي دي.

د نننۍ ورځې ټول خبرونه وګورئ

په خوست کې چاودنې درې پولیس ټپي کړي

نور الله ستانکزي وايي، د ټپي شویو پولیسو روغتیايي حالت د ډاډ وړ دی.

د افغانستان د خوست ښار اړوند د پولیسو اولې امنیتي حوزې ته نېږدې د فیض محمد خان واټ په سیمه د اګست پر اتمه غرمه مهال چاودنه شوې، چې درې پولیس پکې ټپیان شوي دي.

د خوست امنیه قوماندانۍ د امنیت امر سمونمل نور الله ستانکزي مشال راډیو ته وویل، چاودنه په موټر سایکل کې د ځای پر ځای شویو چاودېدونکو توکو په واسطه شوې ده.

هغه زیاته کړه، په دې ځای کې پولیسو پلې ګزمه کوله چې چاودنه پسې وشوه.

نوموړي د ټپي شویو پولیسو روغتیايي حالت د ډاډ وړ وباله او ويې ویل چې د پېښې په اړه څیړنې پیل شوي.

د هغه په وینا، دا پېښه ولسي زیان نه لري.

سمونمل نور الله ستانکزي له خلکو وغوښتل، چې د پېښو ځای ته په ورتګ کې دې بیړه نه کوي او له احتیاطه دې کار اخلي.

د نور محمد په نوم د پېښې یو عیني شاهد هم مشال راډیو ته د ټپي شویو پولیسو شمېر درې تنه وښود.

تر اوسه چا د دې چاودنې ذمه واري‌ نه ده منلې.

د بیروت پېښه: ولسمشر وايي کېدای شي تر شا یې بهرني لاسونه وي

بیروت کې لویې چاودنې لسګونه کسان ووژل او زرګونه یې ژوبل کړل.

د لبنان ولسمشر ویلي، په بېروت کې د اګست د څلورمې نېټې د خونړیو چاودنو شاته کېدای شي بهرنی لاس وي.

په دغو چاودنو کې لږ تر لږه ۱۵۴ کسان وژل شوي او له ۵۰۰۰ زیات ژوبل شوي وو. د لبنان حکومت وايي، په دغه پېښه کې درې لاکه کسان بې کوره شوي او شاوخوا درې اربه ډالره تاوان ولس او حکومت ته رسېدلی دی.

د اګست پر اوومه د لبنان د ولسمشر مایکل اوون څرګندونې په داسې حال کې مخې ته راغلي چې د پېښې په اړه پلټنې روانې دي.

نوموړي ویلي، دوه خبرې امکان لري، یوه دا چې یا خو غفلت شوی دی او یا دا د توغندي یا بم له لارې له بهره مداخلت شوی دی.

چارواکي وايي، د چاودنو پلټنې یې پیل کړي او د بندرګاه مشر په ګډون ۲۰ کسان یې نیولي دي.

د لبنان چارواکو وړاندې ویلي وو، پېښه د بېروت بندر په یوه ډیپو کې د کیمیاوي سرې امونییم نایټرېټ د چاودنې له وجې شوې.

قریشي او پامپیو د افغانستان پر سولې غږېدلي

قریشي وايي، له پامپیو سره په افغانستان کې د سیاسي جوړ جاړي په موضوع غږېدلي.

د پاکستان د بهرنیو چارو وزیر له خپل امریکايي سیال سره په افغانستان کې د سولې پر موضوع خبرې کړې دي.

د پاکستان د بهرنیو چارو وزارت د اګست پر اوومه په یوه خبرپاڼه کې ویلي چې شاه محمود قریشي د مایک پامپیو سره په ټیلیفوني خبرو کې د سیمې په امنیت، د کشمیر په حالاتو او په افغانستان کې د سیاسي جوړ جاړي په موضوع خبرې کړې دي.

د بیان تر مخه قریشي ویلي چې پاکستان په افغانستان کې د بشپړ سیاسي جوړ جاړي لپاره د روانو ټولو هلو ځلو مرسته کوي.

نوموړي هیله څرګنده کړې چې له مشورتي لویې جرګې سره به په هغه هیواد کې د بین الافغاني خبرو لپاره مناسب حالت رامنځ ته شي.

په افغانستان کې مشورتي لویه جرګه

دا په داسې حال کې دی چې په افغانستان کې د سولې بهیر پر مخ بیولو او د ۴۰۰ طالب بندیانو د خوشې کولو پر موضوع درې ورځنۍ مشورتي لویه جرګه نن د اګست پر اتمه هم روانه ده.

د اګست پر اوومه په کابل کې دا جرګه تر هغې وروسته پیل شوه چې افغان ولسمشر اشرف غني د جولای پر ۳۱مه د لوی اختر په مناسبت په پیغام کې وویل چې د ۴۰۰ طالب بندیانو د خوشې کېدو صلاحیت نه لري نو ځکه په دې اړه مشورتي لویه جرګه جوړوي.

پاکستان نړیوال پروازونه بیا پرانيزي

د پاکستان نړيوال هوايي شرکت الوتکه (ارشيف)

د پاکستان هوايي چلند ادارې د بهرنيو پروازونو لپاره د هېواد د ټولو هوايي ډګرونو د بیا پرانيستو اعلان کړی دی.

ادارې د اګست پر اوومه په یوه اعلامیه کې ویلي چې نړیوال پروازونه به د روغتیا له اصولونو سره سم د اګست پر نهمه پیل شي.

د هوايي ډګر کارکوونکو ته په یو بل لیک کې د هوايي چلند ادارې ویلي چې پر ټولو هوايي ډګرونو به داخلي پروازونو ته هم اجازه وي.

د پاکستان هوايي چلند ادارې د مارچ پر ۲۵مه د کورونا وايرس وبا له کبله د هېواد دننه او بهر پروازونه په موقتي توګه بند کړي ول.

د بېروت چاودنو ضد مظاهرې شوې دي

مظاهره کوونکو په بېروت کې ټایرونه وسوځل

د لبنان په پلازمېنه بېروت کې تر خونړیو چاودونو وروسته مظاهری پیل شوي او خلک له حکومته استعفا غوښتنه کوي.

د اګست پر څلورمه په چاودنو کې د وژلیو شمېر ۱۵۴ ته لوړ شوی او تر ۵،۰۰۰ زیات ژوبل دي.

د لبنان سرکاري رسنۍ وايي، مظاهرې د اګست پر شپږمه، بېروت ته د فرانسې ولسمشر اېمانوېل مکرون سفر پر مهال پیل شوې.

مکرون بېروت ته د سفر پر مهال د پېښې د نړیوالو پلټنو غږ کړی
مکرون بېروت ته د سفر پر مهال د پېښې د نړیوالو پلټنو غږ کړی

مظاهرچیانو ټایرونه وسوځل او پر امنیتي سرتېرو یې کاڼي وورول.

امنیتي د مظاهره کوونکو د خپرولو لپاره اوښکې بهوونکی ګیس وکاراوه.

د مظاهرچیانو د منتشر کولو لپاره اوښکې بیونکې ګېس کارولی دی.

مکرون په خپلو خبرو کې د چاودنو د نړیوالو پلټنو غږ وکړ او زیاته یې کړه چې د لبنان مرستې لپاره به په راتلونکو ورځو کې نړیواله غونډه جوړه کړي.

لبنان پخوا د فرانسې تر واک لاندې وو.

فرانسه او ملګري ملتونه په بیړنیو چارو کې د لبنان مرستې هڅې کوي.

د لبنان حکومت وایي په پېښه کې ۳۰۰،۰۰۰ کسان بېکوره شوي او د زیان کچه ‌یې شاوخوا درې اربه امریکايي ډالرو ته رسېږي.

ملګرو ملتونو د بېروت روغتونونو لپاره د نهه میلیونه ډالرو مرسته اعلان کړې. په هغو کې یې درې روغتونونه په چاودنو کې خورا زیانمن شوی دي.

د اروپايي ټولنې د شورا مشر شال مېشل د اګست پر اتمه بېروت ته د ورتګ اعلان کړی.

په عین حال کې د لبنان چارواکو ویلي، د چاودنو پلټنې یې پیل کړي او ۱۶ مشکوک کسان يې نیولي دي.

د لبنان چارواکي وايي، پېښه د بېروت بندر په یوه ډیپو کې د کیمیاوي سرې امونییم نایټرېټ چاودنې له وجې شوې.

جنوبي وزیرستان: د ځمکلاندې بم چاودنې یو کس ژوبل کړی

جنوبي وزیرستان کې وخت په وخت د ځمکلاندې بمونو چاودنې کېږي

په جنوبي وزیرستان کې د ځمکلاندې بم په چاودنه کې یو کس ټپي شوی دی.

چارواکي وايي، پېښه اګست پر شپږمه د تنګي بودین په سیمه کې شوې ده.

د دوی په خبره، د ۲۰ کلن طاهر خان ځوان درملنه روانه ده.

د جنوبي وزیرستان یوه انتظامي مشر الله نور شېراني د اګست پر اوومه مشال راډیو ته وویل، له طاهر خان سره له حکومتي پالیسۍ سره سم، مرسته کېږي.

په جنوبي وزیرستان کې وخت په وخت د ځمکلاندې بمونو چاودنې کېږي چې د ځاني او مالي تاوان لامل ګرځي.

د پښتون ژغورنې غورځنګ یو مخکښ غړی عالمزېب مسود وايي، حکومت د ځمکلاندې بمونو په پاکولو کې سنجیده نه دی.

خو د پاکستان حکومت وايي، پوځ په قبایلي سیمو کې د بمونو پاکولو بهیر ته دوام ورکړی او په چاودنو کې یې سرتېرو ته هم مرګ-ژوبله اوړي.

د مځکې ښخ بم چاودنې کېږي چې د ځاني تاوان سبب ګرځي.

په جنوبي وزیرستان کې په جولای کې د ځمکلاندې بمونو درې چاودنې شوي دي چې پکې یو ۱۳ کلن ماشوم وژل شوی او اووه ژوبل شوي ول.

امریکا: کووېډ-۱۹ ناروغۍ په ۲۴ ساعتونو کې تر ۲،۰۰۰ زیات کسان وژلي

په امریکا کې په تېرو درو میاشتو کې د لومړي ځل لپاره پر یوه ورځ د کووېډ-۱۹ ناروغۍ څه باندې ۲،۰۰۰ کسان وژلي دي.

امریکا کې په وروستیو اوونیو کې د کورونا وایرس پېښې په زیاتېدو دي.

د اګست پر شپږمه په هغه هېواد کې په ۲۴ ساعتونو کې د څه باندې ۵۸۰،۰۰ نویو پېښو او د ۲،۰۶۰ کسانو د مړینې شمېر ثبت شو.

په یوه شپه او ورځ کې د مړینې دا شمېر په تېرو درو میاشتو کې دومره نه وو ختلی، وروستی ځل د مې پر اوومه نېټه په ۲۴ ساعتونو کې څه باندې ۲،۰۰۰ امریکایان کووېډـ۱۹ مړه کړي ول.

په نړۍ کې د کووېډ-۱۹ تازه شمېرې

په نړۍ کې د کورونا وایرس ناروغۍ (کووېډ-۱۹) له وجې د مړو شمېر ۷۱۵،۱۶۳ ته رسېدلی دی.

د کووېډ-۱۹ ارقامو په اړه د امریکا جانز هاپکېنز پوهنتون د ځانګړې ووبپاڼې په وینا، د اګست تر اوومې په نړۍ کې د رسمي مثبتو پېښو شمېر ۱۹.۱ میلیونه ته لوړ شوی دی خو تر ۱۱ میلیونه زیات کسان له ناروغۍ جوړ شوي هم دي.

کورونا وایرس په نړۍ کې تر ټولو زیاته امریکا، ورپسې برازیل او بیا هند ځپلي دي.

د کورونا وایرس لومړۍ پېښې د ۲۰۱۹ز کال په ډېسېمبر کې د چین په ووهان کې اعلان شوې چې د څو میاشتو په موده کې ناروغي د نړۍ تر شاوخوا هرې سیمې ورسېده.

په مارچ کې د روغتیا نړیوال سازمان د وایرس خپرېدو ته په کتو جهاني وبايي حالت اعلان کړ.

افغانستان: بېلا بېلو پېښو کې د وسله والو په ګډون ۱۹ تنه وژل شوي

چارواکي وايي په پکتیا کې پر سرتېرو تر برید وروسته نښته وشوه

چارواکي وايي، د افغانستان په پکتیا، کاپیسا او بدخشان ولایتونو کې د طالبانو په بریدونو او له حکومتي ځواکونو سره د وسله والو په نښتو کې لږ تر لږه ۱۹ کسان ووژل شوي دي.

د دوی په خبره، په وژلیو کې وسله وال طالبان او ملکي وګړي شامل دي.

د پکتیا امنیه قوماندانۍ وایي د اګست شپږمې پر سهار په احمد خېلو ولسوالۍ کې لومړی د ماین چاودنه وشوه او بیا د افغان ځواکونو او طالبانو ترمنځ نښتو کې اووه وسله وال ووژل شول.

له کاپیسا څخه امنیتي سرچینو د اګست پر شپږمه مشال راډيو ته وویل چې وسله والو طالبانو د ملي پاڅون د یوه سیمه ییز قوماندان سیف الدین پر کور برید کړی چې پکې نوموړی له درو ساتونکو سره وژل شوی.

په دې برید کې د هغه د کورنۍ درې ښځینه غړې هم وژل شوې دي.

ویل کېږي په متقابلو نښتو کې طالبانو ته هم مرګ-‌ژوبله اوښتې، خو دقیق شمېر یې معلوم نه‌ دی.

اخوا له بدخشانه هم رپورټونه وايي چې افغان ځواکونو په جرم ولسوالۍ کې پر امنیتي پوستو د طالبانو د بریدونو مخه نیولې او د نښتې پر مهال یو وسله وال وژل شوی او درې ژوبل دي.

طالبانو لا د حکومتي دعوو او حملو په اړه څه نه دي ویلي.

د فرانسې ولسمشر اېمانوېل مکرون بیروت ته تللی

د فرانسې ولسمشر مکرون د پېښې ځای ته ولاړ

د فرانسې ولسمشر اېمانوېل مکرون د اګست پر شپږمه د لبنان پلازمېنې بېروت ته ورسېد.

نوموړي د اګست څلورمې د چاودنو ځپل شویو لبنانیانو ته په وینا کې وویل چې هېواد به ‌یې ورسره خپلو همکاریو ته دوام ورکړي، خو د هغه هېواد پر چارواکو یې ټینګار وکړ چې د اداري فساد (درغلۍ) مخه ونیسي او اصلاحاتو ته زمینه برابره کړي.

له نویو رپورټونو سره سم، د بېروت بندر په یوه ډیپو کې د کیمیاوي سرې امونییم نایټرېټ چاودېدو په پېښه کې د وژلیو شمېر ۱۳۷ ته رسېدلی او شاوخوا ۵،۰۰۰ پکې ژوبل دي.

چارواکي وايي، لسګونه کسان د ړنګو ودانیو لاندې شوي او لا یې هم د مړي، ژوندي پته نه لګي.

شاوخوا ۵،۰۰۰ کسان ټپیان دي او لسګونه کسان لا هم تري تم دي.

د لبنان حکومت وایي په پېښه کې ۳۰۰،۰۰۰ کسان بېکوره شوي او د زیان کچه ‌یې شاوخوا درې اربه امریکايي ډالرو ته رسېږي.

چارواکي وايي، د چاودنو پلټنې کوي.

هیومن رایټس واچ: پاکستان دې نیب د ناقانونه ګرفتاریو لپاره نه کاروي

نیب د پخواني پوځي جنرال پروېز مشرف په واکمنۍ کې جوړه شوې وه

د بشري حقونو څار نړیوال سازمان (هیومن رایټس واچ) له پاکستانه غوښتنه کړې چې د احتساب قامي اداره (نیب) دې پر حکومت د انتقاد کوونکو ګرفتاریو لپاره د "الې" په توګه استعمالول ودروي.

سازمان د اګست پر شپږمه په رپورټ کې ویلي چې د پاکستان حکومت باید د نیب هغو چارواکو خلاف پلټنې او کارروايي وکړي چې په ناقانونه ګرفتاریو او نورو تېریو کې ککړ دي.

د احتساب قامي اداره په ۱۹۹۹ز کال کې د پخواني پوځي جنرال پروېز مشرف په واکمنۍ کې جوړه شوې وه.

مشرف نیب ته د ګرفتاریو، پلټنو او عدالتي کارروايۍ پراخ اختیارات ورکړي ول.

هغه نیب ته واک ورکړی وو چې د رسمي تور بغیر تر ۹۰ ورځو پورې کسان په بند کې ساتلای شي.

د پاکستان سپریم کورټ د جولای پر ۲۰مه د مخالفو ګوندونو سیاستوالو خواجه سعد رفیق او خواجه سلمان رفیق خلاف د قضیو اورېدنې پر مهال د نیب پر کارکردګۍ تنقید کړی وو او ویلې یې ول چې د کره ثبوتونو بغیر یې دواړه سیاستوالان ګرفتار کړل او تر ۱۵ میاشتو یې په بند کې وساتل.

نیب د هیومن رایټس واچ د تورونو په غبرګون کې لا څه نه دي ویلي.

خو د پاکستان وفاقي حکومت په بیا بیا ویلي چې د احتساب اداره په خپلو چارو کې خپلواکه ده او حکومت یې د اپوزیشن سیاستوالانو پر ضد نه کاروي.

د تحریک انصاف په مشرۍ وفاقي اېتلافي حکومت همداراز ویلي دي چې نیب د هغه ګوند سیاستوالانو ضد هم اقدامات کړي او د قضیو پلټنې کوي.

د جمعې پر ورځ کابل کې مشورتي لویه جرګه پیلېږي

په ۲۰۱۹ز کال کې هم افغان ولسمشر د سولې بهیر په اړه مشورتي لویه جرګه وربللې وه.

افغان چارواکي وایي، په کابل کې د اګست پر اوومه د مشورتي لویې جرګې لپاره تیاری کوي.

د جرګې د عامه اړیکو د کمیټۍ یوه غړي غفور احمد جاوید د اګست پر شپږمه مشال راډیو ته وویل، وربللي زیاتره ګډونوال کابل ته رسېدلي او پاتې ښايي د پنجشنبې (زیارت) تر ماښامه ورسېږي.

نوموړي وویل دا د سولې مشورتي لویه جرګه ده چې د سولې د لارې نقشه به جوړوي.

افغان ولسمشر اشرف غني، د جولای پر ۳۱مه د لوی اختر په مناسبت په پیغام کې وویل چې د ۴۰۰ طالب بندیانو د خوشې کېدو صلاحیت نه لري نو ځکه په دې اړه مشورتي لویه جرګه ورغواړي.

افغان حکومت وايي، د طالبانو په نوملړ کې شامل ۴۰۰ کسان جرمي قضیې لري ځکه یې نه خوشې کوي.

خو غني د طالبانو له ورکړي ۵،۰۰۰ کسیز نوملړ علاوه د نورو ۵۰۰ طالب بندیانو د خوشې کېدو اعلان هم وکړ.

د امریکا او طالبانو ترمنځ د فبرورۍ پر ۲۹مه د سولې په موافقه کې راغلي ول چې د بین الافغاني خبرو تر پیل مخکې به افغان حکومت د طالبانو ۵،۰۰۰ او طالبان به د حکومت ۱،۰۰۰ بندیان خوشې کوي.

دواړه خواوې وايي، زیاتره بندیان یې خوشې کړي دي.

خو افغان حکومت وايي، هغه ۴۰۰ زندانیان نشي خوشې کولای چې جنايي قضیې لري.

طالبانو او د ولسي جرګې مشر د جرګې جوړېدو مخالفت کړی.

د مشورتي لویې جرګې ویاند غفور احمد جاوېد وايي، یو شمېر کسانو د جرګې مخالفت کړی چې په وینا یې دومره ارزښت نه لري ځکه چې د افغانانو اراده مهمه ده.

جاوېد زیاتوي په جرګه کې به شاوخوا ۳،۰۰۰ کسان ګډون کوي او تر درو ورځو به روانه وي.

تر دې مخکې په ۲۰۱۹ز کال کې هم افغان ولسمشر د سولې بهیر په اړه مشورتي لویه جرګه وربللې وه.

پاکستان: په ۲۴ ساعتونو کې د کورونا وایرس ۷۲۷ تازه پېښې ثبت شوي

په کراچۍ کې یو روغتیاپال په یوه کس کې د کورونا وایرس موجودګۍ لپاره معاینه کوي

په پاکستان کې په ۲۴ ساعتونو کې د کورونا وایرس د ۷۲۷ تازه پېښو له ثبتېدو سره په هغه هېواد کې د رسمي مثبتو پېښو شمېر ۲۸۱،۸۶۳ ته لوړ شوی دی.

د کووېډ-۱۹ په اړه د پاکستان حکومتي ووبپاڼه وايي، د اګست تر شپږمې په هېواد کې ناروغۍ ۶،۰۳۵ کسان وژلي خو ۲۵۶،۰۵۸ ورڅخه جوړ شوي هم دي.

د پاکستان حکومت وايي، له جولای راهیسې په هېواد کې د کورونا وایرس د پېښو شمېر په ټيټېدو دی.

په جون کې په هغه هېواد کې هره ورځ اوسطاً ۲،۰۰۰ پېښې ثبتېدې.

نړۍ کې له کووېډ-۱۹ ناروغۍ د مړو شمېر ۷۰۰،۰۰۰ ته ورسېد

تر امریکا او برازیل وروسته تر ټولو زیاتې پېښې په هند کې ثبت شوي

په نړۍ کې د کورونا وایرس ناروغۍ (کووېډ-۱۹) له وجې د مړو شمېر ۷۰۱،۰۸۵ ته رسېدلی دی.

د کووېډ-۱۹ ارقامو په اړه د امریکا د جانز هاپکېنز پوهنتون د ځانګړې ووبپاڼې په وینا، د اګست تر پېنځمې په نړۍ کې د رسمي مثبتو پېښو شمېر ۱۸.۴ میلیونه ته لوړ شوی دی خو تر ۱۱ میلیونه زیات کسان له ناروغۍ جوړ شوي هم دي.

د کورونا وایرس تر ټولو زیاتې پېښې په امریکا کې ثبت شوې دي.

تر هغې وروسته زیاتې پېښې په برازیل او هند کې ثبت شوې دي.

د کورونا وایرس لومړۍ پېښې د ۲۰۱۹ز کال په ډېسېمبر کې د چین په ووهان کې اعلان شوې چې د څو میاشتو په موده کې ناروغي د نړۍ تر شاوخوا هرې سیمې ورسېده.

د روغتیا نړیوال سازمان (ډبلیو اېچ او) د مارچ پر ۱۱مه د کورونا وایرس ناروغي جهاني وبا وبلله.

پاکستان: په ۲۴ ساعتونو کې د کورونا وایرس ۶۷۵ پېښې ثبت شوي

روغتیايي کارکوونکی د کورونا وایرس معاینې لپاره د یوې ښځې له پوزې مایع مواد اخلي

په پاکستان کې په ۲۴ ساعتونو کې د کورونا وایرس له ۶۷۵ نویو مثبتو پېښو له ثبتېدو سره، د رسمي پېښو شمېر ۲۸۰،۸۵۴ ته لوړ شوی دی.

د هغه هېواد د حکومتي ووبپاڼې له وینا سره سم، د اګست تر پېنځمې پورې په هېواد کې له کووېډ-۱۹ ناروغۍ څخه ۶،۰۱۰ کسان مړه شوي خو تر ۲۵۴،۰۰۰ زیات ورڅخه رغېدلي دي.

د پاکستان حکومت وايي، له جولای راهیسې په هېواد کې د کورونا وایرس د پېښو شمېر په ټيټېدو دی.

په جون کې په هغه هېواد کې هره ورځ اوسطاً ۲،۰۰۰ پېښې ثبتېدې.

پاکستان او انګلستان د ټېسټ کرکټ سیالي کوي

پاکستان او انګلینډ د ټېسټ درې سیالۍ لري

د اګست پر پېنځمه، په مانچسټر کې د انګلستان او پاکستان ترمنځ د کرکټ ټېسټ سیالي کېږي.

د کورونا وایرس وبا مخنیوي لپاره د اقداماتو له وجې د درو ټېسټ لوبو لومړۍ سیالۍ ته خلک لوبغالي ته نشي ورتللای.

د ټېسټ کرکټ یوه سیالي پېنځه ورځې روانه وي.

د پاکستان لوبډله په جون کې د درې ټېسټ او شل اووریزه لوبو لپاره انګلینډ ته ورغلله.

تر دې مخکې انګلستان په جولای کې له وېسټ انډیز سره ټېسټ لوبې وکړې او د کورونا وایرس وبا له وجې یې له مارچ راهیسې د کرکټ نړیوالې سیالۍ بیا پیل کړې.

بلوچستان کې د سختو اورښتونو او سېلابونو خبرداری ورکړل شوی

په ۲۰۱۰ز کال کې سېلابونو د نوښار په ګډون یو شمېر ښارونه ځپلي ول

د پاکستان موسمياتو ادارې پر اووم او اتم اګست د بلوچستان د دريو ضلعو لپاره د سختو اورښتونو او سېلابونو خبردارې ورکړی دی.

د بلوچستان د موسمیاتو څانګې يو چارواکي حاجي اسلام د اګست پر څلورمه مشال راډیو ته وویل چې د پشکال بارانونو د روانې لړۍ پر مهال يې د راتلونکې جمعې او خالي په ورځ (د اګست اوومه او تمه) د جل مګسي، نصير اباد او د خضدار ضلعو د غرييزو سیمو لپاره د سختو بارانونو او سېلابونو خبر داری جاري کړی دی.

د حاجي اسلام په خبره دوی اټکل کوي چې د نورو کلونو پرتله به سږ کال په یادو ضلعو کې له ۲۰ څخه تر ۴۰ ملي ميټرو پورې باران کېږي چې له کبله به یې سېلابونه هم راځي.

نوموړي زياته کړه چې دا خبرداری یې له د قدرتي افتونو د نظم له صوبايي ادارې سره هم شریک کړی دی.

په پاکستان د بښکال بارانونو پر مهال په ځېنو سيمو کې وخت ناوخته سېلابونه راځي چې ځاني او مالي زيانونه اړوي.

پامپیو او برادر پر بین ‌الافغاني خبرو او زندانیانو غږېدلي

د امریکا د بهرنیو چارو وزیر مایک پامپیو او د طالبانو د سیاسي دفتر مشر ملا عبدالغني برادر په ويډيويي کنفرانس کې

د امریکا د بهرنیو چارو وزیر مایک پامپیو د اګست پر درېيمه ماښام په قطر کې د طالبانو د سیاسي دفتر له مشر ملا عبدالغني برادر سره د وېډیویي کنفرانس له لارې خبرې کړې دي.

د طالبانو د سیاسي دفتر ویاند سهیل شاهین د اګست پر درېيمه پر خپل ټویټر لیکلي چې "دواړو لورو د بین‌الافغاني مذاکراتو د پیل په اړه بحث درلود او د افغان حکومت لخوا یې د پاتې بندیانو خوشې کېدل مهم وبلل".

د نوموړي په وينا پامپیو د لوی اختر په درېیو ورځو کې د اوربند اعلان هرکلی وکړ.

امریکا او طالبانو د فبرورۍ پر ۲۹مه د سولې یو تړون لاسلیک کړه چې له مخې یې د افغان حکومت او طالبانو لخوا د یو بل بندیانو په خلاصون سره باید بین ‌الافغاني خبرې پیل شي.

تر اوسه طالبانو ۱۰۰۰ حکومتي بندیان خوشې کړي خو افغان حکومت ۴،۶۰۰ بندیان خوشې کړي او وایي د ۴۰۰ پاتې بندیانو د خوشې کېدو په اړه به مشورتي لویه جرګه پرېکړه وکړي.

د طالبانو د سیاسي دفتر ویاند سهیل شاهین په یوه بل ټویټ کې د افغان حکومت هغه ادعا رد کړې چې وایي طالبانو د اختر د درې ورځني اوربند څخه سرغړونه کړې ده.

پاکستان کې له کورونا وايرسه ۵،۹۹۷ کسان مړه شوي

پاکستان کې روغتياپالان له روغتونه د کورونا له کبله ساه ورکوونکي کس مړی راباسي (ارشيف)

په پاکستان کې په کورونا وايرس د اخته کسانو شمېر ۲۸۰،۴۶۱ ته رسېدلی دی. بلخوا د اګست تر څلورمې له دې وايرسه ۵،۹۹۷ کسان مړه شوي خو شاوخوا ۲۴۹،۴۰۰ کسان بېرته ورڅخه رغېدلي هم دي.

حکومت وايي، د جون پرتله، په جولای او اګست کې په پاکستان کې د کورونا وایرس پېښې په کمېدو دي. دا په داسې حال کې ده چې د پاکستان په يو شمېر سيمو کې محدود ټولبند لا هم دوام لري.

کورونا وایرس د ۲۰۱۹م کال په ډېسېمبر مياشت کې د چين په ووهان ښار کې څرګند شو چې د روغتيا د نړيوال سازمان په وينا د نړۍ تقريباً ټولو هېوادونو ته خپور شوی دی. د امريکا د جانز هاپکېنز پوهنتون له خپرو شويو معلوماتو سره سم د اګست تر څلورمې په نړۍ کې تر يو کروړ ۸۳ لکه زيات کسان په دې وايرس اخته شوي چې تر شپږ لکه ۹۴ زره زيات کسان ورڅخه مړه شوي او څه باندې يو کروړ ۱۵ لکه بېرته ورڅخه رغېدلي هم دي.

ټرمپ یوې امریکایي کمپنۍ ته د ټیک ټاک اخيستلو لپاره وخت ټاکلی

ټرمپ وايي، امریکا له مایکروسافټ کمپنۍ سره د ټیک ټاک په رانیولو کې مخالفت نه ‌لري.

د امریکا ولسمشر ډونلد ټرمپ د یوې امریکایي کمپنۍ لپاره د سېپټمبر ۱۵مه نېټه ټاکلې چې د چین ټیک ټاک کمپنۍ واخلي.

ولسمشر ټرمپ د اګسټ پر درېیمه وویل چې د امریکا له مایکروسافټ کمپنۍ سره د ټیک ټاک په رانیولو کې مخالفت نه ‌لري.

ټرمپ ویلي چې د مایکروسافټ کمپنۍ له اجرایوي مشر ساتیا نادیلا سره ‌یې د دغه احتمالي اقدام په اړه خبرې کړې دي.

د امریکا ولسمشر تېره اوونۍ په امریکا کې پر ټیک ټاک بندیز ولګاوه او تور یې پورې کړ چې دا ټولنیزه رسنۍ ښایي د چین لخوا د استخباراتي وسیلې په توګه وکارول شي.

ټیک ټاک په ټوله نړۍ کې شاوخوا یو بليون کاروونکي لري.

راپورونه: ایران د کورونا وایرس اړوند پېښو او مړینو معلومات پټ کړي

په ایران کې د کورونا وایرس له کبله نېږدې ۴۲ زره کسان مړه شوي

تازه راپورونه ښیي چې د ایران حکومت د کورونا وایرس اړوند پېښو او مړینو په اړه معلومات پټ کړي دي.

بي بي سي ته په دې وروستیو کې په دې اړه د یوې بې ‌نومه سرچینې له ‌خوا د ایران د حکومت شمېرې لېږل شوي دي.

دا نوې شمېرې ښیي چې د جولای تر ۲۰مې په ایران کې د کورونا وایرس له کبله نېږدې ۴۲ زره کسان مړه شوي دي.

د ایران روغتیا وزارت دا شمېرې ۱۴،۴۰۵ ښودلې وې.

ایران یو له هغو هېوادونو دی چې د کورونا وبا د خپرېدو په لومړیو میاشتو کې یادې ناروغۍ ډېر ځپلی دی.

له وړاندې هم د ایران پر حکومت نيوکې کېدلې چې رښتونې شمېرې پټوي.

په نړۍ کې د کووېد-۱۹ تازه شمېرې

کورونا وایرس د ۲۰۱۹م کال په ډېسېمبر مياشت کې د چين په ووهان ښار کې څرګند شو چې د روغتيا د نړيوال سازمان په وينا د نړۍ تقريباً ټولو هېوادونو ته خپور شوی دی.

د امريکا د جانز هاپکېنز پوهنتون له خپرو شويو معلوماتو سره سم د اګست تر څلورمې په نړۍ کې تر يو کروړ ۸۳ لکه زيات کسان په دې وايرس اخته شوي چې تر شپږ لکه ۹۴ زره زيات کسان ورڅخه مړه شوي او څه باندې يو کروړ ۱۵ لکه بېرته ورڅخه رغېدلي هم دي.

افغان ولسمشر او پاکستانی وزيراعظم پر افغان سوله غږېدلي

افغان ولسمشر اشرف غني (کيڼ) په اسلام اباد کې له پاکستاني وزيراعظم عمران خان (ښی) سره د ليدنې پر مهال (۲۰۱۹م کال)

د پاکستان وزیراعظم عمران خان له افغان ولسمشر اشرف غني سره په ټېليفوني خبرو کې هیله ښودلې چې د افغانستان د سولې او ثبات په بهیر کې له روان پرمختګ سره به د امریکا او طالبانو ترمنځ د افغان سولې تړون لړ کې نور باور پیدا شي او ورسره به بین الافغاني خبرو پیلېدو ته هم ژر تر ژر لاره هواره شي.

د پاکستان سرکاري راډیو نن (د اګست پر څلورمه) پر خپله وېبپاڼه لیکلي چې افغان ولسمشر پرون (د اګست پر درېیمه) وزیراعظم عمران خان ته د اختر مبارکۍ لپاره ټېليفون کړی و. پر دې مهال عمران خان د افغان سولې په لړ کې د "پاکستان مقبت رول" په ډاګه کړل او په ټينګه يې وويل چې په افغانستان کې سوله "زښته زيات ارزښت" لري.

نوموړي همداراز د دواړو هېوادونو ترمنځ د اړيکو د لا پياوړي کولو لپاره د ګډ کار پر کولو ټينګار وکړ.

د اورکزیو اوسېدونکو د بجلۍ لوډشېډېنګ ضد مظاهره کړې

د اورکزیو د څپرمېشتي سیمې خلکو د بجلۍ لوډشېډېنګ (برېښنايي پارچاو) ضد مظاهره کړې.

د سیمې لسګونه اوسېدونکي د اګست پر درېیمه هنګو ته ورغلي ول او هلته یې د اورکزیو انتظامي دفتر مخې ته نعرې وهلې او تر څه وخت پورې یې د ټل او کواټ ترمنځ لاره هم تړلې وه.

په احتجاج کې شامل یوه سیمه ییز مشر ملک حاجي امیر باچا مشال راډيو ته وویل، بجلي یې د اختر له ورځې قطع ده.

د ده په وینا، په سیمه کې یې ګرمي ده، اوبه نه لري او د قربانۍ غوښې ورڅخه خرابېږي.

په صوبايي اسمبلۍ کې د سیمې استازي سید غازي غزن جمال د اورکزیو له انتظامي مشرانو او د اوبو او برېښنا ادارې (واپډا) له چارواکو سره ولیدل او بیا یې د څپرمېشتو اوسېدونکو سره خبرې وکړې.

جمال مظاهره کوونکو ته د برېښنا بحالۍ ډاډ ورکړ چې تر هغې وروسته د اورکزیو اوسېدونکو احتجاج ختم کړ.

پاکستان له څه د پاسه یوې لسیزې راهیسې د برېښنا له کمښت سره مخامخ دی او په اوړي کې په زیاتره لویو ښارونو او کلیوالو سیمو کې د بجلۍ لوډشېډېنګ کېږي.

دوه امریکايي ستورمزلي د میکسیکو په خلیج کې کوز شول

ستورمزلي په پیراشوټ کې ښکته شول

امریکایي ستورمزلي ډګ هرلي او باب بېنکېن د اګست پر دویمه له نړیوال خلايي مرکزه د میکسیکو په خلیج کې کوز شول.

امریکايي ولسمشر ډانلډ ټرمپ پر ټوېټر ولیکل، دا په ۴۵ کلونو کې لومړی ځل وو چې ستورمزلو په اوبو کې په بریالي توګه د پیراشوټ له لارې ناسته وکړه.

د امریکا د خلايي څېړنو ادارې (ناسا) د مې پر ۳۱مه د اېلن مسک د شخصي کمپنۍ (سپېس اېکس) د پروژې په همکارۍ دوه ستورمزلي نړیوال خلايي مرکز ته ولېږدول.

دا هم لومړی ځل وو چې ناسا د یوې شخصي کمپنۍ راکټ وکاراوه.

ناسا وايي، تر دې وروسته د خلايي سفرونو لپاره د سپېس اېکس په څېر د شخصي کمپنیو مرسته اخلي.

د سږني حج مناسک پای ته ورسېدل

د حج پر مهال خلکو له یو بله فاصله ساتلې وه

په سعودي عرب کې محدود شمېر حاجیانو د سږني حج مناسک د اګست پر دویمه بشپړ کړل.

سږکال د کورونا وایرس وبا خپرېدو مخنیوي په موخه، له اټکل سره سم، له ۱،۰۰۰ څخه تر ۱۰،۰۰۰ خلکو ته د حج ادا کولو اجازه وه، خو نورو کلونو کې به له ۱۸۰ هېوادونو څخه څه باندې دوه میلیونه مسلمانان حج ته تلل.

دا ځل یوازې په سعودي عرب کې مېشتو مسلمانانو حج وکړ.

د اګست پر دویمه د حج پر وروستۍ ورځ حاجیانو ماسکونه په مخ کړي ول او مکې ته یې نېږدې په منا کې د جمرات یا شیطان ویشتلو رکن بشپړ کړ.

تر دې وروسته حاجیان مسجد الحرام ته ورغلل او هلته یې د وداع طواف وکړ.

سږکال په حج کې زیارت کوونکو له یو بله فاصله ساتلې وه او منتظمینو ورته اسانتیاوې برابرې کړې وې.

د سعودي عرب روغتیايي چارواکي وايي، په حاجیانو کې د کورونا وایرس د هېڅ مثبتې پېښې رپورټ نه دی ورکړل شوی.

روسیه: د حکومت ضد مظاهرو پر مهال لسګونه کسان نیول شوي

په خبروفسک ښار کې د اګست لومړۍ مظاهرې منظر

رپورټونه وايي، د اګست پر لومړۍ نېټه د روسیې په بېلا بېلو برخو کې د کرېملېن ضد مظاهرو پر مهال لسګونه کسان نیول شوي دي.

دا احتجاجونه تر هغې وروسته دوام لري چې د هېواد په شرقي سیمه کې یو ګورنر له څوکۍ لیرې او بیا یې ګرفتار کړ.

د اګست پر لومړۍ نېټه پر باراني موسم سربېره، زرګونه خلکو په خبروفسک کې د پرله پسې څلورمې اوونۍ په پای کې هم مظاهرې وکړې چې د وفاقي حکومت له خوا د ګورنر سېرګې فورګل د نیولو ضد خپله غوسه ښکاره کړي.

په خبروفسک کې د چا د نیولو رپورټونه نشته البته په روسیې کې د سیاسي ګرفتاریو د څار یوه ډله وايي، د پلازمېنې مسکو په ګډون په ۱۴ ښارونو کې په مظاهرو کې ۷۰ کسان نیول شوي.

فورګل د جولای پر نهمه تر ګرفتارۍ وروسته پلازمېنې مسکو ته انتقال شو.

چارواکي وايي، نوموړی یې په ۲۰۰۴ز او ۲۰۰۵ کې په یو شمېر وژنو کې د ککړتیا په شک نیولی دی.

د ملي لېبرل ډېموکراټ ګوند فورګل د ۲۰۱۸ز کال په انتخاباتو کې د ولسمشر ولادمیر پوتین د متحدې روسیې ګوند امېدوار ته د ووټونو په لوی توپیر ماته ورکړې وه.

نور پورته کړئ

ځانګړې پاڼې

له موږ سره اړیکي

XS
SM
MD
LG